وسكەمەندەگى س.امانجولوۆ اتىنداعى شقمۋ-دا حالىقارالىق «الاش» ادەبي سىيلىعىنىڭ لاۋرەاتى، قازاقستاننىڭ ەڭبەك سىڭىرگەن قايراتكەرى، جازۋشى، جەرلەسىمىز ديداحمەت ءاشىمحانۇلىنا ارنالعان «بۇگىنگى قازاق ادەبيەتى جانە ديداحمەت ءاشىمحانۇلى» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى. شاراعا وبلىس اكىمىنىڭ ورىنباسارى جاقسىلىق ومار قاتىستى. 
شارا بارىسىندا اتالمىش ءبىلىم ورداسىنىڭ №9 وقۋ عيماراتىندا ديداحمەت ءاشىمحانۇلى اتىنداعى ءباسپاسوز ورتالىعى اشىلدى.
– قاراپ وتىرساق، كاتونقاراعاي جەرىنەن جەزتاڭداي ءانشى، داۋلەسكەر كۇيشى شىقتى دەگەندى كوپ ەستىمەيمىز، ەسەسىنە ورالحان بوكەي، قاليحان ىسقاق، ديداحمەت ءاشىمحانۇلى، الىبەك اسقار سىندى كەرەمەت ءسوز زەرگەرلەرىن دۇنيەگە اكەلگەن كيەلى التىن بەسىك. جاستارعا ۇلگى-ونەگە بولارلىق وسىنداي شارانى ۇيىمداستىرىپ وتىرعان س.امانجولوۆ اتىنداعى شقمۋ-دىڭ ۇجىمىنا، وبلىستىق ءبىلىم باسقارماسىنا ۇلكەن راقمەت. وزدەرىڭىز جاقسى بىلەتىن ديداحمەت التايدىڭ مۇڭىن مۇڭداپ، ادەبيەتتىڭ جوعىن جوقتاپ جۇرەتىن ابزال اعا ەدى. قالامىنىڭ قارىمدى، تولىسقان شاعىندا ومىردەن ەرتە قايتسا دا، قازاق ادەبيەتىنە كوپ دۇنيە قالدىرا الدى. ديداعاڭ سونداي ۇلكەن جۇمىستاردى تىندىرىپ جۇرسە دە اعاعا دەگەن ءىلتيپاتى مەن ىنىگە دەگەن ىزەتىنەن ايىرىلمايتىن جىبەك مىنەزدى جان ەدى. قالىڭ ەلى، قازاعى باردا ول كىسى ماڭگى ولمەيدى، بۇگىنگى شارا ديداحمەت ءاشىمحانۇلىنىڭ ەكىنشى ءومىرىنىڭ باستالعانىن دالەلدەپ وتىر، – دەدى جاقسىلىق ومار.
كونفەرەنتسياعا استانادان ارنايى كەلگەن پرەزيدەنت جانىنداعى ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين جازۋشىنىڭ ەلدەن ەرەكشە تۇستارىن تىلگە تيەك ەتسە، تۇركىستان قالاسىنان كەلگەن ديداعاڭنىڭ سىرلاس-دوسى، ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ «تۇركولوگيا» عىلىمي-زەرتتەۋ ينستيتۋتىنىڭ ديرەكتورى قۇلبەك ەركوبەك «ۇلتتىق رۋح جارشىسى» اتتى بايانداما جاساپ، جان دوسى تۋرالى قۇندى ەستەلىكتەر ايتقاندا ءوزىنىڭ دە، تىڭدارماننىڭ دا جانارىنا ەرىكسىز جاس ءۇيىرىلدى. شاكەرىم اتىنداعى سمۋ-دىڭ قازاق ءتىلى جانە ادەبيەت كافەدراسىنىڭ دوتسەنتى ايمان اقتانوۆا «ديداحمەت ءاشىمحانۇلى – قازىرگى قازاق پروزاسىنىڭ كورنەكتى وكىلى» اتتى بايانداما جاساپ، قالامگەردىڭ شىعارمالارىنا كەڭىنەن توقتالىپ، تالداۋ جاساسا، جازۋشى الىبەك قاڭتارباەۆ بالا كۇندەرىنەن ەستەلىك ايتتى. س.امانجولوۆ اتىنداعى شقمۋ-دىڭ قازاق ءتىلى جانە ادەبيەت كافەدراسىنىڭ دوتسەنتى گاۋحار راحىمباەۆا «ديداحمەت ءاشىمحانۇلى شىعارمالارىنىڭ ۇلتتىق يدەياسى» تاقىرىبىندا بايانداما جاساپ، قالامگەردىڭ ەڭ سوڭعى جازعان «جىندى جەل» اتتى شىعارماسىنىڭ ەرەكشەلىكتەرىنە توقتالدى. جيىن سوڭىندا بۇل شارانى ءداستۇرلى تۇردە وتكىزىپ تۇرۋ قاجەتتىلىگى ايتىلدى. شارا ستۋدەنتتەردىڭ دايىنداعان جازۋشىنى ەسكە الۋعا ارنالعان ادەبي-سازدى كەشىمەن تۇيىندەلدى.

مۇراتحان كەنجەحانۇلى

didar-gazeti.kz