ارانداتۋشى اقپاراتتاردان ساقتىق قاجەت
kerey.kz
الەۋمەتتىك جەلىلەردە ءار جەردە ءوتىپ جاتقان «جەرىمىزدى قورعايمىز، ءتىلىمىزدى ساقتايمىز» جيىندارىنا قاتىستى «بۇل ميتينگىلەردى اقش، تاعى باسقا شەتەلدەر قارجىلاندىرىپ جاتىر ەكەن» دەگەن سەكىلدى تۇبىرىمەن جالعان، وتىرىك، ارانداتۋشى اقپاراتتار تاراپ جاتىر. مۇنىڭ وتىرىك ەكەندىگى بەسىكتەگى بالاعا دا ايان. سوندا قالاي، حالىق ءوز جەرىن قورعاماۋى، ءتىلىن ساقتاماۋى كەرەك پە؟ اتا-بابا اماناتتاعان جەرىمىزدى شەتەلدىكتەرگە بەرىپ قويىپ قالاي ۇندەمەي وتىرامىز؟!
الاڭعا شىعۋ، ءوزىنىڭ پىكىرى مەن تىلەگىن ايتۋ ازاماتتاردىڭ قر كونستيتۋتسياسىنىڭ 24-بابىنىڭ 3-تارماعىندا قاراستىرىلعان قۇقىقتارى. 4-باپتىڭ 3-تارماعىندا «رەسپۋبليكا بەكىتكەن حالىقارالىق شارتتاردىڭ رەسپۋبليكا زاڭدارىنان باسىم بولاتىندىعى» تاعى ايتىلعان. ونىڭ ۇستىنە قازاقتاردىڭ ءوز پىكىرىن بىلدىرۋگە قاجەتتىلىگى امەريكاعا بايلانىپ وتىرعان جوق.
وسى كۇنگە دەيىن وتكەن ميتينگىلەرگە وعان قاتىسۋشىلاردىڭ ءبىر تيىن قاراجاتى جۇمسالعان ەمەس. ادەتتە ميتينگ كەزىندە قاراجات مەگافون، راتسيا، ءتۇرلى ءتۇستى شارف، بيوتۋالەت، ليستوۆكا، اۆتوبۋس، ۇيقتايتىن قاپ، سۋسىن، تاماق، ت.ب. الۋ ءۇشىن جۇمسالادى. قازاقستاندا بۇعان دەيىن وتكەن جيىنداردا مۇنداي نارسەلەردىڭ بىردە ءبىرى قولدانىلماعانىن جۇرت جاقسى بىلەدى.
سوندىقتان كەيبىرەۋلەر حالىق تالابىنان جالتارۋدىڭ امالدارىن قاراستىرىپ، «اۋرۋ باستىڭ ساقيناسىن ساۋ باسقا كوشىرگىسى» كەلەدى. مۇنداي اداستىرۋشىلىققا سەنىپ قالماۋ كەرەك. بىزگە كەرەگى حالىق پەن بيلىكتىڭ ديالوگى. ەڭ باستىسى حالىقتى الداي بەرۋدىڭ قاجەتى جوق!
سونداي-اق بيلىك نازارىنا اتا زاڭىمىزدىڭ 1-بابىنىڭ 2-ءشى تارماعىندا قاراستىرىلعان «مەملەكەت ءومىرىنىڭ اسا ماڭىزدى ماسەلەلەرى دەموكراتيالىق ادىستەرمەن، ونىڭ ىشىندە رەسپۋبليكالىق رەفەرەندۋمدا» (ارينە ءادىل رەفەرەندۋمدا!) شەشۋ مۇمكىندىگى بار ەكەندىگىن ەستەرىنە سالعىمىز كەلەدى.
پىكىر قالدىرۋ