Almatıda “Jaña ömir” evangeldik hristian senimi şirkeui” dini birlestiginiñ keñsesin tintu kezinde tirkelmegen qaru men oq-däriler tabıldı dep habarladı Almatı qalalıq işki ister departamentine silteme jasağan jergilikti agenttikter.

Departament mälimetine qarağanda, dini birlestiktiñ bas keñsesine tintu 25 naurız küni wyım jetekşisiniñ “asa iri kölemde qarjı jımqıruına” qatıstı is boyınşa jürgizilgen. “Jaña ömir” şirkeui keñsesimen birge wyım jetekşisi Sergey Zaikin men pastor Larisa Maksimovanıñ twrğılıqtı jerine de tintu jasalğan. “25 naurızda birlestiktiñ bas keñsesi men jetekşisiniñ twrğılıqtı jerine tintu jasalıp, qarjılıq qwjattar men wyımnıñ qarjı-şaruaşılıq qızmetine qatıstı materialdar tärkilendi. Tärkilengen materialdarğa saraptama tağayındaldı. Bwdan özge, tirkelmegen qaru-jaraq pen oq-däriler tabıldı” delingen departament aqparatında.

Policiya mälimetinşe, tintu kezinde dini ädebietter men birlestik qorınıñ qarjısı tärkilengeni turalı “köpe-körineu jalğan aqparat” taratılıp jatır. Al äleumettik jelilerdegi keybir toptarda policiyanıñ äreketinde “dini astar bar” degen pikirler keltirilgen.

Almatıdağı “Jaña ömir” şirkeuiniñ keñsesi men qwlşılıq qılatın üyi Almatı elektrotehnika zauıtınıñ bwrınğı mädeniet üyinde, Almatı-1 temirjol vokzalına jaqın ornalasqan. Bwğan deyin Sergey Zaikin şirkeu dini birlestikter turalı jaña zañğa say qayta tirkeuden ötkenin jäne bwrınğıday zañdı türde jwmıs istep jatqanın aytqan.

Azat Europa / Azattıq radiosı