الماتى قالالىق سوتىندا بۇگىن الاۋىزدىق تۋدىردى دەگەن ايىپپەن سوتتالعان ازاماتتىق بەلسەندىلەر ەرمەك نارىمباەۆ پەن سەرىكجان مامبەتاليننىڭ اپەللياتسيالىق شاعىمى بويىنشا سوت ۇكىمى جاريالاندى. اپەللياتسيالىق القا سوتى مامبەتاليندى ءبىر جىلعا باس بوستاندىعىن شەكتەپ، ءۇش جىلعا قوعامدىق قىزمەتەن اينالىسۋعا تىيىم سالدى. مامبەتاليندى العاشقى سوت ينستانتسياسى ەكى جىلعا سوتتاعان ەدى.

ءۇش جىلعا باس بوستاندىعىنان ايىرىلىپ، بەس جىلعا قانداي دا ءبىر قوعامدىق قىزمەتپەن اينالىسۋىنا تىيىم سالىنعان نارىمباەۆتىڭ جازاسى دا جەڭىلدەتىلدى. اپەللياتسيالىق سوت نارىمباەۆتى ۇش جىلعا باس بوستاندىعىنان ايىرۋ جازاسىن ءۇش جىلعا باس بوستاندىعىن شەكتەۋمەن اۋىستىردى. بەلسەندىگە بەس جىلعا دەيىن قوعامدىق قىزمەتپەن اينالىسۋعا سالىنعان تىيىم وزگەرمەدى. نارىمباەۆ پەن مامبەتالين دە سوت زالىنان بوساتىلدى.

بۇگىنگى سوتتا سوتقا كەلگەن جۋرناليستەر مەن باسقا دا بەلسەندىلەردى مونيتور قويىلعان بولەك اكت زالىنا كىرگىزدى. ولار سوت بارىسىن وسى مونيتور ارقىلى باقىلاپ وتىردى.

كەشە سوتتا سويلەگەن نارىمباەۆ كىناسىن مويىندامايتىنىن مالىمدەپ، قىلمىستىق ءىستى جاۋىپ، ءوزىن سوت زالىندا بوساتۋدى تالاپ ەتكەن. سوتقا ءوز ەركىمەن كەلىپ، ەركىن كەتكەن مامبەتالين كىناسىن مويىنداعان. ال ۇيقاماقتاعى نارىمباەۆ سوت زالىنا كۇزەتپەن كەلىپ، ۇيىنە كۇزەتپەن اكەتىلگەن. مامبەتالين اپەللياتسيالىق شاعىم تۇسىرگەن كەزەڭدە قاماۋدان ۋاقىتشا بوساتىلعان. نارىمباەۆ اپەللياتسيالىق سوتقا دەيىن ۇيقاماقتا بولعان.

29 ناۋرىزدا وتكەن سوتتا پروكۋرور مامبەتاليننىڭ جازاسىن ەكى جىلعا باس بوستاندىعىن شەكتەپ، ءۇش جىلعا قوعامدىق قىزمەتپەن اينالىسۋىنا تىيىم سالۋ تۇرىندە جەڭىلدەتۋدى، كىناسىن مويىنداماعان نارىمباەۆتىڭ جازاسىن وزگەرىسسىز قالدىرۋدى سۇراعان.

مامبەتالين مەن نارىمباەۆ 22 قاڭتاردا “الاۋىزدىق تۋدىردى” دەگەن باپپەن ەكى جانە ءۇش جىلعا سوتتالعان ەدى. ولارعا قىلمىستىق كودەكستىڭ 174-بابى بويىنشا (“الەۋمەتتىك، ۇلتتىق، ناسىلدىك جانە دىني الاۋىزدىق تۋدىرۋ”) ايىپ تاعىلعان ەدى. بەلسەندىلەر ينتەرنەتتە تاراعان “ۆەتەر س ۋليتسى” كىتابىنان Facebook پاراقشالارىندا ءۇزىندى جاريالاۋ ارقىلى “قازاق حالقىنىڭ ار-نامىسىن قورلادى” دەپ تانىلعان. ەكى بەلسەندى اۋەلى بۇل ايىپتى مويىنداماي، كەيىن “شىن وكىنىپ كەشىرىم” سۇراعان سوڭ ۋاقىتشا قاماۋدان بوساتىلعان.

ازات ەۋروپا / ازاتتىق راديوسى