Qazaqstan Prezidenti – Qarulı Küşterdiñ Joğarğı Bas qolbasşısı İşki ister ministrliginiñ arnaulı maqsattağı bölimşeleriniñ Jauıngerlik jäne ädistemelik dayarlau ortalığınıñ negizgi nısandarın qarap kördi, sonday-aq Memlekettik küzet qızmetiniñ «Qalqan», Wlttıq wlannıñ «Bürkit», İşki ister ministrliginiñ «Swñqar»,  Wlttıq qauipsizdik komitetiniñ «Arıstan», Almatı qalası İşki ister departamenti men Qorğanıs ministrliginiñ bas barlau basqarmasınıñ «Arlan» arnaulı maqsattağı bölimşeleriniñ küşteri men qwraldarın qatıstırğan oqu-jattığu barısın baqıladı.

Jattığu barısında antiterrorlıq bağıttağı is-şaralar ötkizu kezindegi arnaulı maqsattağı bölimşelerdiñ is-qimılı pısıqtaldı.

«Qaysar-2016» jattığuına qatısuşılarğa söz arnağan Memleket basşısı jaña Jauıngerlik jäne ädistemelik dayarlıq ortalığınıñ sarbazdar şeberligin şıñdauğa mümkindik bere otırıp, olardı sapalı  oqıtudı qamtamasız etetinin atap ötti.

Oqu-jattığuğa wşqıştar men desanttar, artillerister men barlauşılar, arnaulı jasaq jauıngerleri qatıstı. Barlığı da şeberlik pen batıldıq tanıtıp, dayındıq deñgeyi joğarı ekenin körsetti, – dedi Nwrswltan Nazarbaev.

Qazaqstan Prezidenti soñğı kezde älemde jäne öñirde bolıp jatqan oqiğalar, jer jüziniñ är tarapındağı terrorlıq aktiler, Tayau Şığıstağı äskeri qimıldar ıqtimal qaterge dayın bolu kerektigin körsetip otırğanına nazar audardı.

Qarulı küşterdiñ Otanımızdı jäne memleketimizdiñ egemendigin qorğau, aumaqtıq twtastığın saqtau jolındağı mañızı zor, – dedi Memleket basşısı.

Nwrswltan Nazarbaev Qazaqstan armiyası, özge äskeri qwrılımdar, arnaulı organdar Täuelsizdik jıldarı öz damuınıñ jaña kezeñine ötkenin ayttı.

Qazaqstan täuelsizdiginiñ 25 jıldığına dayındala otırıp, biz zamanaui Qarulı küşterdi qalıptastırdıq dep ayta alamız. Olar qazirgi zamanğı qaru-jaraqpen jäne tehnikamen jabdıqtalıp, käsibi kadrlarmen jasaqtalıp, layıqtı deñgeyde oqıtıladı. Qızmettiñ äleumettik jağı aytarlıqtay jaqsartıldı. Osı mäseleniñ bärine men Joğarğı Bas qolbasşı retinde wdayı köñil bölip otırmın, – dedi Qazaqstan Prezidenti.

Memleket basşısı äskeri qızmetşilerdiñ mindeti elimizdegi tınıştıqtı, tatulıq pen kelisimdi saqtau ekenin atap ötti.

Sizder – dañqtı ağa wrpaqtıñ erlik dästürleriniñ mwragerisizder. Otanımız sizderge memleket müddesin jiti qorğau, wlttıq qauipsizdik pen Qazaqstan Respublikasınıñ işki twraqtılığınıñ senimdi kepili bolu siyaqtı ayrıqşa mañızdı isti senip tapsırdı. Bwl sizderden joğarı maşıqtı ğana emes, qaysarlıqtı, şınayı patriotizmdi de talap etedi, – dedi Nwrswltan Nazarbaev.

Qazaqstan Prezidenti Jauıngerlik tu äskeri bölimniñ negizgi äskeri belgisi bolıp sanalatınına nazar audardı.

Ol äskeri qızmetşiniñ adaldığın, erligi men batıldığın beyneleydi. Bizdiñ babalarımız Jauıngerlik tumen şabuılğa şığıp, jeñiske jetti, Otanımızdı qorğadı.  Bügin men jekelegen äskeri bölimderge bizdiñ aybınımız ben dañqımızdıñ rämizine aynalatın Jauıngerlik tu tapsıramın. Otanımızdıñ qauipsizdigin qamtamasız etu isine üles qosa otırıp, bwl bayraqtı asqaqtata wstağan jön, – dedi Memleket basşısı.

Sonımen qatar Joğarğı Bas qolbasşı barlıq äskeri qızmetşilerdi aldağı Otan qorğauşı künimen qwttıqtap, Otan igiligi jolındağı jauıngerlik qızmetterine sättilik, elimizge tınıştıq tiledi.

Keşendi oqu-jattığu ayaqtalğannan keyin Nwrswltan Nazarbaev eldiñ küştik qwrılımdarınıñ arnaulı bölimşeleriniñ jeke qwramı aldında Wlttıq wlannıñ 5572-şi äskeri böliminiñ jäne Qorğanıs ministrliginiñ Bas barlau basqarmasınıñ 22750-şi äskeri böliminiñ komandirine öz qolımen jauıngerlik tu tapsırdı. Sonday-aq, Qazaqstan Prezidenti qızmette ayrıqşa közge tüsken birqatar äskeri qızmetşilerge jaña päterdiñ kiltin tapsırdı.

***

İşki ister ministrliginiñ arnaulı maqsattağı bölimşeleriniñ Jauıngerlik jäne ädistemelik dayarlau ortalığı Almatı oblısınıñ İle audanında ornalasqan. Ol jalpı audanı 208 gektar jerdi alıp jatır. Ortalıq qwrılısı 2014 jılı säuirde bastaldı. Qazirgi kezde kestege säykes jürip jatqan qwrılıs jwmıstarın 2016 jıldıñ qaraşa ayında ayaqtau josparlanğan. Äleumettik jäne şaruaşılıq orınjayların qosa eseptegende barlığı 60-tan asa nısan paydalanuğa beriledi.

Ortalıq aumağında türli mul'timediyalıq atıs tirleri, snaypermen oq atuğa üyretetin «Robotech» keşeni, şabuıl jasalatın nısanğa jaqındau is-qimılına maşıqtandıruğa arnalğan 4 qabattı twrğın üy maketi, jauıngerlik atıs nısanı ornalasqan.

Sonımen qatar äskeri qalaşıqta ştab, jaylı kazarma, mädeni demalıs şaraların ötkizuge arnalğan klub, jataqhana, 2 qabattı sport keşeni, avtokölik parki, kinologiyalıq qalaşıq bar.

Jalpı, İİM arnaulı bölimşesi ortalığınıñ infraqwrılımı arnaulı maqsattağı bölimşelerdi tiisti deñgeyde oqıtıp, jauıngerlik şeberlikterin şıñdauğa mümkindik beredi.