باس پروكۋراتۋرا: 21 مامىردا ۇستالعان 51 ادامعا شارا قولدانىلدى
kerey.kz
پوليتسيا جيىنعا كەلگەندەردى ۇستاپ جاتىر. الماتى، 21 امىر 2016 جىل.
قازاقستاندا 21 مامىردا «جەر ماسەلەسى بويىنشا شەرۋگە» رۇقسات بەرىلمەگەنىنە قاراماستان كوشەگە شىققانداردان پوليتسيا ۇستاعان 51 ادام اكىمشىلىك سوتقا تارتىلعان. بۇل تۋرالى بۇگىن استانادا ءوتىپ جاتقان «جەر كوميسسياسىنىڭ» ءۇشىنشى وتىرىسىندا قازاقستان باس پروكۋرورىنىڭ ورىنباسارى اندرەي كراۆچەنكو مالىمدەدى.
«اكىمشىلىك جاۋاپقا تارتىلعان 51 ادامنىڭ تورتەۋى اكىمشىلىك قاماۋعا الىندى، 12 ادامعا ايىپپۇل سالىنىپ، 21 ادامعا سوت ەسكەرتۋ جاسادى» دەدى باس پروكۋراتۋرا وكىلى. ول 21 مامىرداعى وقيعالار بويىنشا قىلمىستىق ىستەر قوزعالعان جوق دەپ مالىمدەدى.
كراۆچەنكونىڭ سوزىنشە، پروكۋراتۋرا «ميتينگكە شىعۋ – زاڭسىز» ەكەنى تۋرالى الدىن الا ەسكەرتۋ جاساپ، وعان قاتىسۋعا نيەتىن اشىق بىلدىرگەن ءاربىر ازاماتپەن جەكە اڭگىمە وتكىزگەنىنە قاراماستان ادامدار «وزدەرىن نە توسىپ تۇرعانىن بىلە تۇرا» كوشەگە شىققان.
«ولاردىڭ اربىرىنە كەلەڭسىز جايتقا كەزىگۋى، پوليتسيا مەن ونىڭ اراسىندا پروبلەما تۋىنداۋى مۇمكىن ەكەنى تۋرالى ەسكەرتىلدى. سوعان قاراماستان كەيبىرى شىقتى» دەدى كراۆچەنكو.
ونىڭ ايتۋىنشا، قازىرگى كەزگە دەيىن پوليتسيا وكىلدەرىنىڭ ءىس-ارەكەتىنە قاتىستى ازاماتتاردان پروكۋراتۋراعا تۇسكەن 30 شاعىمنىڭ 8-ءى 21 مامىرداعى وقيعالارعا قاتىستى.
«ماسەلەن، اقتوبەدە ۇستالىپ، سوت اكىمشىلىك قاماۋعا الۋ تۋرالى شەشىم شىعارعان ەكى ادامنىڭ ءوتىنىشى قارالدى. سوت ولارعا شىعارىلعان اكىمشىلىك جازا مەرزىمىن 7 تاۋلىككە قىسقارتقان سوڭ كەشە ولار بوستالدى» دەپ حابارلادى كراۆچەنكو.
«جەر كوميسسياسى» مۇشەسى مۇحتار تايجاننىڭ كەي ازاماتتاردىڭ ۇستىنەن «ۇلتارالىق ارازدىق قوزدىرۋ» جانە «بيلىكتى كۇشپەن وزەرتۋگە شاقىرۋ» تۋرالى باپتار بويىنشا قىلمىستىق ىستەر قوزعالعانى تۋرالى اقپاراتقا قاتىستى قويعان ساۋالىنا باس پروكۋرور ورىنباسارى اندرەي كراۆچەنكو ونداي ايىپتاۋلارعا «ايعاقتاردى بۇگىنگى كوميسسيا وتىرىسىنان كەيىن جەكە كەزدەسىپ كورسەتۋگە» دايىن ەكەنىن ايتتى.
21 مامىردا قازاقستاندا بىرنەشە قالادا “جەر ماسەلەسىنە” قاتىستى جيىنعا كەلگەندەردى پوليتسيا جاپپاي ۇستاپ اكەتكەن ەدى. ۇستالعاندار اراسىندا بۇل كۇنگى وقيعا تۋرالى حابار دايىنداۋعا بارعان ونداعان جۋرناليست تە بولدى. رەسمي بيلىك ول كۇنى ونداعان ازامات ۇستالعان دەسە، ازاماتتىق بەلسەندىلەر پوليتسيا كوشەدەن بىرنەشە ءجۇز ادامدى زاڭسىز ۇستاپ اكەتتى دەگەن ءۋاج ايتادى.
ازات ەۋروپا / ازاتتىق راديوسى
پىكىر قالدىرۋ