اقتوبە وبلىسىنىڭ اكىمى بەردىبەك ساپارباەۆ ايماقتاعى قايىرىمدىلىق شارالارعا ءۇشىنشى جىل قاتارىنان قاتىسىپ جۇرگەن وتاندىق ەسترادا جۇلدىزدارىن ماراپاتتادى.

اقتوبەدە وبلىس باسشىسىنىڭ قاتىسۋىمەن «ءبىز بىرگەمىز» اتتى الەۋمەتتىك ماڭىزدى اكتسيا ءوتتى. شارانى قالالىق سال اۋرۋىنا شالدىققان ازاماتتاردى قورعاۋ ۇيىمى مەن ونىڭ ءتورايىمى قۇرالاي بايمەنوۆا ۇيىمداستىردى. 16 جىل قاتارىنان وتكىزىلىپ كەلە جاتقان شاراعا مۇمكىندىگى شەكتەۋلى 150 ادام قاتىستى.

«اقتوبە وبلىسىندا مۇمكىندىگى شەكتەۋلى 23 مىڭ ادام تۇرادى. ولاردىڭ 2 مىڭى 16 جاسقا دەيىنگى بالالار. تاعدىردىڭ تاۋقىمەتىن تارتىپ جۇرگەن جاندارعا ءبىز كومەك كورسەتۋىمىز كەرەك. جىل سايىن وڭىردە وسى ماقساتتارعا ميلليارد تەڭگەنىڭ ۇستىندە قارجى بولىنەدى. ارينە، مەملەكەت مۇگەدەكتەردىڭ ماسەلەلەرىن تولىقتاي شەشىپ بەرە المايدى. بۇل ماسەلەدە ءبىز مەتسەناتتاردىڭ كومەگىنە جۇگىنەمىز»، – دەدى ايماق باسشىسى.

بەردىبەك ماشبەكۇلى 15 مۇگەدەك بالاعا «تاۋەلسىزدىكتىڭ قۇرداستارى» نوميناتسياسى بويىنشا العىس حاتتار مەن اقشالاي سىياقى تابىستادى. اكتسياعا ءۇشىنشى جىل قاتارىنان ات سالىسىپ جۇرگەن وتاندىق ەسترادا جۇلدىزدارى دا نازاردان تىس قالمادى. «مۋزارت»، «نۇر-مۇقاسان» توپتارى مەن بەلگىلى ءانشى اقىلبەك جەمەنەي دە اكىم قولىنان العىس حات الدى.