ءدال قازىر توي-بيزنەستىڭ كوشىن باستاپ تۇرعان انشىلەرىمىزدىڭ رايدەرى قانداي؟ ولار باسقا قالانىڭ تويحاناسىندا ءان سالۋ ءۇشىن نەندەي تالاپتار قويادى؟ بۇل سۇراقتاردىڭ جاۋابىن نازارلارىڭىزعا Kerekinfo.kz سايتى ۇسىنادى.

جۇلدىزداردى تويعا شاقىرۋ ءۇشىن «اقشاسىن تولەسەك بولعانى» دەپ ويلاساڭىز، قاتەلەسەسىز. ولاردىڭ سىياقىسىمەن قوسا، «ەركەلىكتەرىن» دە كوتەرۋ كەرەكسىز.

دجەننيفەر لوپەس سەكىلدى «تەك قانا اق ءتۇستى جيھازدار مەن اق راۋشانعا تولى قوناق ءۇي بولمەسىن»، بريتني سپيرس سياقتى «قوناق ءۇي قىزمەتكەرلەرىنىڭ ءبارى اق ءتۇستى كيىممەن قارسى العانىن، ءوزى ەرتىپ جۇرەتىن باس اسپازىنىڭ عانا تاماعىن» سۇراتپاسا دا، قازاقستان انشىلەرىنىڭ وزىندىك تالاپتارى بار ەكەن.

كۇن سايىن ءار قالانىڭ تويىن قىزدىراتىن، قىزۋ سۇرانىستا تۇرعان رايدەرلى انشىلەرىمىزدىڭ وندىعىن نازارلارىڭىزعا ۇسىنامىز. اقپارات انشىلەردىڭ وزىنەن، پروديۋسەرىنەن جانە ادمينيستراتورىنان الىندى.

1. اسحات تارعىن

تالاپشىل جۇلدىزدار وندىعىن «ماريا ماگدالەنا» ءحيتىن ورىنداۋشى اسحات تارعىن باستاپ تۇر.

اسحاتتى تويىڭىزدا كورەم دەسەڭىز، ۇشاقتىڭ بيزنەس كلاسىنان ورىن اپەرىپ، S-كلاسcتى كولىكپەن قارسى الىپ، اپپاق توسەگى بار بەس جۇلدىزدى قوناق ۇيگە ورنالاستىرۋ كەرەكسىز. بولمەسىندە شوكولاد، جەمىس-جيدەك جانە گازسىز سۋ مىندەتتى تۇردە بولۋ كەرەك.

2. قايرات نۇرتاس

قايرات: «شەتەلگە شىقسام، رايدەرىمدى اياماستان ءۇيىپ-توگەمىن. ءوز ەلىمدە كوپ ەركەلەمەيمىن»، — دەيدى. قايراتتى تويىڭىزدا كورگىڭىز كەلسە، 7 مىڭ اقش دوللارىنان بولەك، بيزنەس كلاستىڭ بيلەت قۇنى، 5 جۇلدىزدى قوناق ءۇيدىڭ ليۋكس بولمەسىن، وتە قىمبات كولىكتىڭ الىپ ءجۇرۋىن قاداعالاۋ كەرەكسىز.

مىندەتتى تۇردە بىرنەشە تازا ورامال بولۋ كەرەك. قايرات قاي قالاعا بارسا دا، «تانىس-پانىستىڭ» ۇيىنە باس سۇقپاي، تەك قانا قوناق ۇيدە جاتقاندى جاقسى كورەدى. سوندىقتان بولمەسىنىڭ جايلى بولۋى — ەڭ باستى تالاپ.

3. كەشYou توبى

كەشYou-ءدىڭ سىلقىمدارىنىڭ تەك بيزنەس كلاسپەن ۇشاتىنى بۇرىننان بەلگىلى. ارينە التى جۇلدىزدى قوناق ۇيلەر پايدا بولسا، بىردەن سونى تاڭدار ەدى.

بۇل گەرلز-بەندتى قاي قالاعا بارسا دا قارا دجيپپەن الىپ ءجۇرۋ — ەڭ باستى دا، ەرەكشە رايدەرى.

4. قىدىرالى مەن قاراقات

بۇل جۇپ تەك بيزنەس كلاسسپەن ۇشىپ، بەس جۇلدىزدى قوناق ۇيگە قونىپ، قىمبات كولىكپەن الىپ جۇرگەنگە ۇيرەنىپ قالعان. تويعا تاپسىرىس الماس بۇرىن تويحانانىڭ اپپاراتۋراسىن تاپتىشتەپ سۇراپ الادى.

وزدەرىمەن بىرگە ميكروفوندارىن الىپ جۇرەدى. ەرەكشە رايدەرى: تويحانانىڭ تىم بيىك بولماۋى.

«تويحانا وتە بيىك بولعان سايىن اكۋستيكا ناشارلاپ، داۋىس شاشىراپ كەتەدى، ءان دۇرىس شىقپايدى»، — دەيدى قىدىرالى.

5. بۇركىت پەن ايشا

مىندەتتى تۇردە ۇشاقتىڭ بيزنەس كلاسسىنداعى ورىن، مىندەتتى تۇردە 5 جۇلدىزدى قوناق ءۇي. ۇشاقتان تۇسكەندە قىمبات كولىك كۇتىپ تۇرۋى كەرەك.

تويحانا ەمەس، تويداعى ادامداردىڭ سانى وتە ماڭىزدى: ادام از بولعان سايىن بۇركىت پەن ايشا الاتىن سىياقى قۇنى قىمباتتاي بەرەدى.

«ادام ازايعان سايىن ولارمەن جۇمىس ىستەۋ، كوڭىلىن كوتەرۋ قيىنداي بەرەدى»، — دەپ تۇسىندىرەدى بۇركىت.

6. ايقىن

ۇشاقتىڭ بيزنەس كلاسىمەن ۇشپاسا بولمايدى. قوناق ءۇيدىڭ جۇلدىزى ماڭىزدى بولماسا دا، تازا وتەلدىڭ ليۋكس نومەرىندە جاتۋ وتە ماڭىزدى. قىمبات بولماسا دا، قۇنارلى، ءدامدى تاماقتان 3 مەزگىل ءنار الۋ كەرەك.

قاي قالادا بولسا دا، ۇنەمى كومەكشىسىمەن جۇرەدى. ەرەكشە رايدەرى: جاندى داۋىسپەن ءان ايتاتىندىقتان داۋىس كولونكالارى 3 كۆت-تان تومەن بولماۋى كەرەك.

7. اقىلبەك جەمەنەي

اقىلبەك تەك قانا بيزنەس كلاسسپەن ۇشادى. قىمبات كولىكپەن قارسى الىپ، بەس جۇلدىزدى قوناق ۇيگە جايعاستىرۋ كەرەك. جانىندا ۇنەمى كومەكشىسى جۇرەتىندىكتەن، ونىڭ دا شىعىندارىن كوتەرۋ مىندەت.

مۋزىكالىق اپپاراتتاردىڭ ساپالى بولعانى دا وتە ماڭىزدى. وسىنىڭ ءبارىن ورىنداپ، 5 مىڭ اقش دوللارىن تولەسەڭىز، اقىلبەك جەمەنەي تويىڭىزدا انتراكتىگە دەيىن بولادى.

8. ايگۇل يمانباەۆا

ۇشاق بيلەتىنىڭ كلاسسى (بيزنەس/ەكونوم) مىندەتتى ەمەس، بىراق، Air Astanaمەن ۇشقاندى قالايدى. قوناق ءۇيدىڭ ليۋكس نومەرى، تازاسى، قولايلىسى بولۋ كەرەك. كوبىنە ءار قالادان ءوزى ۇناتاتىن قوناق ءۇيدى تاڭداۋعا تىرىسادى.

ايگۇل وتە-وتە توڭعاق ادام بولعاندىقتان جاتاتىن جەردىڭ جىلى بولۋىن قاداعالايدى. ارينە قىمبات كولىكپەن قارسى الۋ كەرەك.

9. سەرىك يبراگيموۆ

سەرىك تە ءدال عالىمجان سياقتى ۇشاقتىڭ ەكونوم كلاسىمەن دە، ۇسىنىپ جاتسا، بيزنەس كلاسىمەن دە ۇشا بەرەدى. كۇتىپ الۋشىلاردىڭ جيگۋلي سياقتى كولىكپەن كەلمەسىنە سەنىپ، «مىناداي ماشينامەن قارسى الىڭدار» دەپ تە ايتپايدى.

قوناق ءۇيدىڭ تازا بولۋىن ەسكەرتكەنىمەن، جۇلدىزدارىنىڭ سانىنا باس اۋىرتپايدى. الايدا سەرىك جانىنان ادمينيستراتورىن تاستامايتىندىقتان، جول شىعىندارىنىڭ ءبارى ەكىگە كوبەيۋ كەرەك.

سەرىكتىڭ قويار ەرەكشە رايدەرى: ءان اراسىندا قولىنداعى اسپابىمەن، ياعني، ساكسوفونىمەن اۋەن تارتاتىندىقتان ميكروفوننىڭ تىرەۋىشى بولۋى شارت.

10. عالىمجان مولدانازار

ءانشى عالىمجان تويعا شاقىرسا، ەشقانداي تالاپتار قويمايدى ەكەن. مۇنى توي-بيزنەستەگى تاجىربيەسىزدىگى دەگەننەن گورى، تىم قاراپايىمدىلىعى دەگەن دۇرىسىراق بولار.

عالىمجان ءۇشىن ۇشاقتاعى ورنىنىڭ قاي كلاسسقا جاتاتىنى ماڭىزدى ەمەس، دىتتەگەن جەرگە جەتسە بولعانى. قوناق ءۇيدىڭ دە جۇلدىزىن ساناپ اۋرە بولمايدى، تاماقتىڭ دا ۇسىنىلعانىن جەيدى.

ۇنەمى تەك جاندى داۋىسپەن ايتاتىندىقتان، ميكروفوننىڭ ساپالى بولعانىن قاداعالاپ وتىرادى.

تويعا شاقىرۋشىعا ايتار ءبىر عانا تالابى بار: تاپسىرىس بەرۋشى جاقىن تانىسىپ، جاقسى ارالاسۋ ءۇشىن مولدانازاردى اڭگىمەگە شاقىرىپ، مازاسىن الماۋى كەرەك. جالپى ەشكىم تيىسپەگەنىن قالايدى.

nur.kz