“وڭاي” ەلەكتروندىق بيلەتتەۋ جۇيەسىندە ءبىر رەتتىك تولەم ەنگىزىلەدى، – دەپ حابارلايدى Tengrinews.kz تىلشىسى. بۇل تۋرالى باۋىرجان بايبەك ەسەپ بەرۋ كەزدەسۋىندە ايتتى.

ول جاقىندا ميلليونىنشى “وڭاي” كارتاسى ساتىلعانىن ايتتى. “كارتا بەس بالالى اناعا بۇيىردى. دەگەنمەن بىرنەشە كەمشىلىك تە بار. ءبىز ونى ۇنەمى باقىلاپ وتىرمىز”، – دەدى ول. قالا باسشىسىنىڭ ايتۋىنشا، نەگىزگى كەمشىلىكتەردىڭ قاتارىندا كارتا ساتىلاتىن پۋنكتتەردىڭ از بولۋى جانە ءبىر رەتتىك تولەمنىڭ بولماۋى بار.

“اقپاننان باستاپ بالانستى SMS-حابارلاما كومەگىمەن تولتىرۋ مۇمكىندىگى پايدا بولدى. جاقىن ارادا بارلىق قوعامدىق كولىكتى كارتاعا اقشا سالۋعا ارنالعان تەرمينالدارمەن جابدىقتاۋ جوسپارلانىپ وتىر. ءساۋىردىڭ سوڭىنا دەيىن ءبىر رەتتىك ەلەكتروندىق تولەم جۇيەسىن ەنگىزۋ كەرەك”، – دەدى اكىم. بايبەك ەرتەڭنەن باستاپ جول ءجۇرۋ بيلەتىنىڭ ساتىلا باستايتىنىن دا ايتتى. ء“بىز ەسەپتەدىك، ءبىر ايدا 15 000 تەڭگەگە دەيىن جۇرەتىندەر بار، ولارعا جول ءجۇرۋ بيلەتى 7200 تەڭگەدەن ساتىلادى”، – دەدى ول.

سونىمەن قاتار، اكىم 2016 جىلى جاڭادان 150 ايالداما تۇرعىزۋ جوسپارلانعانىن مالىمدەدى. ول اباي كوشەسىندەگى قوعامدىق كولىكتەرگە ارنالعان جولاقتىڭ ارقاسىندا اۆتوبۋسپەن جۇرەتىندەر سانىنىڭ 10 پايىزعا وسكەنىن دە جەتكىزدى. جىل سوڭىنا دەيىن ۇزىندىعى 100 شاقىرىم بولاتىن تاعى جەتى ارنايى جولاق ەنگىزىلەدى ەكەن. “جولاقتار رايىمبەك، سەيفۋللين داڭعىلدارىندا، تولە بي، تيميريازەۆ، جەلتوقسان، ناۋرىزباي باتىر، گوگول كوشەلەرىندە پايدا بولادى. بۇل كوشەلەر كەڭ. دەگەنمەن جول جيەگىنە كولىكتەردى قويىپ تاستايتىندار بار، سوسىن ءجۇرۋ ىڭعايسىز بولادى. وسى كولىكتەردى الىپ تاستاپ، ورنىنا ارنايى جولاق اشۋ كەرەك”، – دەدى اكىم.

tengrinews.kz