ءماجىلىس جەر كودەكسىنىڭ بىرقاتار نورمالارىن توقتاتۋدى قاراستىراتىن زاڭ جوباسىن ماقۇلدادى
kerey.kz
بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسى جەر كودەكسىنىڭ جەكەلەگەن نورمالارىنىڭ قولدانىسىن جانە «قازاقستان رەسپۋبليكاسىنىڭ جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» 2015 جىلعى 2 قاراشاداعى قازاقستان رەسپۋبليكاسى زاڭىنىڭ قولدانىسقا ەنگىزىلۋىن توقتاتا تۇرۋ تۋرالى» زاڭ جوباسىن ەكىنشى وقىلىمدا ماقۇلدادى، دەپ حابارلايدى قازاقپارات. ەندى قۇجات پارلامەنت سەناتىنىڭ تالقىسىنا شىعارىلاتىن بولادى.
ءماجىلىس دەپۋتاتى سەرگەي زۆولسكيدىڭ ايتۋىنشا، زاڭ جوباسىن تالقىلاۋ بارىسىندا دەپۋتاتتار تاراپىنان جەر قاتىناستارىن رەتتەۋگە باعىتتالعان باسقا دا بىرقاتار ۇسىنىستار كەلىپ تۇسكەن. سونىڭ ىشىندە اۋىل شارۋاشىلىعى ماقساتىنداعى جەرلەردى پايدالانۋ ماسەلەلەرى دە بار. الايدا، ونى باستاما جاساعان دەپۋتاتتار كەيىننەن وزدەرى الىپ تاستادى. «ءبىز جەر زاڭناماسىنا قاتىستى زاڭنامالىق وزگەرىستەر ەنگىزۋ ماسەلەسىنى تەك قر پرەزيدەنتىنىڭ تاپسىرماسى بويىنشا قۇرىلعان جەر رەفورماسى جونىندەگى رەسپۋبليكالىق كوميسسيانىڭ وتىرىستارى اياقتالعاننان كەيىن عانا قاراستىرامىز دەپ شەشتىك. كوميسسيا جەرگىلىكتى جۇرتشىلىقتىڭ پىكىرلەرىن، وڭىرلەردەگى ماسەلەلەردى تەرەڭ قاراستىرىپ، تالقىلاۋعا كىرىسكەن. وسىعان بايلانىستى، قارالىپ وتىرعان زاڭ جوباسىندا مەملەكەت باسشىسىنىڭ مامىر ايىنداعى موراتوري تۋرالى جارلىعىن ىسكە اسىرۋ تەتىكتەرى عانا قامتىلىپ وتىر»، – دەدى س.زۆولسكي.
زاڭ جوباسى جەر زاڭناماسىنىڭ كەيبىر نورمالارىن قولدانۋعا موراتوري ەنگىزۋ تۋرالى قر پرەزيدەنتىنىڭ اعىمداعى جىلعى جارلىعىن ورىنداۋ ماقساتىندا ازىرلەنگەن. اتالعان زاڭ جوباسىمەن اعىمداعى جىلدىڭ 31 جەلتوقسانىنا دەيىن «قر جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭنىڭ جانە جەر كودەكسىنىڭ بىرقاتار نورمالارى توقتاتىلادى. اتاپ ايتقاندا كودەكستەگى شەتەلدىكتەرگە، ازاماتتىعى جوق ادامدارعا، شەتەلدىك زاڭدى تۇلعالارعا جارعىلىق كاپيتالىنداعى شەتەلدىكتەر مەن ازاماتتىعى جوق ادامداردىڭ، شەتەلدىك زاڭدى تۇلعالاردىڭ ۇلەسى ەلۋ پايىزدان اساتىن زاڭدى تۇلعالارعا اۋىل شارۋاشىلىعى ماقساتىنداعى جەر ۋچاسكەلەرىن جالداۋ شارتتارى مەن ۋاقىتشا جەردى پايدالانۋ قۇقىعىن بەرۋمەن، سونىمەن قاتار، قازاقستان رەسپۋبليكاسىنىڭ ازاماتتارىنا جانە مەملەكەتتىك ەمەس زاڭدى تۇلعالارعا مەملەكەتتىك مەنشىكتەگى اۋىل شارۋاشىلىعىنداعى جەر ۋچاسكەلەرىنە جەكە مەنشىك قۇقىعىن بەرۋمەن بايلانىستى نورمالارىنىڭ قولدانىسقا ەنگىزۋ مەرزىمى توقتاتىلادى.
پىكىر قالدىرۋ