تۇرعىن ءۇي قۇرىلىس جيناق بانكى «قولجەتىمدى باسپانا-2020» باعدارلاماسىنىڭ بالاماسىن جاساپ شىعاردى
kerey.kz
بانك سالىمشىلارىن 2022 جىلعا دەيىن قولجەتىمدى باسپانامەن قامتاماسىز ەتۋ ماقساتىندا «بايتەرەك» حولدينگىنىڭ ەنشىلەس كومپانياسى – «قازاقستاننىڭ تۇرعىن ءۇي قۇرىلىس جيناق بانكى» اق «ءوز ءۇيىم» اتتى داعدارىسقا قارسى باعدارلامانى دايىنداپ شىعاردى. باعدارلاما 3 باعىتتان تۇرادى: جەرگىلىكتى اتقارۋشى ورگانداردىڭ ءوزارا ارەكەتتەستىگى، مەملەكەتتىك-جەكە سەرىكتەستىك جانە ەكىنشى دەڭگەيلى بانكتەرمەن ىنتىماقتاستىق.
قازىرگى ۋاقىتتا جاو (جەرگىلىكتى اتقارۋشى ورگان), ەكىنشى دەڭگەيلى بانكتەر جانە قۇرىلىس كومپانيالارىمەن كەلىسسوزدەر جۇرگىزىلۋدە.
«ءوز ءۇيىم» باعدارلاماسىنىڭ نەگىزگى ارتىقشىلىقتارى – تۇرعىن ءۇي قۇرىلىس جيناق بانكى سالىمشىلارىنا تولىقتاي باسىمدىق بەرىلەدى، ءبىر شارشى مەترىنە تومەن باعا قاراستىرىلىپ، ۆاليۋتا باعامدارىنا تاۋەلسىز بولماق جانە ءۇي ساتىپ الۋ كەزىندە ەرەكشە تالاپتار قويىلمايدى. باعدارلاماعا بانكتىڭ كەز-كەلگەن كليەنتتەرى قاتىسا الادى، الايدا ءبىرىنشى بولىپ ءۇي ساتىپ الۋ قۇقىعىنا باسپاناسى جوق سالىمشىلار يە بولادى. اتالعان جوبانىڭ وڭىرلەردى دامىتۋدىڭ 2020 جىلعا دەيىنگى باعدارلاماسىنان ءبىر ايىرماشىلىعى – سالىمشىلاردىڭ الماتى جانە استانا قالالارىندا سوڭعى ەكى جىلدا تىركەۋدە تۇرۋى مىندەتتى ەمەس.
قازىرگى ۋاقىتتا باعدارلامانىڭ ءار شارشى مەترگە ورتاشا كورسەتكىشى 180 مىڭ تەڭگەنى قۇراپ وتىر. قارىز تولەمىنىڭ جىلدىق پايىزى 5-10% ارالىعىندا. 2016 جىلى باعدارلامانىڭ بارلىق باعىتى بويىنشا جاسالاتىن جۇمىس كولەمى 350 مىڭ شارشى مەتردى قۇراماق. «ءوز ءۇيىم» باعدارلاماسى اياسىندا بارلىعى 1,5 ملن. ش.م. ءۇي سالۋ جوسپارلانىپ وتىر.
اتالعان باعدارلاما وڭىرلەردى دامىتۋدىڭ 2020 جىلعا دەيىنگى باعدارلاماسىنا كەرەمەت قوسىمشا بولىپ تابىلادى. تۇرعىن ءۇي قۇرىلىس جيناق بانكى سالىمشىلارى وسى باعدارلاما ارقىلى باسپانانى قولجەتىمدى باعامەن ساتىپ الۋ مۇمكىندىگىنە قول جەتكىزبەك. «ءوز ءۇيىم» باعدارلاماسىنىڭ بىرەگەيلىگى – سالىمشىلار اشىق تۇردە داۋىس بەرۋ ارقىلى قۇرىلىس كومپانياسىن جانە باسپانا جوباسىن وزدەرى تاڭدايدى. باعدارلامانى بانك جەكە قاراجاتىنان قارجىلاندىرادى.
وسى جىلى «جاس وتباسىلارعا ارنالعان ۇيلەر» جانە «حالىقتىڭ بارلىق ساناتىنا ارنالعان ۇيلەر» باعىتى بويىنشا وڭىرلەردى دامىتۋدىڭ 2020 جىلعا دەيىنگى باعدارلاماسى اياسىندا 459 مىڭ شارشى مەتردى قۇرايتىن كەلىسىم جۇزەگە اسادى. مەملەكەتتىك باعدارلاما اياسىندا دا باعا تۇراقتى. ءبىر شارشى مەتر ءۇشىن وڭىرلەردە بەكىتىلگەن باعا 90-115 مىڭ تەڭگە بولسا، ال استانا مەن الماتى قالالارىندا 142,5 مىڭ تەڭگە بولماق.
پىكىر قالدىرۋ