قازاقپارات  - زىلتەمىرشى دەنيس ۋلانوۆتىڭ جەكە باپكەرى الەكساندر دەۆياتكين «قازاقپارات» حاا تىلشىسىنە بەرگەن ەكسكليۋزيۆتى سۇحباتىندا ريو-دە-جانەيرودا قولا مەدال جەڭىپ العان دەنيستىڭ رۋمىنيالىق قارسىلاسىنىڭ دوپينگپەن ۇستالعانىن، سول سەبەپتى قولا مەدال ءتورتىنشى ورىن العان دەنيس ۋلانوۆقا بەرىلۋى مۇمكىن ەكەنىن حابارلادى.

- دەنيس پەن رۋمىنيالىق اۋىر اتلەتتىڭ ەكەۋى دە ريودا 390 كەلى كوتەرگەن ەدى. بىراق، دەنيستىڭ سالماعى ودان 200 گرامم اۋىر بولىپ، قولا جۇلدەدەن ايىرىلىپ قالعان ەدى. ال بۇگىن تۇنگى ەكىدە دوپينگ-باقىلاۋدىڭ قورىتىندىسى جاريالاندى جانە امەريكالىقتار، ەۋروپالىقتار، ءتىپتى رۋمىنيالىقتار دەنيستى قولا مەدالىمەن قۇتتىقتاپ ۇلگەردى، ءوزىمىزدىڭ وتانداستارىمىز ءالى كەشىگىپ جاتىر. بۇل اقپارات وليمپيادالىق سايتتا تۇر، ەندى تەك حوك رەسمي حابارلاماسىن كۇتەمىز. اشىعىن ايتقاندا، رۋمىنيالىقتىڭ زىلتەمىر كوتەرۋىنىڭ ءوزى كۇدىكتى بولىپ كورىنىپ ەدى.

-  دەنيستى نەشە جىلدان بەرى جاتتىقتىرىپ كەلەسىز جانە دەنيس سىزگە قالاي كەلدى؟

-   ول زىريان اۋدانىنان كەلدى جانە وسىندا كوللەدج ءبىتىردى. ءالى الدىمىزدا كەلەسى جىلى وتەتىن الەم چەمپيوناتى بار، سوعان دايىندىق ۇستىندەمىز. دەنيس ءالى جاپ-جاس، جاسى 22-دە، ءالى ۇيلەنبەگەن، سوندىقتان ونىڭ نەگىزگى جەڭىستەرى ءالى الدا. دەنيس – وتە تالانتتى جىگىت. ريودا كوپتەگەن ەلدىڭ وكىلدەرى ونى اينالشىقتاپ ءجۇرىپ الدى.

-   دەنيستەن بولەك قازاقستانعا سپورتتىق جەڭىستەر اكەلەتىن باسقا دا شاكىرتتەرىڭىز بار ما؟

-    يا، قر قۇراماسىنداعى كاپلين مەن گالۋشكو يۆان بار.