– بيىلعى جىلى بولىنەتىن مەملەكەتتىك ءبىلىم گرانتىنىڭ سانى انىقتالدى. مەملەكەتتىك تاپسىرىس بويىنشا 39 994 ورىندى قۇراپ وتىر. ونىڭ ىشىندە باكالاۆريات – 32 168 گرانت، ماگيستراتۋرا – 7 241 گرانت، دوكتورانتۋراعا – 623 گرانت بولىپ وتىر. بۇرىنعىداي بيىلدا مەملەكەتتىك گرانتتاردىڭ باسىم كوپشىلىگى تەحنيكالىق ماماندىقتارعا بەرىلەدى. تەحنيكالىق ماماندىقتاردىڭ ۇلەسى 42,4 پايىزدى قۇراپ وتىر، – دەيدى ۆيتسە-مينيستر.

تاكىر بالىقباەۆتىڭ ايتۋىنشا بيىلعى جىلعى مەملەكەتتىك گرانتتاردىڭ ءبولىنۋىنىڭ تاعى ءبىر ەرەكشىلىگى بار ەكەن. مەملەكەتتىك گرانتتاردىڭ باسىم كوپشىلىگى قازاقشا  مەكتەپ بىتىرگەندەرگە بولىنەدى دەيدى.

– بيىلعى جىلدىڭ مەملەكەتتىڭ تاپسىرىسىنداعى باستى ەرەكشەلىك – گرانتتاردىڭ وقۋ تىلىنە بايلانىستى بولىپ وتىر. مەملەكەتتىك گرانتتاردىڭ 75 پايىزى قازاق بولىمىنە جانە 25 پايىزى ورىس بولىمىنە بولىنەتىن بولادى. وسى ۋاقىتقا دەيىن گرانتتار ەكى تىلگە شامالاس پروپورتسيامەن ءبولىنىپ كەلدى. بىراق ەندى مەكتەپ بىتىرۋشىلەردىڭ ۇلەسى بويىنشا، قازاق مەكتەبىن بىتىرگەندەر ورىس مەكتەبىن بىتىرگەندەردەن باسىم. سوندىقتان وسىنداي شەشىمگە كەلدىك، – دەيدى ول.

ايتا كەتەيىك، بيىلعى جىلى 124 379 وقۋشى مەكتەپ ءبىتىردى. ونىڭ ىشىندە 84302 وقۋشى قازاق تىلىندە بولسا، ورىس تىلىندە – 40077. ياعني قازاق تىلىندە بىتىرۋشىلەردىڭ سانى ورىس مەكتەپتەرىنە قاراعاندا ەكى ەسەگە كوپ. ال ۇبت-عا قاتىسۋعا 87782 ءوتىنىش بەرىلگەن. قازاق تىلىندە تەست تاپسىرعانداردىڭ سانى – 62384. ورىس تىلىندە تەست تاپسىرعاندار – 25 398 وقۋشى.