تۇركيانىڭ قازاقستانداعى ەلشىلىگى قازاقستاندى ەلدەگى «وپپوزيتسيالىق قايراتكەر فەتحۋللا گۇلەنمەن بايلانىسى بار وقۋ ورىندارىنىڭ قىزمەتىن توقتاتۋعا» شاقىرادى دەپ حابارلايدى جەرگىلىكتى اقپارات قۇرالدارى. “ينتەرفاكس-قازاقستان” اگەنتتىگىنىڭ حابارلاۋىنشا، استانادا وتكەن بريفينگتە تۇركيانىڭ قازاقستانداعى ەلشىسى نەۆزات ۋيانىك گۇلەن قوزعالىسى مەن ونىڭ بولىمشەلەرىنە بايلانىستى ۇيىمدار قازاقستاندا دا بار ەكەنىن ايتىپ، ەلدە تۇركيا بيلىگىنىڭ قاتىسى بار ءبىر عانا وقۋ ورنى اشىلعانىن ەسكەرتتى.

- تۇركيانىڭ قولداۋىمەن رەسمي تۇردە اشىلعان وقۋ ورنى – تۇركىستانداعى قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتى. قازاقستان اۋماعىنداعى «قازاق-تۇرىك مەكتەبى» نەمەسە «قازاق-تۇرىك ليتسەيى» سىندى باسقا وقۋ ورىندارىنىڭ ءبىزدىڭ مەملەكەتتىك ورگاندارعا ەش قاتىسى جوق، – دەيدى تۇركيا ەلشىسى نەۆزات ۋيانىك.

ەلشى «گۇلەنشىل» ۇيىمداردىڭ كوتەرىلىس جاساۋ قاۋپى بار ەكەنىن ايتتى. بىراق ول قازاقستانداعى فەتحۋللا گۇلەن قوزعالىسىمەن بايلانىسى بار ۇيىمداردى ناقتى اتاپ ايتپادى.

تۇركيادا بولماي قالعان مەملەكەتتىك توڭكەرىس ارەكەتىنە انكارا اقش-تا تۇراتىن تەولوگ فەتحۋللا گۇلەندى ايىپتاعان. كوپ ۇزاماي تۇركيا بيلىگى ورتالىق ازيا ەلدەرى بيلىكتەرىنەن «گۇلەنشىل» دەيتىن وقۋ ورىندارىنا دەگەن «كوزقاراسىن وزگەرۋدى تالاپ ەتىپ»، «گۇلەنشىلەردىڭ توڭكەرىس جاساۋ پيعىلى بارىن” ەسكەرتكەنى تۋرالى مالىمدەي باستاعان.

مۇنىڭ الدىندا قازاقستانداعى قازاق-تۇرىك ليتسەيلەرىنە دەمەۋشىلىك ەتەتىن حالىقارالىق KATEV قورى وكىلى ازاتتىققا بەرگەن سۇقباتىندا «ولاردىڭ فەتحۋللاح گۇلەنگە دە، تۇركياعا دا قاتىسى جوق» ەكەنىن مالىمدەگەن بولاتىن.

تۇركيا ەلشىلىگى استانادا بۇگىن ساعات 14-تە وتكەن بريفينگكە ازاتتىق تىلشىلەرىنتىركەمەي قويعان. ەلشىلىك قىزمەتكەرلەرى ازاتتىققا تىلشىلەرى “جۋرناليستەر سانىنىڭ شەكتەۋلى ەكەنىنە بايلانىستى تىزىمگە سىيماي تۇرعانىن” جانە بريفينگكە قاي باق-تان كىم كەلەتىنىن ەلشى نەۆزات ۋيانىكتىڭ ءوزى تاڭدايتىنىن ايتقان.

ازات ەۋروپا / ازاتتىق راديوسى