«MÄSİMOV EREVANĞA BARMAYDI»

Alayda bügin Qazaqstan prem'er-ministri Kärim Mäsimovtiñ Erevanğa barmaytını habarlandı. Mwnı Azattıqqa prem'er-ministr keñsesi baspasöz qızmeti jetekşisiniñ orınbasarı Duman Hamit rastağanımen, «äzirge sapardan bas tartu sebebin ayta almaytının» bildirdi.

Resey prem'er-ministri Dmitriy Medvedev pen Armeniya prem'er-ministri Ovik Abraamyannıñ Mäskeude kezdesken sätteri. 9 şilde 2015 jıl.

Al Resey ükimetiniñ resmi saytında prem'er-ministr Dmitriy Medvedevtiñ Armeniyağa saparın şegermeytini, säuirdiñ 7-si küni – Erevanğa (Armeniya), al kelesi, yağni Erevanda EAEO ükimet basşıları sammiti ötui tiis bolğan säuirdiñ 8-i küni Bakuge (Äzerbayjan) baratını habarlandı.

Osı aqparatta Dmitriy Medvedevtiñ Armeniya prem'er-ministri Ovik Abraamyanmen telefon arqılı söylesetini, Abraamyanğa «qalıptasqan jağdayğa baylanıstı Reseydiñ Euraziya ükimetaralıq keñesinde törağalıq etip otırğan Qazaqstannıñ EAEO sammitin Mäskeuge, kelesi aptağa auıstıru wsınısına kelisuge dayın ekenin habarlaytını» jazılğan.

Resey ükimetiniñ saytında prem'er Dmitriy Medvedev pen Armeniya ükimetiniñ basşısı Ovik Abraamyannıñ Qazaqstannıñ EAEO sammitin Mäskeuge auıstıru turalı wsınısın talqılağanı da habarlandı.

Keybir reseylik BAQ-tıñ jazuınşa «EAEO sammiti Qarabaq qaqtığısına baylanıstı şegerilgen». RBK basılımı Dmitriy Medvedevtiñ baspasöz hatşısı Natal'ya Timakovağa silteme jasay otırıp, Qazaqstannıñ EAEO sammitin Mäskeude ötkizu wsınısın Reseydiñ qabıl alğanın habarladı.

SARAPŞI PİKİRİ

Qazaqstandıq sayasattanuşı Rasul Jwmalı Erevandağı sammitti basqa qalağa auıstırudı «dwrıs şeşim» dep bağalap, mwnıñ Qazaqstannıñ diplomatiyalıq wsınısı ekenin aytadı.

Sayasattanuşı Rasul Jwmalı.

 - Qazaqstan EAEO törağası retinde sammittiñ ötkizu uaqıtın, ornın özgertuge wsınıs jasauğa tolıq qwqılı. Sammitke qatıstı özgerister Taulı Qarabaqtağı jağdayğa baylanıstı ekeni anıq. Eger sammit Erevanda ötse, qatısqan elder Taulı Qarabaq [qaqtığısı] jağdayında Armeniyağa qoldau bildirgen bolıp körinedi. Äzerbayjan – sayasi jäne ekonomikalıq twrğıda Qazaqstanğa äldeqayda jaqın, seriktes el. Sondıqtan Qazaqstan [ükimeti] delegaciyası Erevanğa barğan jağdayda Äzerbayjan ol sapardı Armeniyağa qoldau dep qabıldauı mümkin edi, – deydi ol.

Armeniya men Äzerbayjannıñ arasındağı daulı aymaq – Taulı Qarabaqtağı jağday säuirdiñ 2-ine qarağan tüni kürt şielenisken edi. Taraptar atıstı toqtatu kelisimin bwzdı dep bir-birin ayıptadı. Qarulı qaqtığıs kezinde eki taraptan da ondağan adam qaza tauıp, jüzdegen adam jaralanğanı habarlandı.

Astana Taulı Qarabaqtağı janjal aymağında adamdardıñ qaza boluına alañdauşılıq bildirip, taraptardı wstamdı boluğa jäne atıstı toqtatu turalı uağdalastıqtardı qatañ saqtauğa şaqıradı.

EAEO-ğa Resey, Qazaqstan, Belarus', Qırğızstan jäne Armeniya müşe.

Ruslan MEDELBEK

Azat Europa / Azattıq radiosı