الماتى ىشكى ىستەر دەپارتامەنتى رەسمي تۇردە قالادا ساعات 12:20-دا تەررورلىق قاۋىپتىڭ قىزىل دەڭگەيى (ەڭ جوعارعى – رەد.) جاريالانعانىن مالىمدەدى.

ءىىد تاراتقان حابارلامادا “وسىعان بايلانىستى قالانىڭ بارلىق تۇرعىندارى مەن قوناقتارىن تەررور قاۋپىنىڭ قىزىل دەڭگەيى تالاپتارىن سوزگە كەلمەستەن ورىنداۋ تۋرالى ەسكەرتەمىز.

ءىىد قىزىل دەڭگەيدىڭ تەررورلىق شابۋىل جاسالعاننان كەيىن ءارى تەررورلىق ارەكەتتىڭ قايتالانۋ قاتەرى بولعان كەزدە جاريالاناتىنىن ەسكەرتەدى.

ءىىد بۇل جاعدايدا پوليتسەيلەر ادامداردى ءتىنتىپ، جەكە زاتتارىن، كولىكتەرىن تولىق تەكسەرۋى جانە قوزعالىستارىن شەكتەۋى مۇمكىن ەكەنىن حابارلايدى. مۇنان بولەك، پوليتسيا وكىلدەرى تۇرعىن ۇيلەرگە، عيماراتتارعا كەدەرگىسىز كىرۋى ءتيىس.

تەلەكوممۋنيكاتسيالىق جۇيەلەرمەن (الەۋمەتتىك جەلى) بەرىلگەن اقپاراتتار تەكسەرىلۋى مۇمكىن. ونىڭ ۇستىنە بارلىق ارنايى جاساقتار جوعارى جاۋىنگەرلىك دايىندىققا كەلتىرىلدى، اۋەجايلار، وزەن-كول، تەڭىز پوتتارى، مەترو، تەمىرجول بەكەتتەرى، اۆتوۆوكزالداردا ارنايى قۇرالداردى پايدالاناتىن تەكسەرىس كۇشەيتىلدى.

وقيعا ورنىنا بارعان ازاتتىق تىلشىلەرىنىڭ حابارلاۋىنشا، قازىر المالى ءىىب-ءسى (بايتۇرسىنۇلى مەن قاراساي باتىر كوشەلەرى قيىلىسى ماڭى) قورشاۋعا الىنعان، سارى لەنتامەن بەلگىلەنگەن قورشاۋ پەريمەترىمەن تۇرعان پوليتسەيلەردىڭ ءبارى تولىق قارۋلانعان، بەرەندى كۇرتەلەر كيگەن. الايدا ولار تىلشىلەرگە ەشقانداي اقپارات بەرمەي تۇر.

ازاتتىق تىلشىلەرى پوليتسيا قىزمەتكەرلەرىنىڭ ءبىر-بىرىمەن راتسيا ارقىلى حابارلاسقاندارىنان قاشىپ كەتكەن قارۋلى ادامنىڭ (الدە ادامداردىڭ) ءالى ۇستالماعانىن، پوليتسيا جاساعىنىڭ سەيفۋللين جانە گوگول كوشەلەرى قيىلىسىندا ارەكەت ەتىپ جاتقانىن ەستىگەن.

بۇعان دەيىن الەۋمەتتىك جەلى جانە جەرگىلىكتى اقپارات اگەنتتىكتەرىنەن تاراعان حابارلاردا المالى اۋداندىق ءىىب الدىندا بىرنەشە ادامعا وق تيگەنى تۋرالى ايتىلعان ەدى. Facebook جەلىسىندە “مەرگەن پروحانت” ەسىمدى قولدانۋشى المالى اۋداندىق ىشكى ىستەر باسقارماسى جانىندا “قارا ءتۇستى كيىم كيگەن بەلگىسىز ەر ادام وق اتىپ، قاشقانىن” جازدى. ال وقيعا ورنىنا بارعان ازاتتىق ءتىلشىسى ءىىب الدىندا جەدەل مەديتسينالىق جاردەمنىڭ بىرنەشە كولىگى تۇرعانىن ايتادى.“جاسى جيىرما بەس شاماسىنداعى جىگىت”

ازاتتىق تىلشىلەرىنە سول ماڭداعى تۇرعىندار وقيعانىڭ تاڭعى ساعات 10:30-11:00 ارالىعىندا باستالعانىن، اتىس داۋىسىن ەستىگەندەرىن ايتقان. اتىس كەزىندە وقيعا ورنىندا بولعان كۋاگەردىڭ ايتۋىنشا، “قارا فۋتبولكا كيگەن 25 جاس شاماسىنداعى جىگىت اۆتوماتپەن جۇرگەن.” ال المالى اۋداندىق ءىىب كەزەكشى ءبولىمى ازاتتىققا پوليتسيا جاساعىنىڭ دابىل بويىنشا كوتەرىلگەنىن راستادى. ازاتتىق تىلشىسىنە ءىىب كەزەكشىسى “پوليتسياعا جەدەل دابىل بەلگىسى بەرىلگەنىن” عانا ايتىپ، باسقا مالىمەت بەرمەدى.

كۋاگەرلەردىڭ ايتۋىنشا، باسقارما جانىنداعى بازار قاسىندا بىرنەشە اتىس ءۇنى ەستىلگەن. پوليتسيا ازىرگە رەسمي اقپارات تاراتپاي وتىر، پوليتسيامەن اتىسقانداردىڭ كىم ەكەنى بەلگىسىز.

ازات ەۋروپا / ازاتتىق راديوسى