نەتكەن ماعىناسىز، دويىر، تاسىراڭ تىرلىك.
kerey.kz
جانتالاسىپ اپتا سايىن اسكەري جاتتىعۋ وتكىزىپ، ۇگىت-ناسيحات قۇرالدارى “بەرلينگە نەشە كۇندە جەتەتىنىن ەسەپتەپ” جاتقان ەلگە قايران قالام. سالدىرلاعان تەحنيكاسى مەن سيقى كەتكەن ساربازدارىن ءبىر ساتكە كورمەگەنسىپ، “ال، جەتسىن سول بەرلينگە، سابەتتەن قالعان سوڭعى كۇشىن سارقىپ ورتالىق ەۋروپادان اسىپ بارىپ جىعىلسىن، ال. سوندا نە بولادى؟” دەپ سۇرايمىن ىشتەي وزىمنەن. جاڭاعى قيالي جوسپارلارى جۇزەگە اسقاننىڭ وزىندە بۇل ەل ارى قاراي ءوزى باسىپ العىسى كەلەتىن ايماققا نەندەي عىلىم-ءبىلىم، وركەنيەت، جاڭا تەحنولوگيا، ساپالى تۇرمىس، قۋاتتى زاڭ، ءتارتىپتى بيلىك اكەپ ورناتپاقشى؟ مۇنىڭ بىرەۋى ءوز بويىندا جوق. سوندا ەندى عانا تىرمىسىپ سوتسلاگەردەن شىعىپ، كوزى اشىلىپ، جەمقورلىقتان ارىلىپ، ەركىن الەممەن ەتەنە ارالاسۋعا ۇمتىلعان شاعىن جۇرتتارعا ارزان سولياركا بەرىپ تانكىسىن جۋعىزىپ قويا ما؟ نەتكەن ماعىناسىز، دويىر، تاسىراڭ تىرلىك. سابەتتىڭ كەزىندە بۇل تىرلىكتىڭ “دۇنيە ءجۇزىنىڭ پرولەتارياتىن وياتۋدى ماقسات تۇتقان لەنينشىل كوممۋنيزم” دەگەن جىلتىراق تەوريالىق وراۋى بار بولاتىن. قازىرگى پلۋتوكراتيالىق-اۆتوريتارلىق رەجيمىندە ول وراۋ دا جوق قوي. تۇيەنى تۇگىمەن جۇتاتىن جەمقور ءىش قۇرىلىسى شىنى استىنداعى مەحانيزم قۇساپ انىق كورىنىپ تۇر. ءاي، بىراق ونى جاڭاعى ۇگىت-ناسيحات قۇرالدارىنا يمانداي ۇيىعان جۇرت كورەر دەيمىسىز.
عالىم بوقاشتىڭ facebook پاراقشاسىنان الىندى
پىكىر قالدىرۋ