“AQŞ-tıñ Qazaqstandağı elşiligi qızmetkerleri kündelikti jañalıqtardı jibermey oqıp otıradı jäne atalğan pikirlerden de qwlağdar. Bwl aqparat – jalğan” delingen elşiliktiñ birinşi hatşısı Devid Gambldıñ Tengrinews.kz tilşilerine bergen jauabında.

Diplomattar elşi Djordj Kroldıñ osıdan bir ayday uaqıt bwrın Qazaqstannıñ batıs öñirlerin ne üşin aralap kelgenin de aytıp ötti.

“AQŞ elşisiniñ is-sapar bağdarlaması aşıq boldı, ol Atırau men Aqtau qalalarınıñ äkimderimen jolığıp, eki el arasındağı dostıq baylanıstıñ 25 jıldığı ayasında pikir almastı, investiciya kölemin arttıru mäselelerin talqıladı Sonımen qatar, QR Prezidenti Nwrswltan Nazarbaevtıñ “100 naqtı qadam – Wlt josparın” jüzege asıruda elşiliktiñ josparlarımen bölisti” deydi AQŞ elşiliginiñ bas hatşısı.

Atalğan sapar barısında Djordj Krol Aqtau portında bolıp, keyin Mañğıstaudıñ äulieli jerlerin aralağan. Sonday-aq, ol Atırau kitaphanasında lekciya oqıdı.

Ayta keteyik, 2016 jıldıñ 1 şildesinde qoldanısqa enetin Jer kodeksine qarsı qazaqstandıqtar soñğı eki aptada birneşe miting ötkizip ülgerdi. Atırauda bastalğan şeru Aqtöbe men Semey, Aqtau men Jañaözen jäne Qızılorda qalalarında jalğasın taptı. Narazı toptıñ talabı – jerdiñ satıluı men şeteldikterge jalğa beriluine tıyım salu.

Al, äleumettik jelilerde osınau mitingterdiñ artında AQŞ pen Batıs elderi twr degendi aytuşılar az emes. Tipti, “Euraziya” birinşi arnası äldebir sırtqı küşterdiñ miting qatısuşılarına 150 AQŞ dollarınan taratıp jatqanın senimmen mälimdedi. Azattıq tilşisine jauap bergen Mäjilis deputatı Bekbolat Tileuhan da mitingterge äldebir sırtqı jäne işki küşterdiñ qatısı bar ekenin aytqan bolatın.

sn.kz