Qazaq Air اۋە كومپانياسى رەيستەرىندەگى بيلەتتەردىڭ باعاسى بەلگىلى بولدى، – دەپ حابارلايدى Tengrinews.kz ءتىلشىسى.

اۋە كومپانياسى ءباسپاسوز قىزمەتىنىڭ مالىمەتىنشە، الماتى – استانا باعىتىنداعى العاشقى رەيس 2015 جىلدىڭ 27 تامىزىندا ۇشىرىلادى. ۇشاقتار كەلەسى باعىتتار بويىنشا ۇشادى: الماتى – استانا – كۇندەلىكتى، بيلەت قۇنى ءبىر باعىتقا 10495 تەڭگە; الماتى – پاۆلودار – اپتاسىنا 3 رەيس (دۇيسەنبى، سارسەنبى، جۇما), بيلەت قۇنى ءبىر باعىتقا 10916 تەڭگە; الماتى – شىمكەنت – اپتاسىنا 4 رەيس (دۇيسەنبى، سەيسەنبى، سەنبى، جەكسەنبى، بيلەت قۇنى ءبىر باعىتقا 10495 تەڭگە; شىمكەنت – پاۆلودار – اپتاسىنا 2 رەيس (سەيسەنبى، جەكسەنبى), بيلەت قۇنى ءبىر باعىتقا 14857 تەڭگە; شىمكەنت – قىزىلوردا – اپتاسىنا 2 رەيس (دۇيسەنبى، سەنبى، بيلەت قۇنى ءبىر باعىتقا 8556 تەڭگە.

2015 جىلدىڭ 14 تامىزىنان باستاپ Qazaq Air اۋە كومپانياسى www.flyqazaq.com سايتى، كەڭسەلەرى مەن اۋە اگەنتتىكتەرى ارقىلى بيلەتتەردى ساتا باستايدى.

قازىر اۋە كومپانياسىنىڭ فلوتىندا Bombardier Q400 NextGen تۋربينالى-ءۆينتتى ەكى ۇشاعى بار، ءۇشىنشىسى تامىزدىڭ سوڭىنا دەيىن كەلەدى دەپ كۇتىلىپ وتىر.

كومپانيا كەلەسى رەيستەر بويىنشا باعىتتار سانىن كوبەيتۋدى جوسپارلادى: الماتى – قوستاناي; شىمكەنت – اقتوبە; اقتوبە – قوستاناي; اقتوبە – اتىراۋ.

Qazaq Air اۋە كومپانياسىنىڭ تانىستىرىلىمى 6 شىلدەدە ءوتتى. دەگەنمەن العاشقى رەيس رۇقسات ەتىلگەنى تۋرالى قۇجاتتاردىڭ بولماۋىنان كەيىنگە قالدىرىلدى. 6 تامىزدا كومپانيا اۋە تاسىمالىنا رۇقسات ەتەتىن سەرتيفيكاتتى الدى.

tengrinews.kz