بۇعان دەيىن قورعانىس ءمينيسترى بولعان يمانعالي تاسماعامبەتوۆ بۇگىننەن باستاپ پرەمەر-مينيستر باقىتجان ساعىنتاەۆتىڭ ورىنباسارى بولىپ تاعايىندالدى. پرەمەر-ءمينيستردىڭ بۇگىن بەلگىلى بولعان تاعى ءبىر ورىنباسارى – اسقار مىرزاحمەتوۆ اۋىل شارۋاشىلىعى مينيستر قىزمەتىن دە قوسىپ اتقارماق. ال پرەمەر-ءمينيستردىڭ ءبىرىنشى ورىنباسارى قىزمەتىنە قىركۇيەكتىڭ 10-ىندا «قازاقستان تەمىر جولى» ۇلتتىق كومپانياسىن باسقارىپ كەلگەن اسقار مامين تاعايىندالعان ەدى.

پرەزيدەنت نازارباەۆتىڭ قىزى، 2015 جىلدىڭ قىركۇيەك ايىنان بەرى قازاقستان ۇكىمەتىندە پرەمەر-ءمينيستردىڭ ورىنباسارى بولىپ كەلگەن داريعا نازارباەۆا سەنات دەپۋتاتى اتاندى.

ۇكىمەتتەگى وزگەرىستەر

قازاقستان پرەزيدەنتى ۇكىمەت قۇرامىنا قۇرىلىمدىق وزگەرىستەر ەنگىزىپ، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل مينيسترلىگىن اگەنتتىككە اۋىستىردى. پرەزيدەنتكە تىكەلەي باعىناتىن اگەنتتىكتىڭ توراعاسىنا قايرات قوجامجاروۆ تاعايىندالدى. 2014 جىلى وسى اگەنتتىك مينيسترلىككە اۋىستىرىلعان بولاتىن.

جاڭادان ءدىن ىستەرى مەن ازاماتتىق قوعام مينيسترلىگى اشىلىپ، وعان بۇعان دەيىن پرەزيدەنت كومەكشىسى – قاۋىپسىزدىك كەڭەسىنىڭ حاتشىسى بولعان نۇرلان ەرمەكباەۆ تاعايىندالدى. ال ونىڭ ورنىنا ۇلتتىق قاۋىپسىزدىك كوميتەتىنىڭ بۇرىنعى توراعاسى ۆلاديمير جۇماحانوۆ باردى.

ۇكىمەت قۇرامىنداعى جاڭا ەسىمدەر – قورعانىس ءمينيسترى بولىپ تاعايىندالعان قازاقستان قارۋلى كۇشتەرى باس شتابىنىڭ باسشىسى، گەنەرال-پولكوۆنيك ساكەن جاسۇزاقوۆ پەن ادىلەت ءمينيسترى مارات بەكەتاەۆ. ال وسى كۇنگە دەيىن ادىلەت ءمينيسترى بولعان بەرىك يماشەۆ بۇگىن ورتالىق سايلاۋ كوميسسياسىنىڭ توراعاسى بولىپ تاعايىندالدى.

وزگە مينيسترلەردىڭ كوپشىلىگى ءوز ورىندارىندا قالدى. قازاقستان پرەزيدەنتى جارلىعى بويىنشا ەرلان ىدىرىسوۆ – سىرتقى ىستەر ءمينيسترى، قالمۇحانبەت قاسىموۆ – ىشكى ىستەر ءمينيسترى، داۋرەن اباەۆ – اقپارات جانە بايلانىس ءمينيسترى، ەرلان ساعاديەۆ – ءبىلىم جانە عىلىم ءمينيسترى، تامارا دۇيسەنوۆا – دەنساۋلىق ساقتاۋ جانە الەۋمەتتىك دامۋ ءمينيسترى، جەڭىس قاسىمبەك – ينۆەستيتسيالار جانە دامۋ ءمينيسترى، باقىت سۇلتانوۆ – قارجى ءمينيسترى، ارىستانبەك مۇحامەديۇلى – مادەنيەت جانە سپورت ءمينيسترى، قۋاندىق بيشىمباەۆ – ۇلتتىق ەكونوميكا ءمينيسترى، قانات بوزىمباەۆ ەنەرگەتيكا ءمينيسترى بولىپ قالا بەردى.

بۇل – وتكەن اپتادا 2014 جىلدان بەرى قازاقستان ۇكىمەتىن باسقارعان كارىم ءماسىموۆتىڭ ۇلتتىق قاۋىپسىزدىك كوميتەتى توراعالىعىنا جىبەرىلگەلى بەرگى كەزەكتى وزگەرىس. وتكەن جۇمادا قازاقستان پرەمەر-ءمينيسترى بولىپ باقىتجان ساعىنتاەۆ تاعايىندالعان.