الماتىدا “جاڭا ءومىر” ەۆانگەلدىك حريستيان سەنىمى شىركەۋى” ءدىني بىرلەستىگىنىڭ كەڭسەسىن ءتىنتۋ كەزىندە تىركەلمەگەن قارۋ مەن وق-دارىلەر تابىلدى دەپ حابارلادى الماتى قالالىق ىشكى ىستەر دەپارتامەنتىنە سىلتەمە جاساعان جەرگىلىكتى اگەنتتىكتەر.

دەپارتامەنت مالىمەتىنە قاراعاندا، دىني بىرلەستىكتىڭ باس كەڭسەسىنە ءتىنتۋ 25 ناۋرىز كۇنى ۇيىم جەتەكشىسىنىڭ “اسا ءىرى كولەمدە قارجى جىمقىرۋىنا” قاتىستى ءىس بويىنشا جۇرگىزىلگەن. “جاڭا ءومىر” شىركەۋى كەڭسەسىمەن بىرگە ۇيىم جەتەكشىسى سەرگەي زايكين مەن پاستور لاريسا ماكسيموۆانىڭ تۇرعىلىقتى جەرىنە دە ءتىنتۋ جاسالعان. “25 ناۋرىزدا بىرلەستىكتىڭ باس كەڭسەسى مەن جەتەكشىسىنىڭ تۇرعىلىقتى جەرىنە ءتىنتۋ جاسالىپ، قارجىلىق قۇجاتتار مەن ۇيىمنىڭ قارجى-شارۋاشىلىق قىزمەتىنە قاتىستى ماتەريالدار تاركىلەندى. تاركىلەنگەن ماتەريالدارعا ساراپتاما تاعايىندالدى. بۇدان وزگە، تىركەلمەگەن قارۋ-جاراق پەن وق-دارىلەر تابىلدى” دەلىنگەن دەپارتامەنت اقپاراتىندا.

پوليتسيا مالىمەتىنشە، ءتىنتۋ كەزىندە ءدىني ادەبيەتتەر مەن بىرلەستىك قورىنىڭ قارجىسى تاركىلەنگەنى تۋرالى “كوپە-كورىنەۋ جالعان اقپارات” تاراتىلىپ جاتىر. ال الەۋمەتتىك جەلىلەردەگى كەيبىر توپتاردا پوليتسيانىڭ ارەكەتىندە ء“دىني استار بار” دەگەن پىكىرلەر كەلتىرىلگەن.

الماتىداعى “جاڭا ءومىر” شىركەۋىنىڭ كەڭسەسى مەن قۇلشىلىق قىلاتىن ءۇيى الماتى ەلەكتروتەحنيكا زاۋىتىنىڭ بۇرىنعى مادەنيەت ۇيىندە، الماتى-1 تەمىرجول ۆوكزالىنا جاقىن ورنالاسقان. بۇعان دەيىن سەرگەي زايكين شىركەۋ ءدىني بىرلەستىكتەر تۋرالى جاڭا زاڭعا ساي قايتا تىركەۋدەن وتكەنىن جانە بۇرىنعىداي زاڭدى تۇردە جۇمىس ىستەپ جاتقانىن ايتقان.

ازات ەۋروپا / ازاتتىق راديوسى