قىرىپ تاستاي بەرۋ قۇقىقتىق مەملەكەتكە لايىق ەمەس
kerey.kz
بۇگىن، 10-ماۋسىم كۇنى قازاقستان رەسپۋبليكاسى تەررورعا قارسى ورتالىعىنىڭ اقتوبە وبلىستىق تەرروريزممەن كۇرەس جونىندەگى جەدەل شتاب كۇشتەرى ىزدەۋ جاريالانعان 5 لاڭكەستىڭ كوزى جويىلعانىن حابارلادى. ۇقك مەن ءىىم ارنايى ماقساتتاعى بولىمشەلەرى نەكراسوۆ كوشەسىندەگى لاڭكەستەر تىعىلعان پاتەردى قورشاپ، وقشاۋلاعان. قاۋىپسىزدىك شارالارىن ساقتاپ، تۇرعىنداردى ەۆاكۋاتسيالاپتى. «كەلىسسوز بارىسىندا لاڭكەستەر وزدىگىنەن بەرىلۋدەن باس تارتىپ، اتىستى باستادى. ارنايى جاساق كۇشتەرىنىڭ باتىل ارەكەتىمەن پاتەردەگى 4 لاڭكەستىڭ كوزى جويىلدى» دەلىنگەن رەسمي حابارلامادا. كەيىنىرەك تاعى بىرەۋى وققا ۇشقان.
قۇقىق قورعاۋ قۇرىلىمدارىنىڭ قولىندا مۇنداي ارەكەت جاساۋشىلاردى قۇرىقتاۋدىڭ ايلا-امالدارى دا، تەحنيكالىق مۇمكىندىكتەرى دە جەتكىلىكتى عوي. ءتىپتى كوزدەن جاس اعىزاتىن قۇرىلعىلار، ەستەن تاندىرىپ تاستايتىن حيميالىق گراناتالار بار ەمەس پە؟ الگىلەردىڭ قاتارىندا مۇلدە جازىقسىز، ايتەۋىر توپقا ەرىپ جازىقتى بولعاندار دا بار شىعار. سولاردى قولعا ءتۇسىرىپ، ارەكەتتەرىنىڭ سەبەپتەرىن انىقتاپ، ىستەگەن قىلمىستارىنا قاراي لايىقتى جازا تاعايىنداۋ ءجون ەمەس پە ەدى. 2011 جىلى شۇبارشيدە 11 ادام، بورالدايدا 5 ادام، 2012 جىلى الماتىدا «اقكەنت» شاعىن اۋدانىندا 6 ادام، بۇگىن مىنە تاعى بەس ادام مەرت بولدى.
قازاقستاننىڭ سوتسىز، تەرگەۋسىز ءوز ازاماتتارىن وسىلاي قىرىپ تاستاي بەرۋى قانشالىقتى دۇرىس بولادى؟ قازاقستان قۇقىقتىق مەملەكەت دەيتىنىمىز قايدا؟
پىكىر قالدىرۋ