قازاقستان پرەزيدەنتى – قارۋلى كۇشتەردىڭ جوعارعى باس قولباسشىسى ىشكى ىستەر مينيسترلىگىنىڭ ارناۋلى ماقساتتاعى بولىمشەلەرىنىڭ جاۋىنگەرلىك جانە ادىستەمەلىك دايارلاۋ ورتالىعىنىڭ نەگىزگى نىساندارىن قاراپ كوردى، سونداي-اق مەملەكەتتىك كۇزەت قىزمەتىنىڭ «قالقان»، ۇلتتىق ۇلاننىڭ «بۇركىت»، ىشكى ىستەر مينيسترلىگىنىڭ «سۇڭقار»،  ۇلتتىق قاۋىپسىزدىك كوميتەتىنىڭ «ارىستان»، الماتى قالاسى ىشكى ىستەر دەپارتامەنتى مەن قورعانىس مينيسترلىگىنىڭ باس بارلاۋ باسقارماسىنىڭ «ارلان» ارناۋلى ماقساتتاعى بولىمشەلەرىنىڭ كۇشتەرى مەن قۇرالدارىن قاتىستىرعان وقۋ-جاتتىعۋ بارىسىن باقىلادى.

جاتتىعۋ بارىسىندا انتيتەررورلىق باعىتتاعى ءىس-شارالار وتكىزۋ كەزىندەگى ارناۋلى ماقساتتاعى بولىمشەلەردىڭ ءىس-قيمىلى پىسىقتالدى.

«قايسار-2016» جاتتىعۋىنا قاتىسۋشىلارعا ءسوز ارناعان مەملەكەت باسشىسى جاڭا جاۋىنگەرلىك جانە ادىستەمەلىك دايارلىق ورتالىعىنىڭ ساربازدار شەبەرلىگىن شىڭداۋعا مۇمكىندىك بەرە وتىرىپ، ولاردى ساپالى  وقىتۋدى قامتاماسىز ەتەتىنىن اتاپ ءوتتى.

وقۋ-جاتتىعۋعا ۇشقىشتار مەن دەسانتتار، ارتيللەريستەر مەن بارلاۋشىلار، ارناۋلى جاساق جاۋىنگەرلەرى قاتىستى. بارلىعى دا شەبەرلىك پەن باتىلدىق تانىتىپ، دايىندىق دەڭگەيى جوعارى ەكەنىن كورسەتتى، – دەدى نۇرسۇلتان نازارباەۆ.

قازاقستان پرەزيدەنتى سوڭعى كەزدە الەمدە جانە وڭىردە بولىپ جاتقان وقيعالار، جەر ءجۇزىنىڭ ءار تاراپىنداعى تەررورلىق اكتىلەر، تاياۋ شىعىستاعى اسكەري قيمىلدار ىقتيمال قاتەرگە دايىن بولۋ كەرەكتىگىن كورسەتىپ وتىرعانىنا نازار اۋداردى.

قارۋلى كۇشتەردىڭ وتانىمىزدى جانە مەملەكەتىمىزدىڭ ەگەمەندىگىن قورعاۋ، اۋماقتىق تۇتاستىعىن ساقتاۋ جولىنداعى ماڭىزى زور، – دەدى مەملەكەت باسشىسى.

نۇرسۇلتان نازارباەۆ قازاقستان ارمياسى، وزگە اسكەري قۇرىلىمدار، ارناۋلى ورگاندار تاۋەلسىزدىك جىلدارى ءوز دامۋىنىڭ جاڭا كەزەڭىنە وتكەنىن ايتتى.

قازاقستان تاۋەلسىزدىگىنىڭ 25 جىلدىعىنا دايىندالا وتىرىپ، ءبىز زاماناۋي قارۋلى كۇشتەردى قالىپتاستىردىق دەپ ايتا الامىز. ولار قازىرگى زامانعى قارۋ-جاراقپەن جانە تەحنيكامەن جابدىقتالىپ، كاسىبي كادرلارمەن جاساقتالىپ، لايىقتى دەڭگەيدە وقىتىلادى. قىزمەتتىڭ الەۋمەتتىك جاعى ايتارلىقتاي جاقسارتىلدى. وسى ماسەلەنىڭ بارىنە مەن جوعارعى باس قولباسشى رەتىندە ۇدايى كوڭىل ءبولىپ وتىرمىن، – دەدى قازاقستان پرەزيدەنتى.

مەملەكەت باسشىسى اسكەري قىزمەتشىلەردىڭ مىندەتى ەلىمىزدەگى تىنىشتىقتى، تاتۋلىق پەن كەلىسىمدى ساقتاۋ ەكەنىن اتاپ ءوتتى.

سىزدەر – داڭقتى اعا ۇرپاقتىڭ ەرلىك داستۇرلەرىنىڭ مۇراگەرىسىزدەر. وتانىمىز سىزدەرگە مەملەكەت مۇددەسىن ءجىتى قورعاۋ، ۇلتتىق قاۋىپسىزدىك پەن قازاقستان رەسپۋبليكاسىنىڭ ىشكى تۇراقتىلىعىنىڭ سەنىمدى كەپىلى بولۋ سياقتى ايرىقشا ماڭىزدى ءىستى سەنىپ تاپسىردى. بۇل سىزدەردەن جوعارى ماشىقتى عانا ەمەس، قايسارلىقتى، شىنايى ءپاتريوتيزمدى دە تالاپ ەتەدى، – دەدى نۇرسۇلتان نازارباەۆ.

قازاقستان پرەزيدەنتى جاۋىنگەرلىك تۋ اسكەري ءبولىمنىڭ نەگىزگى اسكەري بەلگىسى بولىپ سانالاتىنىنا نازار اۋداردى.

ول اسكەري قىزمەتشىنىڭ ادالدىعىن، ەرلىگى مەن باتىلدىعىن بەينەلەيدى. ءبىزدىڭ بابالارىمىز جاۋىنگەرلىك تۋمەن شابۋىلعا شىعىپ، جەڭىسكە جەتتى، وتانىمىزدى قورعادى.  بۇگىن مەن جەكەلەگەن اسكەري بولىمدەرگە ءبىزدىڭ ايبىنىمىز بەن داڭقىمىزدىڭ رامىزىنە اينالاتىن جاۋىنگەرلىك تۋ تاپسىرامىن. وتانىمىزدىڭ قاۋىپسىزدىگىن قامتاماسىز ەتۋ ىسىنە ۇلەس قوسا وتىرىپ، بۇل بايراقتى اسقاقتاتا ۇستاعان ءجون، – دەدى مەملەكەت باسشىسى.

سونىمەن قاتار جوعارعى باس قولباسشى بارلىق اسكەري قىزمەتشىلەردى الداعى وتان قورعاۋشى كۇنىمەن قۇتتىقتاپ، وتان يگىلىگى جولىنداعى جاۋىنگەرلىك قىزمەتتەرىنە ساتتىلىك، ەلىمىزگە تىنىشتىق تىلەدى.

كەشەندى وقۋ-جاتتىعۋ اياقتالعاننان كەيىن نۇرسۇلتان نازارباەۆ ەلدىڭ كۇشتىك قۇرىلىمدارىنىڭ ارناۋلى بولىمشەلەرىنىڭ جەكە قۇرامى الدىندا ۇلتتىق ۇلاننىڭ 5572-ءشى اسكەري ءبولىمىنىڭ جانە قورعانىس مينيسترلىگىنىڭ باس بارلاۋ باسقارماسىنىڭ 22750-ءشى اسكەري ءبولىمىنىڭ كومانديرىنە ءوز قولىمەن جاۋىنگەرلىك تۋ تاپسىردى. سونداي-اق، قازاقستان پرەزيدەنتى قىزمەتتە ايرىقشا كوزگە تۇسكەن بىرقاتار اسكەري قىزمەتشىلەرگە جاڭا پاتەردىڭ كىلتىن تاپسىردى.

***

ىشكى ىستەر مينيسترلىگىنىڭ ارناۋلى ماقساتتاعى بولىمشەلەرىنىڭ جاۋىنگەرلىك جانە ادىستەمەلىك دايارلاۋ ورتالىعى الماتى وبلىسىنىڭ ىلە اۋدانىندا ورنالاسقان. ول جالپى اۋدانى 208 گەكتار جەردى الىپ جاتىر. ورتالىق قۇرىلىسى 2014 جىلى ساۋىردە باستالدى. قازىرگى كەزدە كەستەگە سايكەس ءجۇرىپ جاتقان قۇرىلىس جۇمىستارىن 2016 جىلدىڭ قاراشا ايىندا اياقتاۋ جوسپارلانعان. الەۋمەتتىك جانە شارۋاشىلىق ورىنجايلارىن قوسا ەسەپتەگەندە بارلىعى 60-تان اسا نىسان پايدالانۋعا بەرىلەدى.

ورتالىق اۋماعىندا ءتۇرلى مۋلتيمەديالىق اتىس تيرلەرى، سنايپەرمەن وق اتۋعا ۇيرەتەتىن «Robotech» كەشەنى، شابۋىل جاسالاتىن نىسانعا جاقىنداۋ ءىس-قيمىلىنا ماشىقتاندىرۋعا ارنالعان 4 قاباتتى تۇرعىن ءۇي ماكەتى، جاۋىنگەرلىك اتىس نىسانى ورنالاسقان.

سونىمەن قاتار اسكەري قالاشىقتا شتاب، جايلى كازارما، مادەني دەمالىس شارالارىن وتكىزۋگە ارنالعان كلۋب، جاتاقحانا، 2 قاباتتى سپورت كەشەنى، اۆتوكولىك پاركى، كينولوگيالىق قالاشىق بار.

جالپى، ءىىم ارناۋلى بولىمشەسى ورتالىعىنىڭ ينفراقۇرىلىمى ارناۋلى ماقساتتاعى بولىمشەلەردى ءتيىستى دەڭگەيدە وقىتىپ، جاۋىنگەرلىك شەبەرلىكتەرىن شىڭداۋعا مۇمكىندىك بەرەدى.