ۇقك باسشىسى الماتىداعى شابۋىلعا كۇدىكتىنى ۇستاۋ جايلى ايتتى
kerey.kz
ۇقك توراعاسى ۆلاديمير جۇماقانوۆ پەن قازاقستان پرەزيدەنتى نۇرسۇلتان نازارباەۆ.
ۇلتتىق قاۋىپسىزدىك كوميتەتىنىڭ (ۇقك) توراعاسى ۆلاديمير جۇماقانوۆ استانادا وتكەن قاۋىپسىزدىك كەڭەسىنىڭ شۇعىل جيىنىندا الماتىداعى ىشكى ىستەر ءبولىمى مەن ۇقك دەپارتامەنتىنە جاسالعان شابۋىلعا كۇدىكتىنىڭ ۇستالعانى تۋرالى ايتتى.
جۇماقانوۆتىڭ سوزىنشە، ۇستالعان كۇدىكتى – 1990 جىلى قىزىلوردا وبلىسىندا تۋعان رۋسلان كۇلەكباەۆ ەسىمدى ازامات. ۇقك مالىمەتىنشە، كۇدىكتى سوڭعى ۋاقىتتا الماتىنىڭ ىلە اۋدانىنداعى ىنتىماق اۋىلىندا تۇرعان. ۇيالى تەلەفون ساتۋمەن اينالىسقان.
“2010 جىلى 27 تامىزدا شىمكەنتتىڭ ەڭبەكشى اۋداندىق سوتى ونى قىلمىستىق كودەكستىڭ 178-بابىنىڭ 2-تارماعى بويىنشا (“زورلىق-زومبىلىق قولدانىپ كىسى توناۋ”) سوتتاعان. 2012 جىلى 8 مامىردا قىزىلوردا قالالىق سوتى ونى 251-باپ بويىنشا (“اتىس قارۋىن زاڭسىز يەلەنىپ، ساقتادى”) دەگەن ايىپپەن ەكى جىل 11 ايعا سوتتاعان” دەدى جۇماقانوۆ. ول كۇلەكباەۆتىڭ تۇرمەدە “سالافيتتەرمەن جاقىن بولعانىن” دا ايتتى.
بۇگىن تاڭەرتەڭ الماتىدا المالى اۋداندىق ىشكى ىستەر ءبولىمى مەن ۇقك دەپارتامەنتىنە شابۋىل جاسالعان. ىشكى ىستەر مينيسترلىگىنىڭ مالىمەتىنشە، شابۋىلدان ءۇش پوليتسيا قىزمەتكەرى مەن ەكى بەيبىت تۇرعىن قازا تاپقان. سەگىز ادام جارالانىپ اۋرۋحاناعا تۇسكەن.
قازاقستان پرەزيدەنتى نۇرسۇلتان نازارباەۆ شابۋىلدى تەراكت دەپ اتادى.
نازارباەۆ: الماتىداعى شابۋىل – تەراكت
نۇرسۇلتان نازارباەۆ.
قازاقستان پرەزيدەنتى نۇرسۇلتان نازارباەۆ الماتىدا بولعان شابۋىلداردى تەررورلىق اكت دەپ اتادى.
بۇگىن تۇستەن كەيىن اقوردادا نازارباەۆتىڭ توراعالىعىمەن قاۋىپسىزدىك كەڭەسىنىڭ جيىنى وتكەن. اقوردانىڭ ءباسپاسوز قىزمەتىنىڭ حابارلاۋىنشا، جيىندا ىشكى ىستەر ءمينيسترى قالمۇحانبەت قاسىموۆ پەن ۇلتتىق قاۋىپسىزدىك كوميتەتىنىڭ توراعاسى ۆلاديمير جۇماقانوۆتىڭ جانە قاۋىپسىزدىك كەڭەسىنىڭ وزگە دە مۇشەلەرىنىڭ ەسەبى تىڭدالعان.
نازارباەۆ شابۋىلدان قۇربان بولعانداردىڭ تۋىستارى مەن زارداپ شەككەندەرگە كوڭىل ايتىپ، ولارعا پسيحولوگيالىق جانە ماتەريالدىق قولداۋ كورسەتۋ قاجەتىن ايتقان.
“قازىر قۇقىق قورعاۋ ورگاندارى زۇلىم نيەتتىلەردىڭ كىم ەكەنى، قانداي ماقساتى بولعانىن انىقتاپ جاتىر. ادام قاراسى كوپ جينالاتىن جەرلەردى قورعاپ، جارالىلارعا جەدەل مەديتسينالىق كومەك كورسەتۋ، قىلمىسكەرلەردىڭ جەكە باسىن جەدەل تۇردە تولىق انىقتاۋ كەرەك. سونىمەن بىرگە الماتى تۇرعىندارىن تۇراقتى تۇردە اقپاراتتان قۇلاعدار ەتىپ، جالپى قوعامدىق تىنىشتىقتى قامتاماسىز ەتۋ كەرەك” دەدى نازارباەۆ.
ول سونىمەن قاتار “بارلىق سىبىستىڭ الدىن الىپ، ارانداتۋشىلاردى انىقتاۋ كەرەك” ەكەنىن دە ايتقان.
تەررورمەن كۇرەس شتابى: الماتىداعى جاعداي تۇراقتاندى
ابىلاي حان جانە قازىبەك بي كوشەلەرى قيىلىسىنداعى اتىس ورنى. كوشەنى جاۋىپ تەكسەرۋ ءجۇرىپ جاتىر. الماتى. 18 شىلدە، 2016 جىل.
الماتىداعى شابۋىلدان كەيىنگى جاعداي قالپىنا ءتۇستى دەپ حابارلادى الماتىداعى تەررورمەن كۇرەس جەدەل شتابىنىڭ رەسمي وكىلى سالتانات ازىربەك. ونىڭ ايتۋىنشا، قالاداعى جاعداي قۇقىق قورعاۋ ورگاندارىنىڭ باقىلاۋىندا، قاۋىپ جوق.
شابۋىلعا قاتىستى قىلمىستىق كودەكستىڭ 99-بابىنىڭ 2-تارماعى (“كىسى ءولىمى”), 269-بابىنىڭ 2-تارماعى (“عيماراتتارعا، قۇرىلىستارعا، قاتىناس جانە بايلانىس قۇرالدارىنا شابۋىل جاساۋ نەمەسە ولاردى باسىپ الۋ”) جانە 380-بابىنىڭ 2-تارماعى (“بيلىك وكىلىنە قاتىستى كۇش قولدانۋ”) بويىنشا قىلمىستىق ىستەر قوزعالىپ، تەرگەۋ جۇمىستارى جۇرگىزىلىپ جاتىر.
الماتىدا بۇگىن تۇسكە دەيىن المالى اۋداندىق ىشكى ىستەر ءبولىمى ء(ىىب) مەن ۇقك دەپارتامەنتىنە بەلگىسىز ادام شابۋىل جاساعان. رەسمي مالىمەت بويىنشا، شابۋىلدان ءۇش پوليتسەي مەن ەكى بەيبىت تۇرعىن جارالانىپ، جەتى ادام جارالانعان.
سالتانات ازىربەكتىڭ سوزىنشە، شابۋىلعا كۇدىكتى ادام ۇستالىپ، قاماۋعا الىنعان. قازىر باسقا كۇدىكتىلەر تەكسەرىلىپ جاتىر.
الماتىدا قازا تاپقان پوليتسەيلەردىڭ اتى-جوندەرى جاريالاندى
الماتىدا شابۋىلدا قازا تاپتى دەلىنگەن پوليتسيا قىزمەتكەرلەرى (سولدان وڭعا قاراي) ماقسات سالىمباەۆ، ايان عاليەۆ جانە باۋىرجان نۇرماعامبەتوۆ. سۋرەت 24.kz سايتىنىڭ رەسمي سايتىنان الىندى.
الماتىداعى شابۋىلدان قازا تاپقان پوليتسيا قىزمەتكەرلەرىنىڭ اتى-جوندەرى جاريالاندى دەپ حابارلايدى جەرگىلىكتى اگەنتتىكتەر. قالالىق ىشكى ىستەر دەپارتامەنتى تاراتقان اقپاراتتا شابۋىلدا پوليتسيا كاپيتانى باۋىرجان نۇرماحانبەتوۆ (1988 جىلى تۋعان), كىشى سەرجانت ماقسات سالىمباەۆ (1991 جىلى تۋعان) جانە پوليتسيا ستارشيناسى ايان عاليەۆ (1974 جىلى تۋعان) قازا تاپقانى ايتىلادى.
الماتىدا بۇگىن تۇسكە دەيىن بەلگىسىز قارۋلى ادامدار المالى اۋداندىق ىشكى ىستەر ءبولىمى مەن ۇقك دەپارتامەنتىنە شابۋىل جاساعان. رەسمي اقپارات بويىنشا، شابۋىلدان پوليتسيا قىزمەتكەرلەرىنەن وزگە ءبىر بەيبىت تۇرعىن قازا تاپقان، جەتى پوليتسەي جاراقاتتانعان.
پوليتسيا “شابۋىل جاسادى” دەلىنگەن ەكى ادامنىڭ ۇستالعانىن حابارلادى.
رەسپۋبليكالىق انتيتەررورلىق ورتالىق شابۋىلعا بايلانىستى الماتى اۋماعىندا تەررورلىق قاۋىپ-قاتەردىڭ “قىزىل” دەڭگەيىن جاريالاعان.
قازاقستان پرەزيدەنتى نۇرسۇلتان نازارباەۆ شابۋىلعا بايلانىستى قاۋىپسىزدىك كەڭەسىنىڭ جيىنىن وتكىزىپ، الماتىداعى شابۋىلدى تەراكت دەپ اتادى.
ازات ەۋروپا / ازاتتىق راديوسى
پىكىر قالدىرۋ