قازاقستان رەسپۋبليكاسى كونستيتۋتسياسىنىڭ 44-بابىنىڭ  3) تارماقشاسىنا سايكەس مەملەكەتتىك باسقارۋ جۇيەسىن جاڭعىرتۋ جانە ونىڭ تيىمدىلىگىن ارتتىرۋ ماقساتىندا قاۋلى ەتەمىن:

1. قازاقستان رەسپۋبليكاسىنىڭ اقپارات جانە كوممۋنيكاتسيالار مينيسترلىگى، وعان قازاقستان رەسپۋبليكاسىنىڭ ينۆەستيتسيالار جانە دامۋ مينيسترلىگىنىڭ اقپارات، اقپاراتتاندىرۋ جانە بايلانىس سالاسىنداعى   فۋنكتسيالارى مەن وكىلەتتىكتەرى بەرىلە وتىرىپ، قۇرىلسىن.

2. قازاقستان رەسپۋبليكاسىنىڭ ۇلتتىق ەكونوميكا مينيسترلىگى، قازاقستان رەسپۋبليكاسىنىڭ اۋىل شارۋاشىلىعى  مينيسترلىگىنە جەر رەسۋرستارىن باسقارۋ، گەودەزيالىق جانە كارتوگرافيالىق قىزمەت سالاسىنداعى مەملەكەتتىك ساياساتتى قالىپتاستىرۋ جانە ىسكە اسىرۋ اياسىنداعى فۋنكتسيالارى مەن وكىلەتتىكتەرى بەرىلە وتىرىپ، قايتا ۇيىمداستىرىلسىن.

3. قازاقستان رەسپۋبليكاسىنىڭ ۇكىمەتى:

1) قازاقستان رەسپۋبليكاسىنىڭ پرەزيدەنتى اكىمشىلىگىمەن كەلىسۋ بويىنشا  قايتا ۇيىمداستىرىلاتىن جانە  قۇرىلعان مەملەكەتتىك ورگانداردىڭ شتات سانىن قايتا ءبولۋدى;

2) وسى جارلىقتان تۋىندايتىن وزگە دە شارالار قابىلداۋدى قامتاماسىز ەتسىن.

4. «قازاقستان رەسپۋبليكاسى ۇكىمەتىنىڭ قۇرىلىمى تۋرالى» قازاقستان رەسپۋبليكاسى پرەزيدەنتىنىڭ 1999 جىلعى 22 قاڭتارداعى № 6 جارلىعىنا مىناداي تولىقتىرۋ ەنگىزىلسىن:

1-تارماقتا:

«قازاقستان رەسپۋبليكاسىنىڭ مەملەكەتتىك قىزمەت ىستەرى مينيسترلىگى;» دەگەن جولدان كەيىن مىناداي مازمۇنداعى جولمەن تولىقتىرىلسىن:

«قازاقستان رەسپۋبليكاسىنىڭ اقپارات جانە كوممۋنيكاتسيالار مينيسترلىگى;».

5. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.

6. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.

استانا، اقوردا، 2016 جىلعى  6 مامىر

№ 253