«ءماسىموۆ ەرەۆانعا بارمايدى»

الايدا بۇگىن قازاقستان پرەمەر-ءمينيسترى كارىم ءماسىموۆتىڭ ەرەۆانعا بارمايتىنى حابارلاندى. مۇنى ازاتتىققا پرەمەر-مينيستر كەڭسەسى ءباسپاسوز قىزمەتى جەتەكشىسىنىڭ ورىنباسارى دۋمان حاميت راستاعانىمەن، «ازىرگە ساپاردان باس تارتۋ سەبەبىن ايتا المايتىنىن» ءبىلدىردى.

رەسەي پرەمەر-ءمينيسترى دميتري مەدۆەدەۆ پەن ارمەنيا پرەمەر-ءمينيسترى وۆيك ابراامياننىڭ ماسكەۋدە كەزدەسكەن ساتتەرى. 9 شىلدە 2015 جىل.

ال رەسەي ۇكىمەتىنىڭ رەسمي سايتىندا پرەمەر-مينيستر دميتري مەدۆەدەۆتىڭ ارمەنياعا ساپارىن شەگەرمەيتىنى، ءساۋىردىڭ 7-ءسى كۇنى – ەرەۆانعا (ارمەنيا), ال كەلەسى، ياعني ەرەۆاندا ەاەو ۇكىمەت باسشىلارى ءسامميتى ءوتۋى ءتيىس بولعان ءساۋىردىڭ 8-ءى كۇنى باكۋگە (ازەربايجان) باراتىنى حابارلاندى.

وسى اقپاراتتا دميتري مەدۆەدەۆتىڭ ارمەنيا پرەمەر-ءمينيسترى وۆيك ابرااميانمەن تەلەفون ارقىلى سويلەسەتىنى، ابرااميانعا «قالىپتاسقان جاعدايعا بايلانىستى رەسەيدىڭ ەۋرازيا ۇكىمەتارالىق كەڭەسىندە توراعالىق ەتىپ وتىرعان قازاقستاننىڭ ەاەو ءسامميتىن ماسكەۋگە، كەلەسى اپتاعا اۋىستىرۋ ۇسىنىسىنا كەلىسۋگە دايىن ەكەنىن حابارلايتىنى» جازىلعان.

رەسەي ۇكىمەتىنىڭ سايتىندا پرەمەر دميتري مەدۆەدەۆ پەن ارمەنيا ۇكىمەتىنىڭ باسشىسى وۆيك ابراامياننىڭ قازاقستاننىڭ ەاەو ءسامميتىن ماسكەۋگە اۋىستىرۋ تۋرالى ۇسىنىسىن تالقىلاعانى دا حابارلاندى.

كەيبىر رەسەيلىك باق-تىڭ جازۋىنشا «ەاەو ءسامميتى قاراباق قاقتىعىسىنا بايلانىستى شەگەرىلگەن». ربك باسىلىمى دميتري مەدۆەدەۆتىڭ ءباسپاسوز حاتشىسى ناتاليا تيماكوۆاعا سىلتەمە جاساي وتىرىپ، قازاقستاننىڭ ەاەو ءسامميتىن ماسكەۋدە وتكىزۋ ۇسىنىسىن رەسەيدىڭ قابىل العانىن حابارلادى.

ساراپشى پىكىرى

قازاقستاندىق ساياساتتانۋشى راسۋل جۇمالى ەرەۆانداعى ءسامميتتى باسقا قالاعا اۋىستىرۋدى «دۇرىس شەشىم» دەپ باعالاپ، مۇنىڭ قازاقستاننىڭ ديپلوماتيالىق ۇسىنىسى ەكەنىن ايتادى.

ساياساتتانۋشى راسۋل جۇمالى.

 - قازاقستان ەاەو توراعاسى رەتىندە ءسامميتتىڭ وتكىزۋ ۋاقىتىن، ورنىن وزگەرتۋگە ۇسىنىس جاساۋعا تولىق قۇقىلى. سامميتكە قاتىستى وزگەرىستەر تاۋلى قاراباقتاعى جاعدايعا بايلانىستى ەكەنى انىق. ەگەر سامميت ەرەۆاندا وتسە، قاتىسقان ەلدەر تاۋلى قاراباق [قاقتىعىسى] جاعدايىندا ارمەنياعا قولداۋ بىلدىرگەن بولىپ كورىنەدى. ازەربايجان – ساياسي جانە ەكونوميكالىق تۇرعىدا قازاقستانعا الدەقايدا جاقىن، سەرىكتەس ەل. سوندىقتان قازاقستان [ۇكىمەتى] دەلەگاتسياسى ەرەۆانعا بارعان جاعدايدا ازەربايجان ول ساپاردى ارمەنياعا قولداۋ دەپ قابىلداۋى مۇمكىن ەدى، – دەيدى ول.

ارمەنيا مەن ازەربايجاننىڭ اراسىنداعى داۋلى ايماق – تاۋلى قاراباقتاعى جاعداي ءساۋىردىڭ 2-ىنە قاراعان ءتۇنى كۇرت شيەلەنىسكەن ەدى. تاراپتار اتىستى توقتاتۋ كەلىسىمىن بۇزدى دەپ ءبىر-ءبىرىن ايىپتادى. قارۋلى قاقتىعىس كەزىندە ەكى تاراپتان دا ونداعان ادام قازا تاۋىپ، جۇزدەگەن ادام جارالانعانى حابارلاندى.

استانا تاۋلى قاراباقتاعى جانجال ايماعىندا ادامداردىڭ قازا بولۋىنا الاڭداۋشىلىق ءبىلدىرىپ، تاراپتاردى ۇستامدى بولۋعا جانە اتىستى توقتاتۋ تۋرالى ۋاعدالاستىقتاردى قاتاڭ ساقتاۋعا شاقىرادى.

ەاەو-عا رەسەي، قازاقستان، بەلارۋس، قىرعىزستان جانە ارمەنيا مۇشە.

رۋسلان مەدەلبەك

ازات ەۋروپا / ازاتتىق راديوسى