گەرمانيا: 1 ميلليارد ەۋرو ۇرلاعان قىلمىستىق توپ اشكەرەلەندى
گەرمانيادا ناۋقاستار مەن مۇگەدەكتەرگە كۇتىم جاساپ، امبۋلاتوريالىق قىزمەت كورسەتۋ سالاسىندا ساقتاندىرۋ جانە الەۋمەتتىك تولەمدەر ەسەبىنەن 1 ميلليارد ەۋرودان استام قارجى زاڭسىز جولمەن الىنعانى اشكەرە بولعان. بۇل تۋرالى قىلمىستىق ىستەر جونىندەگى فەدەرالدىق مەكەمە (BKA) جۇرگىزگەن تەكسەرۋ قورىتىندىسى جايلى قۇجاتتاردى قولعا تۇسىرگەن Die Welt باسىلىمى مەن Bayerische Rundfunk قوعامدىق-قۇقىقتىق مەدياكومپانياسى حابارلادى. اقپاراتقا سايكەس، بۇل قىلمىسقا گەرمانياعا پوستسوۆەتتىك ەلدەردەن قونىس اۋدارعان ازاماتتار كۇدىكتى سانالىپ وتىر.
باسىلىمداردىڭ جازۋىنشا، گەرمانيادا ناۋقاستارعا كۇتىم جاساپ، قىزمەت كورسەتەتىن سالانى «ورىس مافياسى» دەپ اتالاتىن قىلمىستىق توپ باقىلاۋىنا العان. «ورىس-ەۋرازيالىق» ۇيىمداسقان قىلمىستىق توپتار ساقتاندىرۋ قارجىسىن جىمقىرۋدىڭ كوپتەگەن ءادىس-ايلاسىن مەڭگەرگەن. ولاردىڭ اراسىندا ءجيى قولدانىلاتىنى – قىزمەت كورسەتىلگەنى تۋرالى جالعان ەسەپ قۇجاتتارىن تولتىرۋ جانە بۇل ىسكە وتىرىك اۋىرعان سىڭاي تانىتقان پاتسيەنتتەردى دە تارتۋ قىلمىسى. تۇراقتى كۇتىمدى قاجەت ەتەتىن ناۋقاستارعا قاتىستى ىستەردە قىلمىستىق توپ كورسەتىلمەگەن قىزمەت تۇرلەرى ءۇشىن ءار پاتسيەنتكە ايىنا 15 مىڭ ەۋروعا دەيىن زاڭسىز تابىس الىپ كەلگەنى انىقتالعان.
اتالعان قىلمىستار بويىنشا 2015 جىلى جارتى جىل بويى تەرگەۋ جۇرگىزگەن BKA وكىلدەرىنىڭ مالىمدەۋىنشە، مۇنداي قىلمىستار بۇكىل گەرمانيا كولەمىندە جاسالعان، ايتكەنمەن باسقا ايماقتارمەن سالىستىرعاندا بەرلين، سولتۇستىك رەين – ۆەستفاليا جانە تومەنگى ساكسونيادا كوپ تاراعان.
گەرمانيا ساقتاندىرۋ كومپانيالارى كۇتىمدى قاجەت ەتەتىن ناۋقاستارعا تولەپ كەلگەن ءاربىر بەسىنشى ەۋرونى «ءورىستىلدى» قىلمىستىق توپتار زاڭسىز يەلەنىپ العان بولۋى مۇمكىن دەپ جازادى نەمىس باسىلىمدارى.
ازاتتىق راديوسى
پىكىر قالدىرۋ