ۋكراينا پرەزيدەنتى پەتر پوروشەنكونىڭ قازاقستانعا رەسمي ساپارى اياسىندا كەڭەيتىلگەن قۇرامداعى كەلىسسوزدەر ءوتتى
kerey.kz
كەزدەسۋ بارىسىندا ەلباسى قازاقستان مەن ۋكراينانى دوستىق جانە ءوزارا قۇرمەتكە نەگىزدەلگەن تىعىز تاريحي قارىم-قاتىناستار بايلانىستىراتىنىنا توقتالدى. نۇرسۇلتان نازارباەۆ قازاقستاندا بۇگىندە تەگى ۋكراين 300 مىڭنان استام ازامات تۇرىپ جاتقانىنا، ولار ءبىزدىڭ قوعامنىڭ بولىنبەس بولشەگى رەتىندە ەلىمىزدىڭ دامۋىنا زور ۇلەس قوسىپ وتىرعانىنا نازار اۋداردى.مەملەكەت باسشىسى سونداي-اق مەيلىنشە وزەكتى ساياسي جانە ەكونوميكالىق ىنتىماقتاستىق ماسەلەلەرى تالقىلانعان شاعىن قۇرامداعى كەزدەسۋدىڭ ناتيجەلى بولعانىن ايتتى.
كوپتەگەن ماسەلەلەر جونىندە بىزدە تولىق تۇسىنىستىك بار. مەملەكەتارالىق كوميسسيانىڭ الداعى وتىرىسى بارىسىندا بارلىق نەگىزگى باعىتتار ەگجەي-تەگجەيلى پىسىقتالادى. بۇگىنگى بيزنەس فورۋم دا ىسكەر توپتارىمىزدىڭ اراسىنداعى ىنتىماقتاستىققا ءوز ۇلەسىن قوساتىن بولادى. قازىر وبەكتيۆتى سەبەپتەرگە بايلانىستى تاۋار اينالىمىنىڭ تومەندەگەنىنە قاراماستان، ءبىز ىنتىماقتاستىعىمىزدى بۇدان ءارى دە نىعايتا ءتۇسۋ ءۇشىن مۇمكىندىكتەر تاۋىپ وتىرمىز، – دەدى نۇرسۇلتان نازارباەۆ.
ۋكراينا پرەزيدەنتى ءوز كەزەگىندە تاريحي وقيعا – قازاق حاندىعىنىڭ 550 جىلدىعى مەرەكەلەنىپ جاتقان كەزدە ساپارلاپ كەلۋگە شاقىرعانى ءۇشىن نۇرسۇلتان نازارباەۆقا العىس ايتتى. پ.پوروشەنكو بۇگىن وتكەن كەلىسسوزدەر ساۋدا-ەكونوميكالىق، گۋمانيتارلىق جانە ساياسي سەرىكتەستىكتى جانداندىرۋعا سەپتىگىن تيگىزەتىنىنە دە سەنىم ءبىلدىردى.
– مەن سىزگە ەلدەرىمىزدىڭ اراسىنداعى سەنىمگە، ءوزارا قۇرمەتكە نەگىزدەلگەن ساياسي ديالوگتى دامىتۋعا دەگەن نيەتىڭىز ءۇشىن ريزامىن. ءبىز قازاقستان مەن ۋكراينا قارىم-قاتىناستارىنىڭ الەۋەتىن ىسكە اسىرۋعا ءتيىس ەكەنىمىزگە سەنىمدىمىن. قازاقستاننىڭ ىرگەلى حالىقارالىق قۇقىق قاعيداتتارىن بەرىك ۇستاناتىندىعى، سونداي-اق ءسىزدىڭ ەلدىڭ حالىقارالىق ۇيىمداردا جوعارى ءرول اتقارىپ وتىرعانى مەن ءۇشىن جانە بۇكىل ۋكراين حالقى ءۇشىن اسا ماڭىزدى، – دەپ اتاپ ءوتتى ۋكراينا پرەزيدەنتى.
اق وردا باسپا ءسوز قىزمەتى
پىكىر قالدىرۋ