Memleketter basşıları sauda-ekonomika, su-energetika, kölik-logistika jäne mädeni-gumanitarlıq salalardağı ekijaqtı ıntımaqtastıqtıñ negizgi bağıttarın qarastırdı.

Eki eldiñ köşbasşıları ekijaqtı sauda köleminiñ ösuin qamtamasız etuge, onıñ qwrılımın ärtaraptandıruğa, investiciyalıq ıntımaqtastıqtı jandandıruğa, sonday-aq sırtqı sauda jükteri tranzitine qolaylı jağday qalıptastıruğa özara niettestigin bildirdi.

Äñgime barısında ekijaqtı ıntımaqtastıq jönindegi birlesken ükimetaralıq komissiyanıñ qızmetine oñ bağa berildi.

Sonımen qatar, Nwrswltan Nazarbaev pen I.Kärimov kün tärtibindegi özekti halıqaralıq mäselelerdi, sonday-aq öñirlik qauipsizdikti qamtamasız etuge, Taşkentte ötkizu josparlanıp otırğan ŞIW Sammitine qatıstı jayttardı talqıladı.

Memleket basşısı Özbekstan Prezidentine BWW Qauipsizdik keñesiniñ 2017-2018 jıldardağı twraqtı emes müşeligine Qazaqstannıñ kandidaturasın qoldağanı üşin alğıs bildirdi.

Prezidentter halıqaralıq terrorizmge, dini ekstremizmge, zañsız köşi-qonğa, esirtki tasımalına, transwlttıq wyımdasqan qılmısqa jäne basqa da sın-qaterlerge jäne qauipterge qarsı kürestegi ıntımaqtastıqtı ekijaqtı formatta, sonday-aq halıqaralıq qwrılımdar ayasında odan äri damıtu qajettigin atap ötti.

Eki eldiñ köşbasşıları Auğanstandağı beybitşilikti jäne twraqtılıqtı qalpına keltirudi tezdetuge özderiniñ beyildiligin rastadı. Bwl rette, Qazaqstan men Özbekstannıñ Auğanstan ekonomikasın qalpına keltiruge qosqan ülesiniñ mañızdılığın atap ötti.

Nwrswltan Nazarbaev pen I.Kärimov Ortalıq Aziyadağı transşekaralıq özenderdiñ su resurstarı halıqtardıñ igiligi bolıp tabılatının jäne bükil öñirdiñ twraqtılığı men äl-auqatı osı resurstardı aqılğa qonımdı jäne ädil paydalanuğa baylanıstı ekenin ayttı.

Bwl orayda memleketter basşıları öñirdiñ barlıq elderin transşekaralıq özenderde jaña gidrotehnikalıq qwrılıstardı salu mäselesin qarastıru kezinde BWW konvenciyalarında bekitilgen jalpığa tanılğan halıqaralıq su qwqığı normaların basşılıqqa aluğa şaqırdı.

Halıqaralıq Araldı qwtqaru qorı Aral mañın ekologiyalıq sauıqtıru jäne onıñ äleumettik-ekonomikalıq mäselelerin şeşu maqsatındağı özara is-qimıl üşin mañızdı twğırnama bolatını aytıldı.

Qazaqstan Prezidenti eki eldiñ arasındağı tarihi dostıq qatınastarğa toqtalıp ötti.

 Biz bwl baylanıstardı Täuelsizdik jıldarı saqtap qana qoymay, memleketterimizdi jaqındastıra tüstik. Bwl orayda, körşi retindegi bizdiñ riyasız nietpen kezdesu täjiribemizdiñ mañızı zor. Men Sizben dostığımdı, qazaq pen özbek halqınıñ dostığın maqtan twtamın. Maqsat – osı qarım-qatınastardı, özara senimdi nığaytıp, kelesi wrpaqqa miras etip qaldıru. Barşa qazaqstandıqtar atınan özbek halqına tabıs pen baq-bereke tileymin, – dedi Nwrswltan Nazarbaev.

I.Kärimov eki memleket arasında şınayı dostıq qarım-qatınas, qwrmet pen özara tileulestik bar ekenin ayttı.

Biz ömir sürip jatqan qazirgidey kürdeli kezeñde däl osı qasietter qajet. Nwrswltan Nazarbaevtıñ bwl saparı qazirgi jağdayda dwrıs şeşimdi birlesip izdeu jolında pikir almasu üşin de mañızdı. Älemdik ekonomikada dağdarıs jalğasuda, dünie jüziniñ eşbir memleketi qiındıqtan kende emes. Biz dwrıs jolmen jürip, ärdayım bağıtımızdı birlese bayıptap otırudı qalaymız, – dedi Özbekstan Prezidenti.