مەملەكەت باسشىسىنىڭ جارلىعىمەن وتان قورعاۋشى كۇنى قارساڭىندا اسكەري جانە قىزمەتتىك مىندەتتەرىن اتقارۋ كەزىندە ەرلىك پەن باتىلدىق كورسەتكەن، سونداي-اق ۇلتتىق قاۋىپسىزدىك پەن ەلدىڭ قورعانىس قابىلەتىن قامتاماسىز ەتۋگە، زاڭدىلىق پەن قوعامدىق ءتارتىپتى نىعايتۋعا ەلەۋلى ۇلەس قوسقان  ءبىر توپ اسكەري قىزمەتشى، قۇقىق قورعاۋ ورگاندارى مەن ۇلتتىق قاۋىپسىزدىك قىزمەتكەرلەرى قازاقستان رەسپۋبليكاسىنىڭ مەملەكەتتىك ناگرادالارىمەن ماراپاتتالدى. بارلىعى 43 ادام وردەنمەن، 63 ادام مەدالمەن جانە 2 ادام قازاقستان رەسپۋبليكاسىنىڭ قۇرمەت گراموتاسىمەن اتاپ ءوتىلدى.

نۇرسۇلتان نازارباەۆ جينالعانداردى الداعى وتان قورعاۋشى كۇنىمەن جانە ۇلى جەڭىستىڭ 71 جىلدىعىمەن قۇتتىقتادى.

– ۇلى وتان سوعىسى – ۇمىتىلماس تاريح ساباعى. ءبىر جاعىنان، ول بىزگە الەمنىڭ نازىكتىگىن ەسكە سالادى. ەكىنشى جاعىنان، ادام رۋحىنىڭ بەرىكتىگى مەن قۋاتتىلىعىن كورسەتەدى. وتانىمىزدى قورعاي بىلگەن، بىزگە بەيبىت ءومىر سىيلاعان جەرلەستەرىمىز وسىنداي بولعان. سول سوعىستىڭ قاھارماندارىنىڭ ەسىمى تاريح پاراعىنا ماڭگى جازىلىپ قالدى. ءبىزدىڭ پارىزىمىز – ەلدىڭ قاۋىپسىزدىگىن ساقتاۋ، بيىل 25 جىلدىعىن اتاپ وتەتىن قازاقستاننىڭ تاۋەلسىزدىگىن قورعاۋ، – دەدى مەملەكەت باسشىسى.

قازاقستان پرەزيدەنتى ەل ازاماتتارى شيرەك عاسىر ۋاقىت بويى تۇراقتىلىق پەن كەلىسىمدە تاتۋ وتباسى رەتىندە ءومىر ءسۇرىپ جاتقانىنا نازار اۋداردى.

– بىراق بەيبىت كۇندە دە ەرلىككە ورىن بار. ۇشاقتى الدىڭعى ءشاسسيسىز قوندىرا  بىلگەن اۋە كەمەسىنىڭ كومانديرى دميتري ءروديننىڭ ەرلىگىن بۇكىل قازاقستاندىقتار بىلەدى. ول ءوزىنىڭ كاسىپقويلىعىنىڭ ارقاسىندا 121 ادامنىڭ ءومىرىن ساقتاپ قالدى. مەن بۇل ارەكەتتى ۇلگى تۇتۋعا لايىق قاھارماندىق دەپ سانايمىن. سوندىقتان وعان «حالىق قاھارمانى» اتاعىن بەرۋ تۋرالى شەشىم قابىلدادىم. پولكوۆنيك يگور كارمىكوۆ سەل كەزىندە بارلاۋ-ىزدەۋ توبىن تىكۇشاقپەن ەۆاكۋاتسيالادى. ومىرىنە قاۋىپ تونگەن 10 ادامدى قۇتقارىپ قالدى. مەملەكەت ونىڭ ەڭبەگىن ءىى دارەجەلى «ايبىن» وردەنىمەن اتاپ وتەدى. روتا كومانديرى فارحاد تاعىربەكوۆتىڭ ارقاسىندا 40 اسكەري قىزمەتشى امان قالدى. وعان «ەرلىگى ءۇشىن» مەدالى بەرىلەدى، – دەدى نۇرسۇلتان نازارباەۆ.

مەملەكەت باسشىسى ەرلىگىمەن ەرەكشەلەنگەن باسقا دا ادامداردى اتاپ ءوتتى.

– ءوز باسىن قاتەرگە تىگىپ، ادامداردى ورتتەن قۇتقارعان دانيار قاليەۆ ەرەن ەرلىكتىڭ ۇلگىسىن كورسەتتى. سوندىقتان «ەرلىگى ءۇشىن» مەدالىمەن ماراپاتتالادى. ارامىزدا ەل قاۋىپسىزدىگىن نىعايتۋعا زور ەڭبەك ءسىڭىرىپ جۇرگەن وزگە دە ازاماتتار بار. حالىقارالىق دەڭگەيدە تانىلعان مەرگەن قىزىمىز اسەم جاكەنوۆانى ەرەكشە اتاپ وتكىم كەلەدى. ول بۇگىن «جاۋىنگەرلىك ەرلىگى ءۇشىن» مەدالىنە لايىق دەپ تانىلدى، – دەدى قازاقستان پرەزيدەنتى.

نۇرسۇلتان نازارباەۆ ءوز باسىن قاتەرگە تىگىپ، ساربازىن كەۋدەسىمەن قورعاپ قالعان جانە كوپ جاراقات العان قايرات ۇمبەتوۆتىڭ ەرلىگىنە دە توقتالدى. ول وسى ەرلىگى ءۇشىن «حالىق قاھارمانى» اتاعىمەن ماراپاتتالدى.

قازاقستان پرەزيدەنتى ەرلىك پەن قاھارماندىقتىڭ وسىنداي ۇلگىسى ەلىمىزدە از ەمەس ەكەنىنە ريزاشىلىق ءبىلدىردى.

– كوبىڭىزدىڭ ءوز ەرلىكتەرىڭىزدى ايرىقشا نارسە دەپ سانامايتىندارىڭىزدى بىلەمىن. سىزدەر ءۇشىن پارىزدىڭ بارىنەن بيىك تۇراتىنىن كورسەتۋلەرىڭىز ەكى ەسە باعالاۋعا لايىق. بۇل – بۇكىل ەلىمىز ءۇشىن، قازىرگى كەزدە ار-نامىس ۇلگىسى قاجەت بولىپ وتىرعان جاستارىمىز ءۇشىن كەرەمەت ونەگە. سوندىقتان ءبىز ەرەكشە كوزگە تۇسكەن وتانداستارىمىزعا مەملەكەتتىك ناگرادالار تاپسىرامىز. ەلدىڭ قارقىندى دامۋى، ازاماتتارىنىڭ تىنىشتىعى، قازاقستاندىق ءپاتريوتيزمنىڭ نىعايۋى – ءبىزدىڭ پارىزىمىز وسى، – دەدى مەملەكەت باسشىسى.

شارا بارىسىندا اسكەري جانە قىزمەتتىك مىندەتىن اتقارۋ بارىسىنداعى كورسەتكەن باتىلدىعى مەن ەرلىگى ءۇشىن «Fokker-100» اۋە كەمەسىنىڭ كومانديرى د.رودينگە، ۇلتتىق ۇلان «ورتالىق» وڭىرلىك قولباسشىلىعىنىڭ شتاب باستىعى – 6505 اسكەري ءبولىمى كومانديرىنىڭ ءبىرىنشى ورىنباسارى ق.ۇمبەتوۆكە «حالىق قاhارمانى» اتاعى بەرىلدى.

I دارەجەلى «داڭق» وردەنىنە ۇلتتىق قاۋىپسىزدىك كوميتەتى توراعاسىنىڭ ورىنباسارى ن.بىلىسبەكوۆ، ىشكى ىستەر ءمينيسترىنىڭ ءبىرىنشى ورىنباسارى  م.دەمەۋوۆ، ۇجىمدىق قاۋىپسىزدىك شارتى ۇيىمى باس حاتشىسىنىڭ ورىنباسارى ا.جانقۇليەۆ، پاۆلودار وبلىسىنىڭ پروكۋرورى م.جورگەنباەۆ يە بولدى.

ءىI دارەجەلى «داڭق»  وردەنى مەملەكەتتىك قىزمەت ىستەرى مينيسترلىگى سىبايلاس جەمقورلىققا قارسى ءىس-قيمىل ۇلتتىق بيۋروسى (سىبايلاس جەمقورلىققا قارسى قىزمەت) توراعاسىنىڭ ورىنباسارى ت.تاتۋباەۆقا، قورعانىس مينيسترلىگى 14776 اسكەري ءبولىمى ءباا جانە كۋۆەيت جانە كاتار مەملەكەتتەرىندەگى اسكەري اتتاشەسى قىزمەتىن قوسا اتقارۋشى ە.ورازوۆقا تاپسىرىلدى.

I دارەجەلى «ايبىن» وردەنىمەن ىشكى ىستەر مينيسترلىگىنىڭ دەپارتامەنت باستىعى ا.بايمۋرزين، قورعانىس مينيسترلىگى 14776 اسكەري ءبولىمى كومانديرىنىڭ ورىنباسارى – ورتالىق باستىعى س.ىزتىلەۋوۆ ماراپاتتالدى.

ءىI دارەجەلى «ايبىن» وردەنى ۇلتتىق قورعانىس ۋنيۆەرسيتەتى باستىعىنىڭ ءبىرىنشى ورىنباسارى س.اسانوۆقا، مەملەكەتتىك كۇزەت قىزمەتىنىڭ دەپارتامەنت باستىعى ن.جۇماباەۆقا، قورعانىس مينيسترلىگى 10228 اسكەري ءبولىمىنىڭ كومانديرى ر.جانسەيىتوۆكە، قارۋلى كۇشتەرى اۋە قورعانىسى كۇشتەرى باس قولباسشىسىنىڭ باسقارماسى باس شتابى باستىعىنىڭ ورىنباسارى ءا.ىبىراەۆقا، ۇلتتىق قاۋىپسىزدىك كوميتەتى «ارىستان» قىزمەتى باستىعىنىڭ ءبىرىنشى ورىنباسارى ف.قامەنوۆكە، ۇلتتىق قاۋىپسىزدىك كوميتەتى شەكارا قىزمەتى جەكە 1-ءشى اۆياتسيالىق بازاسىنىڭ كومانديرى ي.كارمىكوۆقا، ۇلتتىق ۇلان «وڭتۇستىك» وڭىرلىك قولباسشىلىعى 5572 اسكەري ءبولىمىنىڭ كومانديرى ۆ.پۋزيككە، مەملەكەتتىك كۇزەت قىزمەتىنىڭ دەپارتامەنت باستىعى ك.تۇرسىنباەۆقا بەرىلدى.

«ەرلىگى ءۇشىن» مەدالى ىشكى ىستەر مينيسترلىگى قوستاناي وبلىسى توتەنشە جاعدايلار دەپارتامەنتى قوستاناي قالاسى № 3 ءورت ءسوندىرۋ ءبولىمىنىڭ بولىمشە كومانديرى د.قاليەۆكە، ىشكى ىستەر مينيسترلىگى استانا قالاسى ىشكى ىستەر دەپارتامەنتى جول-پاترۋلدىك پوليتسياسى پولكىنىڭ  پوليتسەيى  ب.قارىمباەۆقا، روتا كومانديرى – قورعانىس مينيسترلىگى 29011 اسكەري ءبولىمى شتاب باتالونى كومانديرىنىڭ ورىنباسارى ف.تاعىربەكوۆكە تاپسىرىلدى.

«جاۋىنگەرلىك ەرلىگى ءۇشىن» مەدالىمەن قورعانىس مينيسترلىگى 44736 اسكەري ءبولىمى ارنايى ماقساتتاعى بارلاۋ روتاسىنىڭ مامانى (بارلاۋشى-مەرگەن) ءا.جاكەنوۆا، قورعانىس مينيسترلىگى 21751 اسكەري ءبولىمى اۆياتسيالىق ەسكادريلياسىنىڭ كومانديرى ا.قۇلباسوۆ، قورعانىس مينيسترلىگى 85395 اسكەري ءبولىمى تانك باتالونىنىڭ كومانديرى د.مۇحامەتجانوۆ، قورعانىس مينيسترلىگى 36803 اسكەري ءبولىمى زىمىران-تەحنيكالىق ديۆيزيونىنىڭ كومانديرى م.سماعۇلوۆ ناگرادتالدى.