اقتوبە وبلىسىندا 1 مىڭ 665 “راديكالدىق ۇستانىمداعى” ادام بار دەپ مالىمدەدى بۇگىن ۇلتتىق قاۋىپسىزدىك كوميتەتى اقتوبە وبلىستىق دەپارتامەنتىنىڭ باستىعى نۇرلان قادىرباەۆ.

ازاتتىق ءتىلشىسىنىڭ حابارلاۋىنشا، قادىرباەۆ بۇل تۋرالى بۇگىن اقتوبەدەگى ۇلتتىق گۆارديانىڭ 6655 اسكەري بولىمىندە پرەمەر-مينيستر كارىم ءماسىموۆتىڭ قاتىسۋىمەن وتكەن انتيتەررورلىق شتاب جيىندا ايتتى.

اقتوبەدەگى شابۋىلدار مەن وبلىستاعى قاۋىپسىزدىككە قاتىستى سويلەگەن قادىرباەۆ اتالعان ءبىر جارىم مىڭنان استام ادامنىڭ 90-ى “قاۋىپتى جيھادشى” ەكەنىن، “ىڭعايلى ءساتىن كۇتىپ جيھادقا دايىن وتىرعانىن” ايتتى. ء“بىز جۇمىس جاساپ، 50 ءسالافيتتى رايىنان قايتاردىق. كوپ جاعدايدا ولاردى رايىنان قايتارۋ قيىن. سەبەبى ءبىزدىڭ وڭىردە ساۋاتتى تەولوگتار مەن بەدەلدى يمامدار اسا تاپشى” دەدى قادىرباەۆ. ول وسىعان بايلانىستى ۇكىمەتتەن اقتوبە وبلىسى بويىنشا ءدىني ماماندار تاپشىلىعى ماسەلەسىن شەشۋگە كومەكتەسۋدى سۇرادى.

قادىرباەۆ بۇعان قوسا ۇقك وبلىستا 14 “راديكالدىق توپ وكىلدەرىن شەتەلگە كەتپەك ارەكەتىن” توقتاتقانىن ايتتى.

ول شابۋىلدار مەن ودان كەيىنگى ارنايى وپەراتسياداردا ۇقك دەپارتامەنتى مەن ىشكى ىستەر دەپارتامەنتى ماتەريالدىق-تەحنيكالىق قامتاماسىز ەتىلۋ جاعىنان قيىندىق كورگەنىن دە ايتتى. ونىڭ سوزىنشە، ۇقك دەپارتامەنتىنىڭ عيماراتىنىڭ ءوزى زاماناۋي قاۋىپسىزدىك تالاپتارىنا ساي كەلمەيدى. دەپارتامەنتتە زاماناۋي باقىلاۋ قۇرىلعىلارى دا جوق ەكەنىن ايتتى قادىرباەۆ.

اقتوبەدە 5 ماۋسىمدا ءبىر توپ قارۋلى ادام ەكى قارۋ-جاراق دۇكەنى مەن اسكەري بولىمگە شابۋىلداپ، سالدارىنان رەسمي مالىمەت بويىنشا سەگىز ادام قازا تاپقان. شابۋىلدان كەيىنگى تەرروريزمگە قارسى ارنايى وپەراتسيالار بارىسىندا 9 كۇدىكتى ۇستالىپ، 18-ءىنىڭ كوزى جويىلعانى حابارلانعان.

ازاتتىق راديوسى