“اقش-تىڭ قازاقستانداعى ەلشىلىگى قىزمەتكەرلەرى كۇندەلىكتى جاڭالىقتاردى جىبەرمەي وقىپ وتىرادى جانە اتالعان پىكىرلەردەن دە قۇلاعدار. بۇل اقپارات – جالعان” دەلىنگەن ەلشىلىكتىڭ ءبىرىنشى حاتشىسى دەۆيد گامبلدىڭ Tengrinews.kz تىلشىلەرىنە بەرگەن جاۋابىندا.

ديپلوماتتار ەلشى دجوردج كرولدىڭ وسىدان ءبىر ايداي ۋاقىت بۇرىن قازاقستاننىڭ باتىس وڭىرلەرىن نە ءۇشىن ارالاپ كەلگەنىن دە ايتىپ ءوتتى.

“اقش ەلشىسىنىڭ ءىس-ساپار باعدارلاماسى اشىق بولدى، ول اتىراۋ مەن اقتاۋ قالالارىنىڭ اكىمدەرىمەن جولىعىپ، ەكى ەل اراسىنداعى دوستىق بايلانىستىڭ 25 جىلدىعى اياسىندا پىكىر الماستى، ينۆەستيتسيا كولەمىن ارتتىرۋ ماسەلەلەرىن تالقىلادى سونىمەن قاتار، قر پرەزيدەنتى نۇرسۇلتان نازارباەۆتىڭ “100 ناقتى قادام – ۇلت جوسپارىن” جۇزەگە اسىرۋدا ەلشىلىكتىڭ جوسپارلارىمەن ءبولىستى” دەيدى اقش ەلشىلىگىنىڭ باس حاتشىسى.

اتالعان ساپار بارىسىندا دجوردج كرول اقتاۋ پورتىندا بولىپ، كەيىن ماڭعىستاۋدىڭ اۋليەلى جەرلەرىن ارالاعان. سونداي-اق، ول اتىراۋ كىتاپحاناسىندا لەكتسيا وقىدى.

ايتا كەتەيىك، 2016 جىلدىڭ 1 شىلدەسىندە قولدانىسقا ەنەتىن جەر كودەكسىنە قارسى قازاقستاندىقتار سوڭعى ەكى اپتادا بىرنەشە ميتينگ وتكىزىپ ۇلگەردى. اتىراۋدا باستالعان شەرۋ اقتوبە مەن سەمەي، اقتاۋ مەن جاڭاوزەن جانە قىزىلوردا قالالارىندا جالعاسىن تاپتى. نارازى توپتىڭ تالابى – جەردىڭ ساتىلۋى مەن شەتەلدىكتەرگە جالعا بەرىلۋىنە تىيىم سالۋ.

ال، الەۋمەتتىك جەلىلەردە وسىناۋ ميتينگتەردىڭ ارتىندا اقش پەن باتىس ەلدەرى تۇر دەگەندى ايتۋشىلار از ەمەس. ءتىپتى، “ەۋرازيا” ءبىرىنشى ارناسى الدەبىر سىرتقى كۇشتەردىڭ ميتينگ قاتىسۋشىلارىنا 150 اقش دوللارىنان تاراتىپ جاتقانىن سەنىممەن مالىمدەدى. ازاتتىق تىلشىسىنە جاۋاپ بەرگەن ءماجىلىس دەپۋتاتى بەكبولات تىلەۋحان دا ميتينگتەرگە الدەبىر سىرتقى جانە ىشكى كۇشتەردىڭ قاتىسى بار ەكەنىن ايتقان بولاتىن.

sn.kz