عارىش كەمەسىن تىركەگەن «سويۋز-فگ» زىمىران تاسىعىشى بايقوڭىر عارىش ايلاعىنىڭ «گاگارين ستارتىنان» (1-الاڭى) استانا ۋاقىتى بويىنشا ساعات 10:37-دە ۇشىرىلدى.

«روسكوسموس» اگەنتتىگى بۇعان دەيىن «سويۋز تما-18م» عارىش كەمەسى ەكيپاجى قۇرامىندا ايدىن ايىمبەتوۆپەن بىرگە رەسەيلىك عارىشكەر سەرگەي ۆولكوۆ جانە ەۋروپا عارىش اگەنتتىگىنىڭ استروناۆتى، دانيالىق اندرەاس موگەنسەن بارىن حابارلاعان. عارىشكەرلەر حالىقارالىق عارىش ستانتسياسىندا بىرنەشە كۇن بولىپ، ايىمبەتوۆ پەن موگەنسەن قىركۇيەكتىڭ 12-ءسى كۇنى جەرگە ورالادى. ايىمبەتوۆ پەن موگەنسون عارىشقا ءبىرىنشى رەت ۇشىپ وتىر. «روسكوسموستىڭ» مالىمدەۋىنشە، «گاگارين ستارتىنان» وسىمەن 500 مارتە عارىش كەمەسى ۇشىرىلعان.

بۇعان دەيىن «قازعارىش» ۇلتتىق عارىش كوميتەتى توراعاسىنىڭ ورىنباسارى ەركىن شايماعامبەتوۆ ازاتتىققا ايدىن ايىمبەتوۆتىڭ ساپارىنىڭ شىعىنى 20 ميلليون اقش دوللارىن قۇرايتىنىن جانە ونى قازاقستان 2016 جىلعا دەيىن تولەيتىنىن حابارلاعان.

ايدىن ايىمبەتوۆ قارجىلىق سەبەپتەرمەن عارىشقا ساپار شەگۋدەن باس تارتقان اعىلشىن ءانشىسى سارا برايتماننىڭ ورنىنا ۇشىرىلدى. ءانشىنىڭ اۋەلگى شىعىن كولەمى شامامەن 50 ميلليون دوللار دەپ جوسپارلانعان.

«قازعارىش» ايىمبەتوۆتىڭ بورتينجەنەر رەتىندە ۇشاتىنىن، عارىشتا ارال تەڭىزىنىڭ لاستانۋىن، كاسپي تەڭىزىنىڭ مۇناي ءوندىرىسى كەزىندەگى لاستانۋىن زەرتتەيتىنىن مالىمدەگەن. ايىمبەتوۆ بۇعان قوسا عارىشتا استانادا وتەتىن ەحرو مەن قازاق حاندىعىنىڭ 550 جىلدىعىنا ارنالعان فيلمگە ارناپ ۆيدەوجولداۋ دا تۇسىرمەك.

«سويۋز تما-18م» عارىش كەمەسى ەكيپاجىنىڭ مۇشەلەرى (سولدان وڭعا): قازاقستاندىق ايدىن ايىمبەتوۆ، رەسەيلىك سەرگەي ۆولكوۆ جانە دانيالىق اندرەاس موگەنسەن. بايقوڭىر، 2 قىركۇيەك 2015 جىل.

سەرگەي ۆولكوۆ قىركۇيەكتىڭ 1-ءى كۇنى وتكەن ءباسپاسوز جيىنىندا عارىشكەرلەر ەۋروپا، قازاقستان جانە رەسەيدىڭ بارلىعى 75 عىلىمي باعدارلاماسى بويىنشا جۇمىس ىستەيتىنىن ايتقان.

«ءبىز ستانتسيادا جۇرگىزىلىپ جاتقان زەرتتەۋلەرمەن دە اينالىسامىز. ماعان فيزيولوگيا بويىنشا جۇرگىزەتىن زەرتتەۋلەرىم كوبىرەك قىزىقتى. ال موگەنسونمەن ميكروگراۆيتاتسيا جاعدايىنداعى بۇلشىقەت اتروفياسىن زەرتتەيمىز» دەگەن ۆولكوۆ.

عارىشقا ۇشۋدان ءۇمىتتى ەكى قازاقستاندىق – ايدىن ايىمبەتوۆ پەنمۇحتار ايماحانوۆ 2007 جىلى رەسەيدىڭ يۋري گاگارين اتىنداعى عارىشكەرلەر دايىنداۋ ورتالىعىندا دايىندىعىن اياقتاعان. ەكەۋىنىڭ ءبىرى 2009 جىلى كۇزدە حالىقارالىق ەكيپاج قۇرامىندا عارىشقا ۇشۋعا ءتيىس ەدى. بىراق قازاقستان جاعى قارجى تاپشىلىعىنا بايلانىستى عارىشكەر ۇشىرۋدى كەيىنگە قالدىرعان. وسى ارالىقتا مۇحتار ايماحانوۆ رەسەي ازاماتتىعىن الىپ، سول ەلدىڭ عارىشكەرلەر قۇرامىنا ەنگەن ەدى.

ايدىن ايىمبەتوۆ – تاۋەلسىز قازاقستاننىڭ اتىنان عارىشقا ۇشىرىلعان العاشقى عارىشكەر. بۇعان دەيىن «قازاقستاننان شىققان تۇڭعىش عارىشكەرلەر» دەپ سيپاتتالىپ كەلگەن توقتار اۋباكىروۆ 1991 جىلى سسسر ازاماتى ءھام رەسەيلىك مامان رەتىندە، ال تالعات مۇساباەۆ 1994, 1998 جانە 2001 جىلدارى رەسەي ازاماتى رەتىندە عارىشقا ۇشقان ەدى. «رەسەي باتىرى» (1994 جىل) ءارى «قازاقستان حالىق قاھارمانى» (1995 جىل) تالعات مۇساباەۆ 2007 جىلى عانا قازاقستان ازاماتتىعىن العان سوڭ ەلدىڭ اەروعارىش كوميتەتىنىڭ توراعاسى بولىپ تاعايىندالعان.

ازاتتىق راديوسى