ەلباسىنىڭ توراعالىعىمەن قاۋىپسىزدىك كەڭەسىنىڭ وتىرىسى ءوتتى
kerey.kz
وتىرىستا قازاقستاننىڭ ۇلتتىق قاۋىپسىزدىك ستراتەگياسىنىڭ 2015 جىلعى جۇزەگە اسىرىلۋ بارىسى، سونداي-اق كوشى-قون ساياساتىن جۇرگىزۋ جايى قاراستىرىلدى.
نۇرسۇلتان نازارباەۆ مەملەكەت الەمدىك ەكونوميكالىق داعدارىستىڭ تەرىس ىقپالىنا قاراماستان، موينىنا العان الەۋمەتتىك مىندەتتەمەلەردى مۇلتىكسىز ورىنداپ، قورعانىس قابىلەتتىلىگىنىڭ، قاۋىپسىزدىكتىڭ جانە قۇقىق ءتارتىبىنىڭ قاجەتتى دەڭگەيىن ساقتاپ قالاتىنىن اتاپ ءوتتى.
قازاقستان پرەزيدەنتى ەكونوميكالىق ءوسىمنىڭ قارقىنىن باسەڭدەتەتىن جاھاندىق فاكتورلار ىقپالىن، كورشىلەس وڭىرلەردەگى ءدىني-ەكسترەميستىك جانە تەررورلىق سيپاتتاعى قاتەرلەردىڭ ارتا ءتۇسۋىن ەلەۋلى قاۋىپتەر مەن سىن-قاتەرلەر قاتارىندا اتادى.
مەملەكەت باسشىسى سونداي-اق قالىپتاسقان جاعدايدا داعدارىس قۇبىلىستارىنا لايىقتى تۇردە قارسى تۇرۋ ءۇشىن قازاقستان قوعامىن ۇيىستىرۋدىڭ ماڭىزدىلىعىن اتاپ ءوتتى.
پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى ن.ەرمەكباەۆ ءوز بايانداماسىندا مەملەكەتتىك ورگانداردىڭ 2015 جىلعى جۇمىس قورىتىندىلارىنا باعا بەرۋمەن قاتار، الداعى كەزەڭنىڭ باسىمدىقتارى مەن مىندەتتەرىنە نازار اۋداردى. ول سونداي-اق الەمدەگى ەكونوميكالىق احۋالدىڭ تۇراقسىزدىعى جاعدايىندا ۇكىمەت پەن جەرگىلىكتى اتقارۋشى ورگاندار ەكونوميكانى ءارتاراپتاندىرۋ جانە قازاقستاندىقتاردىڭ تۇرمىس دەڭگەيىن ساقتاۋ جونىندەگى شارالاردى جۇزەگە اسىرىپ جاتقانىن اتاپ ءوتتى.
ن.ەرمەكباەۆ قۇقىق قورعاۋ ورگاندارىنىڭ قىزمەتىن بۇدان ءارى جەتىلدىرۋ، ازاماتتاردىڭ قۇقىقتارىن قورعاۋ جانە قوعامدىق ءتارتىپتى ساقتاۋ باعىتىنداعى قادامدار تۋرالى اڭگىمەلەدى.
كۇن تارتىبىندەگى ەكىنشى ماسەلە بويىنشا دەنساۋلىق ساقتاۋ جانە الەۋمەتتىك دامۋ ءمينيسترى ت.دۇيسەنوۆا جانە ىشكى ىستەر ءمينيسترى ق.قاسىموۆ ءسوز سويلەدى. كوشى-قون ۇدەرىستەرىن رەتتەۋدىڭ ماڭىزدى ەكى ماقساتى بار ەكەنى اتاپ ءوتىلدى. ءبىر جاعىنان، ەكونوميكالىق ءوسىمدى ىنتالاندىرۋ ءۇشىن ەڭبەك رەسۋرستارىن، سونىڭ ىشىندە قايتا ورالعان قانداستارىمىزدى جانە جوعارى بىلىكتى شەتەلدىك ماماندار لەگىن ەل ىشىنە جۇيەلى تۇردە ورنالاستىرۋ قاجەت. ەكىنشى جاعىنان، قازاقستانعا حالىقارالىق تەررورلىق توپتاردىڭ يدەولوگتارى مەن ۇگىتشىلەرىنىڭ، قىلمىس الەمى وكىلدەرىنىڭ، زاڭسىز ميگرانتتاردىڭ كەلۋىنە جول بەرۋگە بولمايدى.
وتىرىس بارىسىندا ەلىمىزدە كونستيتۋتسيا بويىنشا قوس ازاماتتىقتىڭ مويىندالمايتىنىن، سوعان بايلانىستى مۇنداي جاعدايلارعا جول بەرمەۋ قاجەت ەكەنى اتاپ ءوتىلدى.
جەر تەلىمدەرىن وزدىگىمەن باسىپ الۋدىڭ، بەكىتىلگەن ەرەجەدەن تىس بەي-بەرەكەت قۇرىلىستاردىڭ جولى كەسىلۋى تيىستىگى دە ايتىلدى.
سونىمەن قاتار ءىس-شاراعا قاتىسۋشىلار ۇيىمداستىرىلعان ىشكى كوشى-قوننىڭ ماڭىزدىلىعىنا نازار اۋداردى. بۇل ازاماتتاردىڭ ەل اۋماعىندا ورنالاسۋداعى تەڭسىزدىگىن جويۋدى، سونداي-اق قازاقستاننىڭ الەۋمەتتىك-ەكونوميكالىق دامۋ ماقساتتارىنا جەتۋدى قامتاماسىز ەتەدى.
قازاقستان پرەزيدەنتى قاۋىپسىزدىك كەڭەسى وتىرىسىنىڭ قورىتىندىسى بويىنشا ۇكىمەتكە جانە مۇددەلى مەملەكەتتىك ورگاندارعا بىرقاتار تاپسىرما بەرىپ، ولاردىڭ ورىندالۋىن باقىلاۋدى قاۋىپسىزدىك كەڭەسى اپپاراتىنا جۇكتەدى.
اقوردا باسپا ءسوز قىزمەتى
پىكىر قالدىرۋ