ءتۇن تۇنەگىن تارقاتقان تۇسىنىگىڭ،
تىزەرلەتكەن قاسىڭدى كۇشىڭ – ءىلىم.
جۇمىر باستى پەندەدە كەمشىن جاتار،
سەنىڭ ەرەن وزگەدەن كىسىلىگىڭ.

كەربەز تىرلىك، كەشكەن ءور كەدىر-بۇدىر،
كەدەرگىدەن وتكەن ەر نەبىر كۇدىر.
جاي اعاشتار ونەدى جەر تالعاماي،
باي اعاشتار توسكە ونەر زەڭگىر شىمىر.

شەن دە شەكپەن الماسسىڭ ءازىر بۇگىن،
«پاراساتىڭ» پورتفەلدە، ءازىل بۇنىم.
ءبىر شىندىق شىن، جاقپايدى انا جاققا،
قارا قىلدى قاق جارعان ادىلدىگىڭ.

قارا جەردەي سالماقتى قاسيەتىڭ،
قاساڭ جۇرتىڭ جىعىلىپ باس يەتىن.
سەنىڭ بىرەۋ لاقتىرسا جولىڭا تاس،
تابادى ول اينالىپ باس يەسىن.

تاۋعا بالاپ توبەسىن كىشىگىرىم،
جەتكەندەر كوپ ساقتاعان ىشىنە ءىرىڭ.
قوزداپ تۇر-اۋ كەرنەۋلى قۋات-كۇشىڭ،
بوزداپ تۇر-اۋ بويداعى كىسىلىگىڭ.

قارامايسىڭ ەشكىمنىڭ بەك، تەگىنە،
جەم شاشۋمەن اۋرەسىڭ كەپتەرىڭە.
ويلاعانىڭ ۇرپاعىڭ، سەندەي كىم بار،
ون مىڭ كىتاپ سىيلاعان مەكتەبىنە.

جەتكىزە المان قانشا ارحيۆ قازعانىڭدى،
جانىڭدى ۇقتىم جاستانىپ جازعانىڭدى.
ارتىق بولار ءبىر ەلى باسقا جاننان،
ءتوزىم مەنەن تەرىڭنەن العان ۇلگى.

ىشتە تۇنىپ جاتىر-اۋ مۇڭ اداسىڭ،
جازعان سايىن جانىعىپ، شىڭالاسىڭ.
كاكىشۇلى تۇرسىنبەك – قازاق ءبيى،
ادىلدىكتىڭ تۇرعىزعان مۇناراسىن!
باقۇل بول، ارىسىم!