Türkiyanıñ Qazaqstandağı elşiligi Qazaqstandı eldegi «oppoziciyalıq qayratker Fethulla Gülenmen baylanısı bar oqu orındarınıñ qızmetin toqtatuğa» şaqıradı dep habarlaydı jergilikti aqparat qwraldarı. “Interfaks-Qazaqstan” agenttiginiñ habarlauınşa, Astanada ötken brifingte Türkiyanıñ Qazaqstandağı elşisi Nevzat Uyanık Gülen qozğalısı men onıñ bölimşelerine baylanıstı wyımdar Qazaqstanda da bar ekenin aytıp, elde Türkiya biliginiñ qatısı bar bir ğana oqu ornı aşılğanın eskertti.

- Türkiyanıñ qoldauımen resmi türde aşılğan oqu ornı – Türkistandağı Qoja Ahmet YAssaui atındağı halıqaralıq qazaq-türik universiteti. Qazaqstan aumağındağı «qazaq-türik mektebi» nemese «qazaq-türik liceyi» sındı basqa oqu orındarınıñ bizdiñ memlekettik organdarğa eş qatısı joq, – deydi Türkiya elşisi Nevzat Uyanık.

Elşi «gülenşil» wyımdardıñ köterilis jasau qaupi bar ekenin ayttı. Biraq ol Qazaqstandağı Fethulla Gülen qozğalısımen baylanısı bar wyımdardı naqtı atap aytpadı.

Türkiyada bolmay qalğan memlekettik töñkeris äreketine Ankara AQŞ-ta twratın teolog Fethulla Gülendi ayıptağan. Köp wzamay Türkiya biligi Ortalıq Aziya elderi bilikterinen «gülenşil» deytin oqu orındarına degen «közqarasın özgerudi talap etip», «gülenşilerdiñ töñkeris jasau piğılı barın” eskertkeni turalı mälimdey bastağan.

Mwnıñ aldında Qazaqstandağı qazaq-türik liceylerine demeuşilik etetin halıqaralıq KATEV qorı ökili Azattıqqa bergen swqbatında «olardıñ Fethullah Gülenge de, Türkiyağa da qatısı joq» ekenin mälimdegen bolatın.

Türkiya elşiligi Astanada bügin sağat 14-te ötken brifingke Azattıq tilşilerintirkemey qoyğan. Elşilik qızmetkerleri Azattıqqa tilşileri “jurnalister sanınıñ şekteuli ekenine baylanıstı tizimge sıymay twrğanın” jäne brifingke qay BAQ-tan kim keletinin elşi Nevzat Uyanıktıñ özi tañdaytının aytqan.

Azat Europa / Azattıq radiosı