مادەنيەت سۋرەتتەر سويلەيدى الەۋمەت
“ادام توزگىسىز ايازعا توتەپ بەرەتىن ەرجۇرەك قازاقتار” شەتەلدىكتەردى تاڭ قالدىردى
kerey.kz
موڭعوليادا -40 گرادۋس ايازعا توتەپ بەرەتىن جۇزدەگەن ەرجۇرەك قازاقتىڭ ءومىرى شەتەلدىكتەردى تاڭ قالدىردى دەپ حابارلايدى NUR.KZ پورتالى.
تانىمال بريتاندىق Daily Mail باسىلىمى موڭعولياداعى جەرگىلىكتى قازاقتاردىڭ ومىرىنەن ءبىر كۇندى جاريا ەتتى.
“بۇل ادام سەنگىسىز فوتولار شالعاي موڭعوليادا ادام توزگىسىز جاعدايدا ءومىر ءسۇرىپ جاتقان وتباسىنىڭ ءومىرىن كورسەتەدى. جۇزدەگەن ەرجۇرەك قازاقتار ءار جىلدىڭ اقپانىنان ساۋىرىنە دەيىن موڭعوليانىڭ باتىسىنداعى التاي تاۋىنىڭ 100 ميل قاشىقتىعىن كەسىپ وتەدى”، – دەپ جازعان باسىلىم.
فوتوگراف تيموتي اللەن شوقان مەن ونىڭ ايەلى پەمانىڭ وتباسىندا قوناقتاپ، ولاردىڭ ماۋسىمدىق كوشتەرىنەن تاماشا فوتولار تۇسىرگەن.
بۇركىتپەن اڭشىلىق قۇراتىن قازاق وتباسى تاماقتانىپ وتىر.
قازاقتار 100 ميل قاشىقتىقتى قاقاعان -40 گرادۋس ايازدا كەسىپ وتۋگە ءماجبۇر.
ولار تاۋدان مىڭداعان مالىن ايداپ وتەدى.
2016 جىلدىڭ قاڭتارىندا فوتوگراف قازاقتارعا ىلەسىپ، ولاردىڭ ءومىرىن ءوز كوزىمەن كورىپ قايتتى.
ۇزاق جولعا شىققان قازاقتاردىڭ قاۋىپكە تولى شىتىرمان ومىرىنە بۇل فوتولار كۋا بولا الادى.
200 وتباسىنان بولەك قازاقتار مىڭعا جۋىق مالىن دا كوشىرىپ ۇلگەرەدى.
تيموتي اللەن بۇل وتباسىمەن ءبىر جىل بۇرىن دا ساپارعا شىعىپ كورگەن.
قاقاعان ايازدا تۇرعىندار بەتىن قىمتاپ جۇرەدى.
وسى جىلى قازاق وتباسىنىڭ ءومىرىن تاماشالاۋعا ەۋروپا، اقش جانە جاڭا زەلانديادان سەگىز فوتوگراف پەن 13 موڭعول كەلگەن. ولار دا قازاقتارمەن ىلەسىپ، الىس ساپارعا اتتاندى.
قازاقتار دىتتەگەن جەرىنە جەتۋ ءۇشىن بەس كۇندەي ۋاقىتىن جولعا جۇمسايدى.
اللەن قازاق وتباسىنىڭ وسىلايشا جىل سايىن كوكتەمگى جايىلىمعا شىعاتىنىن ءسوز ەتتى.
وتباسى جۇك كولىگىمەن كوشە الاتىنىنا قاراماستان، ءۇيىر مالدى جاياۋ كوشىرۋگە تۋرا كەلەدى.
قازاقتارعا ىلەسكەن توپ ءۇش كولىك پەن ءبىر ءىرى جۇك كولىگىن پايدالاندى. ال قازاقتار ءبارىن سىيدىرۋ ءۇشىن سەگىز كيىز ءۇيىن الا شىقتى.
وتباسى ءۇيىر-ءۇيىر مالىمەن تاۋ اراسىن كەسىپ ءوتتى.
“بۇل مەن ءۇشىن ومىرىمدەگى ەڭ كۇردەلى ەكسپەديتسيا بولدى. 21 ادامنىڭ عانا التاي تاۋىن قىستا كەسىپ ءوتۋى مۇنىڭ قاسىندا ايتارلىقتاي ەرلىك ەمەس”، – دەيدى اللەن.
فوتولار جۇزدەگەن قازاقتىڭ تاۋدا بوراننان تۇك كورىنبەيتىن جاعدايدا دا جولىن تاۋىپ، دىتتەگەن جەرىنە مالىمەن قوسا امان-ەسەن جەتەتىنىن كورسەتەدى.
پىكىر قالدىرۋ