جاڭا جاھاندانۋ ءداۋىرى جايلى بولجام

جاپونيادا شىعاتىن Diplomat گازەتى «جاھاندانۋدىڭ ازيالىق سيپاتى» اتتى ماقالاسىندا «جاھاندانۋدىڭ قۇبىلمالى قارقىنى» جايلى جازعان. ماقالا اۆتورلارى ۇلىبريتانيا ەۋروپا وداعىنان شىعۋدى ۇيعارعان تۇستا ازيا ينفراقۇرىلىمدىق ينۆەستيتسيالار بانكىنىڭ ء(اىىۆ) العاشقى سەزىن وتكىزۋىن ونىڭ ينديكاتورلارىنىڭ بىرىنە بالايدى. «قاراپايىم تىلمەن ايتقاندا، باتىس جاھاندانۋ پروتسەسىندەگى قوزعاۋشى ءرولىن بىرتىندەپ شىعىسقا، ونىڭ ىشىندە ازياعا بەرەدى» دەپ جازادى Diplomat.

ماقالادا اقش-تاعى دونالد ترامپ پەن بەرني ساندەرس، ۇلىبريتانياداعى دجەرەمي كوربين مەن نايدجەل فاراج نەمەسە فرانتسياداعى مارين لە پەن ءتارىزدى «پروتەكتسيونيستىك پلاتفورماسى بار ساياساتكەرلەردىڭ ورلەۋىن» سيپاتتاعان. «بۇلار قازىرگى قاعيدالارعا قارسى نارازىلىق تانىتۋشى وقشاۋ تۇلعالار دەپ سانالعانىمەن، قازىر ولاردىڭ كوزقاراستارى بارعان سايىن كوبىرەك تانىلىپ كەلەدى» دەلىنگەن ماقالادا.

بىراق ازيا ەلدەرى ءوز مۇددەسىن حالىقارالىق ساۋدا-ساتتىق پەن ايماقتىق ىنتىماقتاستىقتى دامىتۋ جانە الەمدىك مۇددەلەردى قورعاۋمەن كوبىرەك بايلانىستىرادى دەپ جازادى باسىلىم. ايتكەنمەن ماقالا اۆتورى، لوندوندا تۇراتىن ساياساتتانۋشى چيتيگي باجپاي ازيا جاھاندانۋعا قاتىستى پىكىرتالاستاردىڭ كوشباسشىسىنا اينالادى دەپ ايتۋعا ءالى ەرتە دەپ سانايدى. «قىسقا جانە ورتا مەرزىمدى كەزەڭ ىشىندە جاھاندانۋ باسەڭسىپ، باتىس ەلدەرى بارعان سايىن توماعا-تۇيىقتالا تۇسەدى، ال ازيا ەلدەرى بۇل ۆاكۋمدى تولتىرۋعا ازىرشە قاۋقارسىز. بۇل باقىلاۋسىز تەرريتوريالاردىڭ كوبەيىپ، عالامدىق نورمالار مەن ينستيتۋتتاردىڭ كۇيرەۋىنە جانە ترانسۇلتتىق قاتەرلەرگە تويتارىس بەرۋ مۇمكىندىگىنىڭ شەكتەلۋىنە ۇلاسادى» دەپ جازادى Diplomat گازەتىنىڭ اۆتورى.

جىبەك جولىنداعى ماريحۋانا

امەريكانىڭ Metroactive گازەتىندە جاريالانعان «باتىس وركەنيەتىن «ناشا» ساۋداگەرلەرى قۇرعان با؟» دەگەن ماقالادا ادامزات وركەنيەتى باتىسقا قاراي دامىعان تۇستا ماريحۋانا ساۋدا-ساتتىقتىڭ نەگىزگى ەلەمەنتى بولعان دەگەن بولجام ايتىلعان. Vegetation History and Archaeobotany اكادەميالىق جۋرنالىندا جاريالانعان زەرتتەۋ دەرەكتەرىنە سايكەس، ەۋرازيا كونتينەنتىنىڭ ەكى جاعىن جايلاعان ادامدار ماريحۋانانى 10-12 مىڭ جىلداي بۇرىن ءبىر-بىرىنەن تاۋەلسىز تاۋىپ، پايدالانۋدى ۇيرەنگەن. الگى زەرتتەۋدە شىعىس ازيادا ماريحۋانانى پايدالانۋ قولا ءداۋىرىنىڭ باس كەزىندە، ياعني بەس مىڭ جىلداي بۇرىن كونتينەنتارالىق ساۋدا دامۋىنا بايلانىستى تاراعان بولۋى مۇمكىن دەپ جازادى.

ءيزرايلدىڭ سافەد قالاسىنداعى سورا وسەتىن پلانتاتسيا. 7 قاراشا 2012 جىل.

«قولا ءداۋىرىنىڭ باسىنا قاراي دالا كوشپەندىلەرىنىڭ ۇشى-قيىرى جوق تەرريتوريانى جايلاۋعا مۇمكىندىك بەرەتىن سالت اتپەن ءجۇرۋ ونەرىنىڭ مايتالمان شەبەرلەرىنە اينالۋى بىرنەشە مىڭ جىلدان كەيىن ايگىلى جىبەك جولىنا اينالعان ەۋرازيا باعىتىنىڭ بويىندا ساۋدا جولدارىن تۇزۋگە ۇلاستى. قولا داۋىرىندە قالانعان جول شىعىس پەن باتىس اراسىندا تالاي تاۋاردىڭ، ونىڭ ىشىندە ماريحۋانانىڭ دا تارالۋىنا سەپتەسكەن شىعار» دەپ بولجايدى Metroactive باسىلىمى.

ال امەريكانىڭ News4Jax.com جاڭالىقتار سايتى اقش-تىڭ فلوريدا شتاتىندا العاش رەت زاڭدى تۇردە وسىرىلگەن ماريحۋانا ءونىمى جايلى حابارلايدى. ونى مەملەكەتتەن ماريحۋانانى مەديتسينالىق ماقساتتا ءوسىرىپ، اۋىر دەرتكە شالدىققان جاندار مەن اجال اۋزىندا جاتقان ناۋقاستار ءۇشىن قولدانۋعا رۇقسات العان التى كومپانيانىڭ العاشقىسى – Surterra Therapeutics كومپانياسى اشقان ەكى ءوندىرىس ورنىنىڭ بىرىندە وسىرگەن.

جابايى سورانى ورتەپ جاتقان ادام. كراسنويارسك ولكەسى، رەسەي، 12 شىلدە 2012 جىل.

ەندى فلوريدا شتاتى زاڭدارى مەديتسينالىق ماريحۋانانىڭ ەكى ءتۇرىن – كەي دەرتتىڭ قوزۋىن توقتاتىپ، بەلگىلەرىن جەڭىلدەتۋگە كومەكتەسەدى دەپ بولجانعان Charlotte’s Web ءتارىزدى ەيفوريالىق ەمەس ءتۇرى مەن ءال ۇستىندەگى ناۋقاستاردىڭ جانىنا باتقان اۋرۋىن، لوقسۋ مەن وزگە سيمپتومدارىن باساتىن تولىققاندى ماريحۋانانى پايدالانۋعا رۇقسات ەتەدى.

ەگەر قاراشا ايىنا جوسپارلانعان داۋىسقا سالۋدا سايلاۋشىلاردىڭ 60 پايىزدان كوبى الگىندەي ماريحۋانانى اۋىر دەرتكە شالدىققان ناۋقاستار ءۇشىن پايدالانۋدى قۇپتاسا، مۇنداي كومپانيالار كوبەيۋى مۇمكىن. الدىن الا ەسەپ بويىنشا، قازىر فلوريدادا 450 مىڭ اۋىر ناۋقاس ادام بار.

ماقالادا مەديتسينالىق ماقساتتا پايدالانىلاتىن ماريحۋانا ءتۇرىنىڭ ادەتتە كوڭىل-كۇيدى كوتەرۋ ءۇشىن قولدانىلاتىن ماريحۋانا تۇرلەرى سياقتى اسەرى جوق دەپ تۇسىندىرەدى. فلوريدادا ماريحۋانا شەگۋگە زاڭمەن تىيىم سالىنعان، سوندىقتان تۇسكەن ءونىمنىڭ ءبارى ماي، اەروزول، بالزام جانە كاپسۋلالار جاساۋعا جۇمسالادى.

ازات ەۋروپا / ازاتتىق راديوسى