Ğarış kemesin tirkegen «Soyuz-FG» zımıran tasığışı Bayqoñır ğarış aylağınıñ «Gagarin startınan» (1-alañı) Astana uaqıtı boyınşa sağat 10:37-de wşırıldı.

«Roskosmos» agenttigi bwğan deyin «Soyuz TMA-18M» ğarış kemesi ekipajı qwramında Aydın Ayımbetovpen birge reseylik ğarışker Sergey Volkov jäne Europa ğarış agenttiginiñ astronavtı, daniyalıq Andreas Mogensen barın habarlağan. Ğarışkerler halıqaralıq ğarış stanciyasında birneşe kün bolıp, Ayımbetov pen Mogensen qırküyektiñ 12-si küni Jerge oraladı. Ayımbetov pen Mogenson ğarışqa birinşi ret wşıp otır. «Roskosmostıñ» mälimdeuinşe, «Gagarin startınan» osımen 500 märte ğarış kemesi wşırılğan.

Bwğan deyin «Qazğarış» wlttıq ğarış komiteti törağasınıñ orınbasarı Erkin Şaymağambetov Azattıqqa Aydın Ayımbetovtiñ saparınıñ şığını 20 million AQŞ dolların qwraytının jäne onı Qazaqstan 2016 jılğa deyin töleytinin habarlağan.

Aydın Ayımbetov qarjılıq sebeptermen ğarışqa sapar şeguden bas tartqan ağılşın änşisi Sara Braytmannıñ ornına wşırıldı. Änşiniñ äuelgi şığın kölemi şamamen 50 million dollar dep josparlanğan.

«Qazğarış» Ayımbetovtiñ bortinjener retinde wşatının, ğarışta Aral teñiziniñ lastanuın, Kaspiy teñiziniñ mwnay öndirisi kezindegi lastanuın zertteytinin mälimdegen. Ayımbetov bwğan qosa ğarışta Astanada ötetin EHRO men Qazaq handığınıñ 550 jıldığına arnalğan fil'mge arnap videojoldau da tüsirmek.

«Soyuz TMA-18M» ğarış kemesi ekipajınıñ müşeleri (soldan oñğa): qazaqstandıq Aydın Ayımbetov, reseylik Sergey Volkov jäne daniyalıq Andreas Mogensen. Bayqoñır, 2 qırküyek 2015 jıl.

Sergey Volkov qırküyektiñ 1-i küni ötken baspasöz jiınında ğarışkerler Europa, Qazaqstan jäne Reseydiñ barlığı 75 ğılımi bağdarlaması boyınşa jwmıs isteytinin aytqan.

«Biz stanciyada jürgizilip jatqan zertteulermen de aynalısamız. Mağan fiziologiya boyınşa jürgizetin zertteulerim köbirek qızıqtı. Al Mogensonmen mikrogravitaciya jağdayındağı bwlşıqet atrofiyasın zertteymiz» degen Volkov.

Ğarışqa wşudan ümitti eki qazaqstandıq – Aydın Ayımbetov penMwhtar Aymahanov 2007 jılı Reseydiñ YUriy Gagarin atındağı ğarışkerler dayındau ortalığında dayındığın ayaqtağan. Ekeuiniñ biri 2009 jılı küzde halıqaralıq ekipaj qwramında ğarışqa wşuğa tiis edi. Biraq Qazaqstan jağı qarjı tapşılığına baylanıstı ğarışker wşırudı keyinge qaldırğan. Osı aralıqta Mwhtar Aymahanov Resey azamattığın alıp, sol eldiñ ğarışkerler qwramına engen edi.

Aydın Ayımbetov – täuelsiz Qazaqstannıñ atınan ğarışqa wşırılğan alğaşqı ğarışker. Bwğan deyin «Qazaqstannan şıqqan twñğış ğarışkerler» dep sipattalıp kelgen Toqtar Äubäkirov 1991 jılı SSSR azamatı häm reseylik maman retinde, al Talğat Mwsabaev 1994, 1998 jäne 2001 jıldarı Resey azamatı retinde ğarışqa wşqan edi. «Resey batırı» (1994 jıl) äri «Qazaqstan halıq qaharmanı» (1995 jıl) Talğat Mwsabaev 2007 jılı ğana Qazaqstan azamattığın alğan soñ eldiñ aeroğarış komitetiniñ törağası bolıp tağayındalğan.

Azattıq radiosı