بەيسەنبى قازىر «يۋننان جۇڭۋي» كلۋبىنىڭ كاسىپقوي بوكس شەبەرى. ەستەرىڭىزدە بولسا، ول 12 اقپان كۇنى، قىتايدىڭ سىچۋان ولكەسى لۋجوۋ قالاسىندا وتكەن 2016 جىلدىڭ 4 رەتكى «ورتالىق تەلەۆيزيانىڭ جاڭا جىلدى قۇتتىقتاۋ بەلدىگىنە تالاسۋ» باسەكەسىندە جەڭىسكە جەتىپ، التىن بەلىك تاعىنعان بولاتىن. ەندى مىنە، كەزەكتى دودادان مەرەيى ۇستەم بولعان باتىر 24 اقپاندا تۋعان اۋىلىنا ورالدى.

اتالمىش لۋجوۋ قالاسىنداعى جارىسقا گانا، برازيليا، ۆەنەسۋەلا، قىتاي سىندى 4 مەملەكەتتەن 28 سپورتشى قاتىسقان. 63 كەلى سالماقتا گانالىق قارسىلاسىن باس كوتەرتپەي سوققىلاعان بەيسەنبى ونى 2 مينۋت 23 سەكۋدتا الاڭنان كەتۋگە ءماجبۇر ەتتى. ءسويتىپ، WBC جەڭىل سالماقتىلار دارەجەسىندە التىن بەلبەۋدى جەڭىپ العان.
بەيسەنبى 2007 جىلدان بوكسقا قاتىسىپ، «قىتايداعى قازاق بوكسىنىڭ قولباسشىسى» اتانعان مۇرات بوشايۇلىنىڭ باپكەرلىگىندە بولادى. تاجىريبەلى جاتتىقتىرۋشىنىڭ ەڭبەگى مەن ءوزىنىڭ تالانتى ارقاسىندا ول التاي ايماقتىق، شىڭجاڭ ولكەلىك بوكس جارستارىندا جەكە-جەكە التىن جانە كۇمىس مەدال ەنشىلەگەن.

سونداي-اق، قابانىڭ قابىلانى 2012 جىلى جەلتوقساندا، 2013 جىلى تامىزدا، 2014 جىلى قاڭتاردا حىنان ولكەسى جىڭجۋ قالاسىندا وتكىزىلگەن WBV, BCA-نىڭ ىرىكتەۋ سىندارىندا 64 كەلى سالماق بويىنشا ارت-ارتىنان 3 مارتە جەڭىمپاز اتانادى.
جاس سپورتشىنىڭ ەلىنە ورالۋىنا وراي «اعاجاي-التاي تورابى» تىلشىلەرى دە ءسۇيىنشى حابار ارناپتى. «سۇيەر ۇلىڭ بولسا سەن ءسۇي، سۇيىنەرگە جارار ول» دەگەندەي اۋىلعا ورالعان بەيسەنبىنى اتا-اناسى، تۋىس-تۋعاندارى، اۋىلداستارى قۋانا قارسى الىپ، اق سامايلى انالار اق شاشۋىن شاشىپ جۇلدەلى ۇلدارىنىڭ التىن بەلبەۋىن قۇتتىقتاپ، الداعى ساپارىنا ساتتىلىك تىلەدى.