سۋديا ەربول راحىمبەكوۆ وقىعان ۇكىمدى ەستىگەن ساتتە سوت زالىندا سوتتالۋشىلاردىڭ تۋىستارى داۋىستاپ جىلاي باستادى. سوتتان شىققان ايەلدەر ايقايلاپ، كەيبىرى ۆيدەوكامەراعا تۇسىرمەۋدى تالاپ ەتىپ، سومكەلەرىن سەرمەي جۋرناليستەردى قۋالاپ، قارعىس جاۋدىردى. سوتتالۋشىلاردىڭ تۋىستارى «ۇكىم – ادىلەتتى ەمەس» دەپ سانايدى.

استانانىڭ مامانداندىرىلعان اۋدانارالىق قىلمىستىق سوتى جەرگىلىكتى ءىرى كاسىپكەر قايرات جاماليەۆتى «ادامدى زاڭسىز باس ەركىنەن ايىرىپ»، «اسا ءىرى كولەمدە اقشا بوپسالاعان» جانە 24 جاستاعى تۇرعىنى ءالىبي جۇماعۇلوۆقا قاتىستى «كۇش قولدانۋ ارقىلى جىنىستىق سيپاتتاعى زورلىق ارەكەتتەر جاساعان» دەپ تانىدى. سوت كاسىپكەردىڭ بۇكىل دۇنيە-مۇلكىن تاركىلەپ، ءوزىن 13 جىلعا قاتاڭ رەجيمدەگى كولونياعا قاماۋ تۋرالى ۇكىم شىعاردى.

سوتتالۋشىنىڭ ادۆوكاتى ءسالىمجان مۋسين ازاتتىق تىلشىسىنە «مۇنشالىقتى قاتال ۇكىمنەن ابدىراپ قالعانىن» ايتتى.

– مەنىڭشە، بۇل – ادام سەنگىسىز قاتال ۇكىم. قىلمىسىنا قاراي ءادىل جازا كەسپەدى. ءوزىم دە داعدارىپ قالدىم، – دەيدى ءسالىمجان مۋسين.

قايرات جاماليەۆتىڭ ايەلى الەنا جاماليەۆا سوت ۇكىمىن تىڭداپ تۇر. استانا، 7 تامىز 2015 جىل.

قايرات جاماليەۆتىڭ ايەلى الەنا جاماليەۆا ۇكىمدى تولىق وقىپ، تانىسىپ شىققان سوڭ عانا جان-جاقتى كوممەنتاري بەرۋگە ءازىر ەكەنىن ايتتى.

سوت پروتسەسىنە كاسىپكەردىڭ زاڭدى ايەلىنەن بولەك، ءوزىن «قايرات جاماليەۆتىڭ ازاماتتىق نەكەدەگى جۇبايىمىن» دەپ اتاعان اينۇر يسينا دا قاتىستى. سوت ماتەريالدارىندا بۇل كەلىنشەكتىڭ اتى-ءجونى اتالادى.

– 2015 جىلى ءساۋىردىڭ 3-ءى كۇنى سوتتالۋشى جاماليەۆكە ازاماتتىق نەكەدەگى زايىبى يسينا مەن جۇماعۇلوۆتىڭ تانىستىعى ءمالىم بولعان. «ەكەۋىنىڭ اراسىندا جىنىستىق بايلانىس بار» دەگەن كۇدىگى ويانعان جاماليەۆ قىزعانىشتان جۇماعۇلوۆقا وشىككەن، – دەيدى سۋديا ەربول راحىمبەكوۆ.

جابىرلەنۋشى تاراپتىڭ ادۆوكاتى، سوتتا ءالىبي جۇماعۇلوۆتىڭ مۇددەسىن قورعاعان اناتولي ۋتبانوۆ ازاتتىققا «ۇكىمگە قاتىستى شاعىمدانبايتىن شىعارمىز» دەدى.

جابىرلەنۋشى ءالىبي جۇماعۇلوۆ سوت ۇكىمىن تىڭداپ تۇر. استانا، 7 تامىز 2015 جىل.

استانانىڭ 24 جاستاعى تۇرعىنى، جابىرلەنۋشى ءالىبي جۇماعۇلوۆ ۇكىمگە قاتىستى ەشقانداي پىكىر بىلدىرمەدى. «ۇرىپ-سوعۋ كەزىندە قۇلاعى كەسىلگەنى راس پا؟» ء(اۋ باستا بۇل اقپاراتتى جابىرلەنۋشىنىڭ اكەسى الەۋمەتتىك جەلىلەردە تاراتقان) دەگەن سۇراققا ادۆوكاتى ۋتبانوۆ «كوممەنتاري بەرمەيمىز» دەپ قىسقا قايىردى.

سوتقا جاماليەۆتەن بولەك تاعى ەكى ادام تارتىلعان. كاسىپكەردىڭ كومەكشىسى رەتىندە بەلگىلى ارمان ابىلتاەۆقا دا قايرات جاماليەۆتىكىمەن بىردەي ايىپتار تاعىلعان. ونىڭ دا مۇلكى تاركىلەنىپ، ءوزى 12 جىلعا سوتتالدى. بيزنەسمەننىڭ كولىك جۇرگىزۋشىسى اناتولي پريبىتكوۆ «اقشا بوپسالاۋ» جانە «ادامدى زاڭسىز ەركىنەن ايىرۋ» باپتارى بويىنشا سەگىز جىلعا سوتتالىپ، دۇنيە- مۇلكى تاركىلەنەتىن بولدى. سوت پروتسەسى كەزىندە سوتتالۋشىلار وزدەرىنە تاعىلعان ايىپتاردى جوققا شىعارعان.

استانالىق نۇرلان جۇماعۇلوۆ 24 جاستاعى ۇلىنىڭ اياۋسىز سوققىعا جىعىلعانى جونىندە Facebook الەۋمەتتىك جەلىسىندە مالىمدەمە جاريالاپ، جۇرتتان كومەك سۇراعاننان كەيىن بۇل ءىس قوعامدا ۇلكەن رەزونانس تۋدىرىپ، قازاقستاندىق قولدانۋشىلار الەۋمەتتىك جەلىلەردە قىزۋ تالقىلاعان.

ءالىبي جۇماعۇلوۆتىڭ سوققىعا جىعىلۋىنا قاتىستى ءىستى قاراعان سوت ۇكىم شىعارىپ تۇر. استانا، 7 تامىز 2015 جىل.

نۇرلان جۇماعۇلوۆ بالاسى ءالىبي جۇماعۇلوۆتى استانادا تۇراتىن بەلگىلى بيزنەسمەن قايرات جاماليەۆ سوققىعا جىققان دەپ جازعان. الەۋمەتتىك جەلىدەگى جازبا جۇرتتىڭ نارازى پىكىرىنە ۇلاسىپ، جەلى قولدانۋشىلارى ءالىبي جۇماعۇلوۆتى ەمدەتۋگە اقشا جيناعان (كەيىن جينالعان اقشا قايىرىمدىلىق قورىنا اۋدارىلعانى حابارلانعان). ىشكى ىستەر مينيسترلىگى «ءالىبي ءىسىن» ءمينيستردىڭ «ءوزى باقىلاۋعا العانىن» حابارلاعان. بۇل وقيعا قوعام نازارىنا ىلىگىپ، قىزۋ تالقىعا ءتۇسىپ جاتقاندا پوليتسيا قايرات جاماليەۆ پەن اناتولي پريبىتكوۆتى بىردەن ۇستاپ، كەيىن قاماۋعا العان. ال ىزدەۋ جاريالانعان ارمان ابىلتاەۆ كەيىن ۇستالىپ، ول دا اباقتىعا قامالعان.

«ىسكە قاتىسى بار تۇلعالاردىڭ جىنىستىق ءومىرى جايلى اقپاراتتىڭ جاريا بولىپ كەتۋىنە جول بەرمەۋ ماقساتىندا» سوت بۇل ءىستى جابىق ەسىك جاعدايىندا قارادى. باق وكىلدەرىن سوت زالىنا بۇگىن – ۇكىم جاريالانعاندا عانا كىرگىزدى.

سۆەتلانا گلۋشكوۆا

ازاتتىق راديوسى

«ءالىبي ءىسى» بويىنشا سوت ۇكىمى تۋرالى ازاتتىق ۆيدەوسى: