شەتەل ۇكىمەتتەرى مەن مەملەكەتتەرى باسشىلارىنىڭ ۇلتتىق مەرەكە – قازاقستان رەسپۋبليكاسىنىڭ تاۋەلسىزدىك كۇنىنە بايلانىستى قۇتتىقتاۋلارى
kerey.kz
ۇلتتىق مەرەكەگە بايلانىستى مەملەكەت باسشىسىنىڭ اتىنا شەتەل ۇكىمەتتەرى مەن مەملەكەتتەرى باسشىلارىنان قۇتتىقتاۋلار كەلىپ ءتۇستى.
رەسەي فەدەراتسياسىنىڭ پرەزيدەنتى ۆ.پۋتين قازاقستان ارتاراپتاندىرىلعان قۋاتتى ەكونوميكاسى بار، دەموكراتيالى، كوپەتنوستى ەل رەتىندە تابىستى دامىپ كەلە جاتقانىن، حالىقارالىق ارەنادا لايىقتى بەدەلگە يە ەكەنىن، سونداي-اق حالىقارالىق كۇن تارتىبىندەگى وزەكتى ماسەلەلەردى شەشۋ ىسىنە ماڭىزدى ۇلەس قوسىپ وتىرعانىن اتاپ ءوتتى.
«قازاقستان مەن رەسەيدىڭ كوپعاسىرلىق ءداستۇرلى دوستىق پەن تاتۋ كورشىلىككە نەگىزدەلگەن بايلانىستارىنىڭ دەڭگەيى جوعارى ەكەنىن قاناعاتتانۋشىلىقپەن اتاپ وتەمىن. ەۋرازيالىق ەكونوميكالىق وداقتىڭ قارقىن الىپ كەلە جاتقان قىزمەتى ءوزارا ءتيىمدى ىنتىماقتاستىق ءۇشىن ءتۇرلى سالالاردا جاڭا پەرسپەكتيۆالارعا جول اشادى»، – دەدى ۆ.پۋتين.
سونداي-اق رەسەي پرەزيدەنتى قازاقستان مەن رەسەيدىڭ اراسىنداعى ستراتەگيالىق سەرىكتەستىك جانە وداقتاستىق قاتىناستار ەكى ەل مۇددەسى ءۇشىن ەۋرازيا كەڭىستىگىندەگى تۇراقتىلىق پەن قاۋىپسىزدىكتى قامتاماسىز ەتۋ باعىتىندا ودان ءارى نىعايا بەرەتىنىنە سەنىم بىلدىرگەن.
اقش پرەزيدەنتى ب.وباما ءوز قۇتتىقتاۋىندا قازاقستاننىڭ ەۋرازيا جۇرەگىندەگى زاماناۋي ەل بولا وتىرىپ، جاپپاي قىرىپ-جويۋ قارۋىن تاراتپاۋ ءىسىن ىلگەرىلەتۋدەن باستاپ، زورلىق-زومبىلىق سيپاتىنداعى ەكسترەميزمگە قارسى ءىس-قيمىل جاساۋعا دەيىنگى جاھاندىق سىن-قاتەرلەرگە قارسى تۇرۋدا ماڭىزدى ءرول اتقاراتىنىن ايتقان.
«قۇراما شتاتتار وركەندەۋ جانە دەموكراتيا جولىمەن ءجۇرىپ كەلە جاتقان قازاقستاننىڭ سەرىكتەسى بولىپ تابىلاتىنىن ماقتان تۇتادى. ءبىز الداعى جىلداردا دا تاۋەلسىزدىك كۇنى مەرەكەسىن سىزدەرمەن بىرگە قۋانىشپەن اتاپ وتەتىن بولامىز»، – دەلىنگەن حاتتا.
ريم پاپاسى فرانتسيسك نۇرسۇلتان نازارباەۆقا جانە بۇكىل قازاقستان حالقىنا باقىت پەن يگىلىك تىلەي وتىرىپ، جاراتۋشىدان ەلىمىزگە جاقسىلىق سۇرايتىنىن اتاپ وتكەن.
تاۋەلسىزدىك كۇنىنە بايلانىستى يگى تىلەكتەر ۇلىبريتانيا پاتشايىمى II ەليزاۆەتادان، جاپونيا يمپەراتورى اكيحيتودان، ساۋد ارابياسىنىڭ كورولى سالمان بەن ابدەل ءازيز ءال ساۋدتان، نيدەرلاند كورولى ۆيللەم-الەكساندردان، شۆەتسيا كورولى كارل XVI گۋستاۆتان جانە بەلگيا كورولى فيليپپتەن كەلدى. ولار دا ءوز قۇتتىقتاۋلارىندا قازاقستان حالقىنىڭ ودان ءارى دامىپ، وركەندەۋىنە تىلەكتەستىك بىلدىرگەن.
فرانتسۋز رەسپۋبليكاسىنىڭ پرەزيدەنتى ف.وللاند نۇرسۇلتان نازارباەۆتىڭ بيىلعى قاراشادا پاريجگە جاساعان ساپارى ەكىجاقتى قارىم-قاتىناستىڭ، اسىرەسە ساياسي ديالوگ پەن ءبىلىم بەرۋ مەكەمەلەرى اراسىنداعى ىنتىماقتاستىقتىڭ ساپاسى جوعارى ەكەنىنىڭ تاعى ءبىر ايعاعى بولعانىنا نازار اۋداردى.
فرانتسيا كوشباسشىسى ستراتەگيالىق سەرىكتەستىككە، ەكونوميكالىق قارىم-قاتىناستارعا، سونىڭ ىشىندە ەنەرگەتيكا، اەروناۆتيكا جانە كولىك سياقتى پەرسپەكتيۆالى سالالارعا سەرپىن بەرۋ ءۇشىن ىنتىماقتاستىقتى ۇدەتۋدىڭ جانە ءارتاراپتاندىرۋدىڭ ماڭىزدىلىعىن اتاپ وتكەن.
ف.وللاند زاماناۋي، وركەندەۋشى جانە الەمگە اشىق مەملەكەت قۇرۋ ىسىندە قازاقستان فرانتسيانىڭ قولداۋىنا سەنىم ارتا الاتىنىن ايتقان.
گەرمانيا فەدەراتيۆتىك رەسپۋبليكاسىنىڭ پرەزيدەنتى ي.گاۋك قازاقستاننىڭ تاۋەلسىزدىگىن العان ساتتەن باستاپ ەلەۋلى دامۋ جولىنان وتكەنىن، وسى كەزەڭدە ەكى ەلدىڭ قارىم-قاتىناسىنىڭ اياسى تۇراقتى تۇردە كەڭەيتىپ كەلە جاتقانىن اتاپ وتكەن.
يتاليا رەسپۋبليكاسىنىڭ پرەزيدەنتى س.ماتتارەللا ەكى ەل اراسىنداعى ءوزارا ءتيىمدى بايلانىستاردى، سونىڭ ىشىندە قازاقستان مەن ەۋروپالىق وداقتىڭ قارىم-قاتىناسىن ساياسي جانە ەكونوميكالىق سالالاردا ودان ءارى نىعايتۋ ءۇشىن جاڭا مۇمكىندىكتەر جاسالۋىنا تىلەكتەستىك ءبىلدىردى.
اۆستريا رەسپۋبليكاسىنىڭ فەدەرالدىق پرەزيدەنتى ح.فيشەر بەيبىتسۇيگىش سىرتقى ساياساتىن بەلسەندى ءارى سىندارلى تۇردە جۇرگىزىپ كەلە جاتقان قازاقستان اۆستريا مەن ەۋروپا ءۇشىن ورتالىق ازياداعى ماڭىزدى سەرىكتەس بولىپ سانالاتىنىن ايتتى. بۇل ەكىجاقتى بايلانىستارمەن قاتار ەۋروپالىق وداق پەن قازاقستان اراسىنداعى قارىم-قاتىناستاردان دا كورىنىپ وتىر.
سوڭىندا ح.فيشەر نۇرسۇلتان نازارباەۆقا باق-بەرەكە جانە قازاقستان حالقىنا جارقىن بولاشاق تىلەدى.
چەح رەسپۋبليكاسىنىڭ پرەزيدەنتى م.زەمان ەكى ەل اراسىنداعى ءداستۇرلى دوستىق قارىم-قاتىناستار ءوزارا مۇددەلىلىك بايقالاتىن بارلىق سالادا تەرەڭدەي بەرەتىنىنە سەنىم ءبىلدىردى. ول سونداي-اق قازاقستانعا بىلتىرعى ساپارى كەزىندە وزىنە كورسەتىلگەن ءىلتيپات پەن قۇرمەت ءۇشىن العىس ايتتى.
ۆەنگريا پرەزيدەنتى يا.ادەر قازاقستان تاۋەلسىزدىگىن العان ساتتەن باستاپ الەۋمەتتىك-ەكونوميكالىق دامۋ جولىندا تاماشا ناتيجەلەرگە جەتكەنىن جانە حالىقارالىق ارەنادا قۇرمەت-بەدەلگە يە بولعانىن ايتتى.
«ەكى ەلدىڭ قارىم-قاتىناسى سوڭعى جىلدارى ستراتەگيالىق دەڭگەيگە كوتەرىلگەنى قۋانتادى. ورتاق تاريحي جانە مادەني تامىرلارىمىز بايلانىستاردى ودان ءارى دامىتۋ ءۇشىن قولايلى جاعداي تۋعىزادى»، – دەلىنگەن قۇتتىقتاۋدا.
ءۇندىستان رەسپۋبليكاسىنىڭ پرەزيدەنتى پ.مۋكەردجي قازاقستان نۇرسۇلتان نازارباەۆتىڭ باسشىلىعىمەن بارلىق سالادا ايتارلىقتاي تابىسقا جەتكەنىن ايتقان.
«ەكى ەلدىڭ اراسىنداعى قارىم-قاتىناستار ستراتەگيالىق سەرىكتەستىك اياسىندا تۇراقتى دامىپ كەلەدى. ءۇندىستان پرەمەر-ءمينيسترىنىڭ قازاقستانعا بيىلعى شىلدەدەگى ساپارى ىنتىماقتاستىقتى ودان ءارى نىعايتۋ ءۇشىن جاڭا مۇمكىندىكتەر جاساۋعا ىقپال ەتتى. دوستىق قاتىناستار بولاشاقتا جاڭا بيىكتەرگە جەتەتىنىنە جانە ەكى ەل حالىقتارىنىڭ ءارى قاراي دامۋى مەن گۇلدەنۋىنە سەپتىگىن تيگىزەتىنىنە سەنىمدىمىن»، – دەلىنگەن قۇتتىقتاۋدا.
كورەيا رەسپۋبليكاسىنىڭ پرەزيدەنتى پاك كىن حە ەكى ەلدىڭ ستراتەگيالىق سەرىكتەستىگى بارلىق سالادا، سونىڭ ىشىندە ساياسات، ەكونوميكا، مادەنيەت سالالارىندا ۇدايى دامىپ كەلە جاتقانىن، بۇل حالىقتار اراسىنداعى ءوزارا تۇسىنىستىك پەن دوستىقتى نىعايتاتىنىن اتاپ ءوتتى.
سينگاپۋر رەسپۋبليكاسىنىڭ پرەزيدەنتى توني تان كەنگ يام قازاقستان حالقى نۇرسۇلتان نازارباەۆتىڭ باسشىلىعىمەن بەيبىتشىلىك، پروگرەسس جانە تۇراقتىلىق جاعدايىندا ءومىر ءسۇرىپ جاتقانىن ايتقان.
«قازاقستان بولاشاقتا دا وركەندەۋى مەن دامۋىن جالعاستىراتىنىنا سەنىمدىمىن. قازاقستان مەن سينگاپۋر اراسىندا جاقسى دوستىق قارىم-قاتىناستار ورنىققان. ءسىزدىڭ قولداۋىڭىزبەن ەكىجاقتى قارىم-قاتىناستار بۇدان ءارى دە نىعايىپ، دامي بەرەدى دەپ ۇمىتتەنەمىن»، – دەلىنگەن قۇتتىقتاۋدا.
بەلارۋس رەسپۋبليكاسىنىڭ پرەزيدەنتى ا.لۋكاشەنكو قازاقستان مەملەكەتتىلىكتى نىعايتۋ، قوعامدىق كەلىسىمدى قامتاماسىز ەتۋ، ءتيىمدى ەكونوميكا قۇرۋ، حالىقارالىق بەدەلدى كۇشەيتۋ جونىندەگى جەتىستىكتەرىن لايىقتى ماقتان ەتە الاتىنىنا نازار اۋدارعان.
«ءوزارا ۇدايى قولداۋمەن جانە بىرلەسكەن جۇمىستىڭ جوعارى ناتيجەسىمەن ەرەكشەلەنەتىن قازاقستان مەن بەلارۋس اراسىنداعى ستراتەگيالىق وداقتاستىق قارىم-قاتىناستار حالىقتارىمىزدىڭ يگىلىگى ءۇشىن بۇدان ءارى دە تەرەڭدەي بەرەتىنىنە سەنىمدىمىن»، – دەلىنگەن قۇتتىقتاۋدا.
ول سونداي-اق نۇرسۇلتان نازارباەۆقا مىقتى دەنساۋلىق، باقىت جانە جاۋاپتى مەملەكەتتىك لاۋازىمىندا تابىس، ال دوستاس قازاقستان حالقىنا بەيبىتشىلىك، يگىلىك جانە قۇت-بەرەكە تىلەدى.
قىرعىز رەسپۋبليكاسىنىڭ پرەزيدەنتى ا.اتامباەۆ تاۋەلسىزدىك جىلدارى ايتارلىقتاي تابىسقا قول جەتكىزگەن قازاقستان ءوزىنىڭ حالىقارالىق ارەناداعى بەدەلىن ارتتىرا وتىرىپ، قارقىندى دامىپ كەلە جاتقانىن ايتقان.
«ەلدەرىمىزدىڭ اراسىنداعى وداقتاستىق قارىم-قاتىناستار مەن ستراتەگيالىق سەرىكتەستىك بۇدان ءارى دە جۇيەلى تۇردە نىعايا بەرەتىنىنە سەنىمدىمىن»، – دەدى ا.اتامباەۆ.
وزبەكستان پرەزيدەنتى ي.كارىموۆ ەكى ەل اراسىنداعى ۋاقىت سىنىنان وتكەن، ءداستۇرلى تاتۋ كورشىلەستىك، بەرىك جانە سانعاسىرلىق دوستىق، ءوزارا سىيلاستىق قاعيداتتارىنا نەگىزدەلگەن كوپجوسپارلى قارىم-قاتىناستار قازاقستان مەن وزبەكستان حالىقتارىنىڭ مۇددەسى جولىندا، وڭىردەگى بەيبىتشىلىك پەن تۇراقتىلىقتى ساقتاۋ ءۇشىن الداعى كەزەڭدە دە تەرەڭدەي تۇسەتىنىنە سەنىم بىلدىرگەن.
ۋكراينا پرەزيدەنتى پ.پوروشەنكو قازاقستانداعى ءتيىمدى وزگەرىستەر مەن قۇرىلىمدىق رەفورمالاردى جۇزەگە اسىرۋدا ەلەۋلى ناتيجەلەرگە قول جەتكىزىلۋى مەملەكەتتىڭ حالىقارالىق ارەناداعى بەدەلىنىڭ جۇيەلى تۇردە نىعايۋىنا سەپتىگىن تيگىزىپ كەلە جاتقانىن ايتقان.
«ەلدەرىمىز اراسىنداعى ءداستۇرلى دوستىق قارىم-قاتىناس پەن ءوزارا تۇسىنىستىكتىڭ قول جەتكىزىلگەن دەڭگەيى – قازاقستان مەن ۋكراينا حالىقتارىنىڭ يگىلىگى جولىنداعى ەكىجاقتى ىنتىماقتاستىقتى تەرەڭدەتۋ ءۇشىن قاجەتتى بەرىك نەگىز»، – دەلىنگەن قۇتتىقتاۋدا.
ول مەملەكەتارالىق ديالوگتى ودان ءارى وربىتۋگە، ورتاق مۇددەنى بىلدىرەتىن سالالارداعى قارىم-قاتىناس قارقىنىن ۇدەتۋگە باعىتتالعان بىرلەسكەن كۇش-جىگەر قازاقستان-ۋكراينا سەرىكتەستىگىن جاڭا ساپالى دەڭگەيگە كوتەرۋگە سەپتىگىن تيگىزەتىنىنە سەنىم بىلدىرەدى.
ازەربايجان رەسپۋبليكاسىنىڭ پرەزيدەنتى ي.اليەۆ ەكى ەلدىڭ تامىرى تەرەڭدە جاتقان بايلانىستارى جان-جاقتى ءارى قارقىندى دامۋ جولىندا جالعاسۋدا ەكەنىن اتاپ وتكەن.
«ەلدەرىمىزدىڭ ۇدايى اياسى كەڭەيىپ كەلە جاتقان ساياسي، ەكونوميكالىق جانە مادەني قارىم-قاتىناستارى ستراتەگيالىق سەرىكتەستىك دەڭگەيىنە جەتتى. حالىقتارىمىزدىڭ ءوزارا سەنىمى مەن قولداۋىنا، ورتاق رۋحاني قۇندىلىقتارى مەن داستۇرلەرىنە نەگىزدەلگەن مەملەكەتارالىق بايلانىستارىمىز الداعى ۋاقىتتا دا دامىپ، نىعايا بەرەتىنىنە سەنىمدىمىن»، – دەدى ي.اليەۆ.
تۇرىكمەنستان پرەزيدەنتى گ.بەردىمۇحامەدوۆ قازاقستاننىڭ تاۋەلسىزدىك جىلدارى ساياسي، ەكونوميكالىق جانە الەۋمەتتىك سالالاردا قول جەتكىزگەن تابىستارىن، سونداي-اق ەلدەرىمىزدىڭ اراسىندا ستراتەگيالىق سەرىكتەستىك رۋحىندا قالىپتاسقان جان-جاقتى قارىم-قاتىناستاردىڭ جوعارى دەڭگەيىن اتاپ وتكەن. ول قازاقستان مەن تۇرىكمەنستاننىڭ ەكى ەل حالقىنىڭ يگىلىگى جولىندا ءوزارا ءتيىمدى ىنتىماقتاستىقتى ودان ءارى دامىتىپ، نىعايتۋى ءۇشىن بەرىك نەگىز بار ەكەنىنە سەنىم بىلدىرەدى.
تاجىكستان رەسپۋبليكاسىنىڭ پرەزيدەنتى ە.راحمون سوڭعى جىلدارى قول جەتكىزىلگەن قازاقستان-تاجىكستان سەرىكتەستىگىنىڭ دەڭگەيىنە جوعارى باعا بەرە كەلىپ، تەڭقۇقىقتىلىق، ءوزارا سىيلاستىق جانە ورتاق مۇددەنىڭ ەسكەرىلۋى قاعيداتتارىنا نەگىزدەلگەن ەكى ەل اراسىنداعى ءوزارا ءتيىمدى ىنتىماقتاستىقتى بارىنشا ارتتىرۋعا جانە ونىڭ اياسىن كەڭەيتۋ ءۇشىن قاجەتتى بارلىق كۇش-جىگەردى جۇمساۋ جونىندەگى شەشىمنىڭ ناقتى ەكەنى جونىندە مالىمدەيدى.
«ءبىز ءسىزدىڭ تاجىكستانعا تاياۋداعى رەسمي ساپارىڭىز بارىسىندا قول جەتكىزىلگەن ۋاعدالاستىقتاردى بىرلەسىپ جۇزەگە اسىرىپ، ەكى ەلدىڭ ءوزارا ءىس-قيمىلىنىڭ جولىمەن ودان ءارى ىلگەرىلەي الاتىنىمىزعا سەنىمدىمىن»، – دەلىنگەن حاتتا.
ەكىجاقتى قارىم-قاتىناستى ودان ءارى نىعايتۋعا ءازىر ەكەندىكتەرىنە سەندىرگەن جانە يگىلىك پەن باق-بەرەكە تىلەگەن قۇتتىقتاۋلارىن گرەك رەسپۋبليكاسىنىڭ پرەزيدەنتى پ.پاۆلوپۋلوس، سلوۆاك رەسپۋبليكاسىنىڭ پرەزيدەنتى ا.كيسكا، وڭتۇستىك افريكا رەسپۋبليكاسىنىڭ پرەزيدەنتى د.زۋما، يراك رەسپۋبليكاسىنىڭ پرەزيدەنتى ف.ماسۋم، ەفيوپيا فەدەراتيۆتىك دەموكراتيالىق رەسپۋبليكاسىنىڭ پرەزيدەنتى م.تەشومە، سونداي-اق كۋبا رەسپۋبليكاسى مەملەكەتتىك كەڭەسىنىڭ جانە مينيسترلەر كەڭەسىنىڭ توراعاسى ر.كاسترو، ليۆان رەسپۋبليكاسىنىڭ پرەمەر-ءمينيسترى ت.ساليام جولدادى.
اقوردا باسپا ءسوز قىزمەتى
پىكىر قالدىرۋ