سول جولعى سوعىستا ءالى حان سايلانباعان ابىلاي سۇلتاننىڭ ءوزى باسقارعان ەكەن. قازاقتار الپامساداي ارقاۋىلدى كورىپ، قاتتى ساسادى. ابىلاي دا ، باسقالار دا قالماقتاردىڭ تۇپكى ويىن ءتۇسىنىپ تۇر. سوندا ابىلاي قولباسشى ءوزى اتىنان تۇسە قالىپ، شاپ ايىلىن تارتادى دا:
- مەن شىعايىن! – دەيدى. – قابەكەڭدى قايتكەندە دە جىبەرمەۋ كەرەك.
- ساعان بولمايدى، – دەپ، ءبارى وعان قارسى بولادى. سوندا ابىلاي:
- ەندەشە، اعالار، اتوي سالايىق! – دەپتى.
اتوي سالۋعا، ارينە، بولاتىن ەدى. بىراق ونىڭ نامىسقا تيەتىن جەرى بار. «قابانباي قورىققان سوڭ، قازاقتار جابىلىپ شاپتى»، – دەيدى جاۋ.
- قابانبايدى جىبەرمەۋ كەرەك، – دەپ، بوگەنباي دا مازالاندى.
- اجالىنا اسىعىپ تۇر ەكەن، ءوزىم-اق بارايىن، – دەيدى قابانباي مۇرتى تىكىرەيىپ.
- قابەكە! قويىڭىز! – دەپ، وعان ابىلاي تاعى جالىنادى.
- ناۋرىزباي شىقسىن، ناۋرىزباي! – دەگەن جۇرت اراسىنان ءسوز شىعادى. ويتكەنى ول دا ارقاۋىلداي اسا ءىرى بولعان.
- قابانباي، شىق بەرى! – دەپ، ارقاۋىل قازاقشا ايقايلاي باستايدى.
- مەن شىعايىن. ۇرىس ۇزاققا كەتەدى. قابەكەڭنىڭ شىداۋى قيىن بولادى، – دەيدى ناۋرىزباي تورى الا اتىنىڭ قۇيىسقانىن قىسقارتىپ، شاپ ايىلى مەن ءتوس ايىلىن قايتا تارتىپ.

بىراق قابانباي ەشكىمدى تىڭدامايدى. قوي قايىرۋعا كەتىپ بارا جاتقان ادامشا نايزاسىن كولدەنەڭ ۇستاپ ورتاعا بەتتەيدى. ەكىلەنىپ شاپپايدى دا، تەكىرەكتەپ جەلمەيدى دە، جايباراقات. ونى كورىپ، ارقاۋىل تۇرا شابادى. مەنمەن باتىردىڭ وڭتايلاپ كەلە جاتقان نايزاسىن قابانباي قىلىشپەن استىنان قاعىپ جىبەرىپ قاق ءبولىپ تاستايدى. ارقاۋىل قايتا بارىپ، تاعى ءبىر نايزا ۇستاپ قايتادى. بىراق بۇل جولى ول دا قىنابىنان قىلىشىنان سۋىرادى. قازاقتىڭ باتىر شالى نايزاسىن باقان قۇرلى كورمەگىنىنەن ول دا وي تۇيسە كەرەك. الايدا جاس باتىر قىلىشىنان سەرمەپ تە ۇلگەرمەيدى، قابانبايدىڭ نايزاسى يىعىنان ءتيىپ، اتىنان اۋىپ قالادى.

ارقاۋىل اتىنا قايتا مىنە بەرەم دەگەندە، قابانباي ونى نايزامەن قايتا سايىپ تۇسىرەدى. ەندى ول قابانبايعا جاياۋ ۇمتىلادى. قابانباي قالقانمەن قورعانىپ قالادى. ارقاۋىلدى ولتىرەيىن دەگەن ادامداي ەمەس، ونىمەن ويناپ جۇرگەندەي، شەگىندىرە-شەگىندىرە قالماق باتىرىن اتىنان الىستاتىپ اكەتەدى دە، ءبىر ءسات قابەكەڭ تاقىمىن قىسىپ قالعاندا، اسىتىنداعى قۋباس ات تىكەسىنەن تىكە سەكىرىپ ارقاۋىلدىڭ تاپ قاسىنا جەتىپ بارادى. كوز ىلەسپەس جىلدامدىقپەن قابانبايدىڭ الماس قىلىشى جارق ەتەدى. ارقاۋىلدىڭ باسى قاققا بولىنەدى.