كوشى-قون جايى قارالدى
kerey.kz
پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى ن.ەرمەكباەۆتىڭ توراعالىعىمەن قاۋىپسىزدىك كەڭەسى جانىنداعى ساراپتامالىق كەڭەستىڭ «قازاقستان رەسپۋبليكاسىنىڭ كوشى-قون جانە دەموگرافيا ساياساتى» تاقىرىبىنا ارنالعان وتىرىسى ءوتتى.
وتىرىسقا دەنساۋلىق ساقتاۋ جانە الەۋمەتتىك دامۋ مينيسترى ت.دۇيسەنوۆا، پرەزيدەنت اكىمشىلىگىنىڭ قۇرىلىمدىق ءبولىمشەلەرىنىڭ جانە ورتالىق مەملەكەتتىك ورگانداردىڭ، قازاقستاننىڭ عىلىمي-زەرتتەۋ ينستيتۋتتارىنىڭ باسشىلارى، سونداي-اق، ۇكىمەتتىك ەمەس ۇيىمداردىڭ ساراپشىلارى قاتىستى.
شارا بارىسىندا سىرتقى جانە ىشكى كوشى-قون، دەموگرافيالىق ساياسات قازاقستاننىڭ تۇراقتى دامۋىنىڭ ماڭىزدى فاكتورلارى ەكەندىگى اتاپ ءوتىلدى. قاتىسۋشىلار قازاقستاننىڭ كوشى-قون جانە دەموگرافيا ساياساتىن قالىپتاستىرۋ مەن ونى ىسكە اسىرۋدىڭ ءتيىمدىلىگىن ارتتىرۋعا عىلىمي، ساراپتامالىق قولداۋ كورسەتۋ ماسەلەلەرىن ەگجەي-تەگجەيلى تالقىلادى.
مەملەكەتىمىزدىڭ ەكونوميكالىق دامۋىن ەسكەرە وتىرىپ، سىرتقى ەڭبەك كوشى-قونىن رەتتەۋ، ىشكى كوشى-قوندى وڭتايلاندىرۋ ءجونىندە ارنايى ۇسىنىستار ەنگىزىلدى.
جۇمىس قورىتىندىسى بويىنشا ساراپتامالىق كەڭەس تاراپىنان قاۋىپسىزدىك كەڭەسى مەن مەملەكەتتىك ورگاندار جۇمىسىندا پايدالانىلاتىن ناقتى ۇسىنىستار بەرىلدى.
«ەگەمەن-اقپارات».
پىكىر قالدىرۋ