ءوتىپ بارا جاتقان اپتادا ەلىمىزدىڭ جەرگىلىكتى اتقارۋشى ورگاندارىندا بىرقاتار كادرلىق اۋىس-ءتۇيىس ورىن الدى.

الماتى وبلىسىنىڭ اكىمى اماندىق باتالوۆتىڭ وكىمىمەن الماتى وبلىسىنىڭ قارجى باسقارماسىنىڭ جاڭا باسشىسى بولىپ ساتباەۆ بولات تەمىرحانۇلى تاعايىندالدى.

ول 1963 جىلى تۋعان. الماتى حالىق شارۋاشىلىعى ينستيتۋتى مەن اباي اتىنداعى الماتى مەملەكەتتىك ۋنيۆەرسيتەتىن تامامداعان. ماماندىعى – زاڭگەر، ەكونوميست.

ماڭعىستاۋ وبلىسىنىڭ اكىمى اليك ايدارباەۆتىڭ وكىمىمەن وبلىستىڭ ءبىلىم باسقارماسىنىڭ، كاسىپكەرلىك جانە ساۋدا باسقارماسىنىڭ جانە تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىلارى تاعايىندالدى.

اتاپ ايتقاندا، ماڭعىستاۋ وبلىسىنىڭ ءبىلىم باسقارماسىنىڭ باسشىسى بولىپ تاستەمىروۆا زەينەپ جۇماعاليقىزى قىزمەتىنە كىرىستى.

1990-2007 جىلدارى – ماڭعىستاۋ وبلىسىنىڭ مەكتەپتەرىندە مۇعالىم، ديرەكتوردىڭ تاربيە ءىسى جونىندەگى ورىنباسارى قىزمەتتەرىندە بولعان. 2007-2011 جىلدارى – مۇنايلى اۋداندىق ىشكى ساياسات ءبولىمىنىڭ، مۇنايلى اۋداندىق ءبىلىم ءبولىمىنىڭ باستىعى قىزمەتتەرىن اتقارعان. 2011 جىلدان باستاپ قازىرگى ۋاقىتقا دەيىن ماڭعىستاۋ وبلىسى ءبىلىم باسقارماسى باسشىسىنىڭ ورىنباسارى، باسقارما باسشىسىنىڭ مىندەتىن اتقارۋشىسى بولدى.

ال ماڭعىستاۋ وبلىسىنىڭ كاسىپكەرلىك جانە ساۋدا باسقارماسىنىڭ باسشىلىق قىزمەتىنە مۇستاپاەۆا ۆەنەرا تۇرانقىزى كەلدى. ول 1966 جىلى قىركۇيەك ايىندا دۇنيەگە كەلگەن. 1989 جىلى تاشكەنت قالاسىنداعى تەمىرجول كولىگى ينجەنەرلەرى ينستيتۋتىن، 2002 جىلى ورتالىق ازيا ۋنيۆەرسيتەتىن ەكونوميست-قارجىگەر ماماندىعى بويىنشا تامامداعان.

ماڭعىستاۋ وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى بولىپ ساعىنباەۆ سەرىك ورىنباسارۇلى تاعايىندالدى.

اتىراۋ وبلىسى ماقات اۋدانىنىڭ اكىمى بولىپ بەرىكقالي سارسەنعاليەۆ تاعايىندالدى.

«اتامەكەن» ۇكپ باسقارماسى مەن استانا قالالىق كاسىپكەرلەر پالاتاسى وڭىرلىك كەڭەسىنىڭ شەشىمىمەن ەلوردالىق كاسىپكەرلەر پالاتاسىن عاني تاسماعانبەتوۆ باسقاراتىن بولدى. ول 1981 جىلى اقتوبە قالاسىندا تۋعان. 2005 جىلى جاپونيانىڭ ناگانو قالاسىنداعى شينشۋ ۋنيۆەرسيتەتىن ءتامامدادى.

توكيوداعى حيتوتسۋباشي ۋنيۆەرسيتەتىن دە بىتىرگەن. قازاقستاندا قىزمەتىن 2007 جىلى ەكونوميكا جانە بيۋدجەتتىك جوسپارلاۋ مينيسترلىگىندە حالىقارالىق قاتىناستار دەپارتامەنتى حالىقارالىق ىنتىماقتاستىق جانە حالىقارالىق ۇيىمدارمەن ءوزارا ارەكەتتەستىك باسقارماسىنىڭ باسشىسى قىزمەتىنەن باستاعان. 2008-2009 جىلدارى پارلامەنت ماجىلىسىندە ەكونوميكالىق رەفورما جانە وڭىرلىك دامۋ كوميتەتىنىڭ كونسۋلتانتى قىزمەتىن اتقاردى. 2009-2012 جىلدارى ارالىعىندا پرەزيدەنت اكىمشىلىگىندە كونسۋلتانت-ساراپشىدان باستاپ ستراتەگيالىق زەرتتەۋلەر مەن تالداۋلار ورتالىعىنىڭ سەكتور مەڭگەرۋشىسى قىزمەتىنە دەيىنگى لاۋازىمداردى اتقاردى.

2012 جىلى اقتوبە قالاسى اكىمىنىڭ ورىنباسارى، سوسىن اقتوبە وبلىسى ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى بولدى. ال 2013 جىلدان باستاپ بۇگىنگە دەيىن استانا قالاسى كاسىپكەرلەر پالاتاسى ديرەكتورىنىڭ ەكونوميكالىق ماسەلەلەر جونىندەگى ديرەكتور ورىنباسارى قىزمەتىن اتقارىپ كەلدى.

ايتا كەتەرلىگى، بۇعان دەيىن استانا قالاسىنداعى كاسىپكەرلەر پالاتاسىن باسقارىپ كەلگەن مەيىربەك ءماجيتوۆ «اتامەكەن» ۇكپ سىرتقى ساۋدا باسقارماسىنىڭ توراعاسى قىزمەتىنە تاعايىندالعان ەدى.

inform.kz