مەملەكەتتەر باسشىلارى ساۋدا-ەكونوميكا، سۋ-ەنەرگەتيكا، كولىك-لوگيستيكا جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ نەگىزگى باعىتتارىن قاراستىردى.

ەكى ەلدىڭ كوشباسشىلارى ەكىجاقتى ساۋدا كولەمىنىڭ ءوسۋىن قامتاماسىز ەتۋگە، ونىڭ قۇرىلىمىن ارتاراپتاندىرۋعا، ينۆەستيتسيالىق ىنتىماقتاستىقتى جانداندىرۋعا، سونداي-اق سىرتقى ساۋدا جۇكتەرى ترانزيتىنە قولايلى جاعداي قالىپتاستىرۋعا ءوزارا نيەتتەستىگىن ءبىلدىردى.

اڭگىمە بارىسىندا ەكىجاقتى ىنتىماقتاستىق جونىندەگى بىرلەسكەن ۇكىمەتارالىق كوميسسيانىڭ قىزمەتىنە وڭ باعا بەرىلدى.

سونىمەن قاتار، نۇرسۇلتان نازارباەۆ پەن ي.كارىموۆ كۇن تارتىبىندەگى وزەكتى حالىقارالىق ماسەلەلەردى، سونداي-اق وڭىرلىك قاۋىپسىزدىكتى قامتاماسىز ەتۋگە، تاشكەنتتە وتكىزۋ جوسپارلانىپ وتىرعان شىۇ سامميتىنە قاتىستى جايتتاردى تالقىلادى.

مەملەكەت باسشىسى وزبەكستان پرەزيدەنتىنە بۇۇ قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەلىگىنە قازاقستاننىڭ كانديداتۋراسىن قولداعانى ءۇشىن العىس ءبىلدىردى.

پرەزيدەنتتەر حالىقارالىق تەرروريزمگە، ءدىني ەكسترەميزمگە، زاڭسىز كوشى-قونعا، ەسىرتكى تاسىمالىنا، ترانسۇلتتىق ۇيىمداسقان قىلمىسقا جانە باسقا دا سىن-قاتەرلەرگە جانە قاۋىپتەرگە قارسى كۇرەستەگى ىنتىماقتاستىقتى ەكىجاقتى فورماتتا، سونداي-اق حالىقارالىق قۇرىلىمدار اياسىندا ودان ءارى دامىتۋ قاجەتتىگىن اتاپ ءوتتى.

ەكى ەلدىڭ كوشباسشىلارى اۋعانستانداعى بەيبىتشىلىكتى جانە تۇراقتىلىقتى قالپىنا كەلتىرۋدى تەزدەتۋگە وزدەرىنىڭ بەيىلدىلىگىن راستادى. بۇل رەتتە، قازاقستان مەن وزبەكستاننىڭ اۋعانستان ەكونوميكاسىن قالپىنا كەلتىرۋگە قوسقان ۇلەسىنىڭ ماڭىزدىلىعىن اتاپ ءوتتى.

نۇرسۇلتان نازارباەۆ پەن ي.كارىموۆ ورتالىق ازياداعى ترانسشەكارالىق وزەندەردىڭ سۋ رەسۋرستارى حالىقتاردىڭ يگىلىگى بولىپ تابىلاتىنىن جانە بۇكىل ءوڭىردىڭ تۇراقتىلىعى مەن ءال-اۋقاتى وسى رەسۋرستاردى اقىلعا قونىمدى جانە ءادىل پايدالانۋعا بايلانىستى ەكەنىن ايتتى.

بۇل ورايدا مەملەكەتتەر باسشىلارى ءوڭىردىڭ بارلىق ەلدەرىن ترانسشەكارالىق وزەندەردە جاڭا گيدروتەحنيكالىق قۇرىلىستاردى سالۋ ماسەلەسىن قاراستىرۋ كەزىندە بۇۇ كونۆەنتسيالارىندا بەكىتىلگەن جالپىعا تانىلعان حالىقارالىق سۋ قۇقىعى نورمالارىن باسشىلىققا الۋعا شاقىردى.

حالىقارالىق ارالدى قۇتقارۋ قورى ارال ماڭىن ەكولوگيالىق ساۋىقتىرۋ جانە ونىڭ الەۋمەتتىك-ەكونوميكالىق ماسەلەلەرىن شەشۋ ماقساتىنداعى ءوزارا ءىس-قيمىل ءۇشىن ماڭىزدى تۇعىرناما بولاتىنى ايتىلدى.

قازاقستان پرەزيدەنتى ەكى ەلدىڭ اراسىنداعى تاريحي دوستىق قاتىناستارعا توقتالىپ ءوتتى.

 بىز بۇل بايلانىستاردى تاۋەلسىزدىك جىلدارى ساقتاپ قانا قويماي، مەملەكەتتەرىمىزدى جاقىنداستىرا تۇستىك. بۇل ورايدا، كورشى رەتىندەگى ءبىزدىڭ رياسىز نيەتپەن كەزدەسۋ تاجىريبەمىزدىڭ ماڭىزى زور. مەن سىزبەن دوستىعىمدى، قازاق پەن وزبەك حالقىنىڭ دوستىعىن ماقتان تۇتامىن. ماقسات – وسى قارىم-قاتىناستاردى، ءوزارا سەنىمدى نىعايتىپ، كەلەسى ۇرپاققا ميراس ەتىپ قالدىرۋ. بارشا قازاقستاندىقتار اتىنان وزبەك حالقىنا تابىس پەن باق-بەرەكە تىلەيمىن، – دەدى نۇرسۇلتان نازارباەۆ.

ي.كارىموۆ ەكى مەملەكەت اراسىندا شىنايى دوستىق قارىم-قاتىناس، قۇرمەت پەن ءوزارا تىلەۋلەستىك بار ەكەنىن ايتتى.

ءبىز ءومىر ءسۇرىپ جاتقان قازىرگىدەي كۇردەلى كەزەڭدە ءدال وسى قاسيەتتەر قاجەت. نۇرسۇلتان نازارباەۆتىڭ بۇل ساپارى قازىرگى جاعدايدا دۇرىس شەشىمدى بىرلەسىپ ىزدەۋ جولىندا پىكىر الماسۋ ءۇشىن دە ماڭىزدى. الەمدىك ەكونوميكادا داعدارىس جالعاسۋدا، دۇنيە ءجۇزىنىڭ ەشبىر مەملەكەتى قيىندىقتان كەندە ەمەس. ءبىز دۇرىس جولمەن ءجۇرىپ، ءاردايىم باعىتىمىزدى بىرلەسە بايىپتاپ وتىرۋدى قالايمىز، – دەدى وزبەكستان پرەزيدەنتى.