Bwğan deyin qorğanıs ministri bolğan Imanğali Tasmağambetov büginnen bastap prem'er-ministr Baqıtjan Sağıntaevtıñ orınbasarı bolıp tağayındaldı. Prem'er-ministrdiñ bügin belgili bolğan tağı bir orınbasarı – Asqar Mırzahmetov auıl şaruaşılığı ministr qızmetin de qosıp atqarmaq. Al prem'er-ministrdiñ birinşi orınbasarı qızmetine qırküyektiñ 10-ında «Qazaqstan temir jolı» wlttıq kompaniyasın basqarıp kelgen Asqar Mamin tağayındalğan edi.

Prezident Nazarbaevtıñ qızı, 2015 jıldıñ qırküyek ayınan beri Qazaqstan ükimetinde prem'er-ministrdiñ orınbasarı bolıp kelgen Dariğa Nazarbaeva senat deputatı atandı.

ÜKİMETTEGİ ÖZGERİSTER

Qazaqstan prezidenti ükimet qwramına qwrılımdıq özgerister engizip, memlekettik qızmet isteri jäne sıbaylas jemqorlıqqa qarsı is-qimıl ministrligin agenttikke auıstırdı. Prezidentke tikeley bağınatın agenttiktiñ törağasına Qayrat Qojamjarov tağayındaldı. 2014 jılı osı agenttik ministrlikke auıstırılğan bolatın.

Jañadan din isteri men azamattıq qoğam ministrligi aşılıp, oğan bwğan deyin prezident kömekşisi – qauipsizdik keñesiniñ hatşısı bolğan Nwrlan Ermekbaev tağayındaldı. Al onıñ ornına wlttıq qauipsizdik komitetiniñ bwrınğı törağası Vladimir Jwmahanov bardı.

Ükimet qwramındağı jaña esimder – qorğanıs ministri bolıp tağayındalğan Qazaqstan qarulı küşteri bas ştabınıñ basşısı, general-polkovnik Säken Jaswzaqov pen ädilet ministri Marat Beketaev. Al osı künge deyin ädilet ministri bolğan Berik Imaşev bügin ortalıq saylau komissiyasınıñ törağası bolıp tağayındaldı.

Özge ministrlerdiñ köpşiligi öz orındarında qaldı. Qazaqstan prezidenti jarlığı boyınşa Erlan Idırısov – sırtqı ister ministri, Qalmwhanbet Qasımov – işki ister ministri, Däuren Abaev – aqparat jäne baylanıs ministri, Erlan Sağadiev – bilim jäne ğılım ministri, Tamara Düysenova – densaulıq saqtau jäne äleumettik damu ministri, Jeñis Qasımbek – investiciyalar jäne damu ministri, Baqıt Swltanov – qarjı ministri, Arıstanbek Mwhamediwlı – mädeniet jäne sport ministri, Quandıq Bişimbaev – wlttıq ekonomika ministri, Qanat Bozımbaev energetika ministri bolıp qala berdi.

Bwl – ötken aptada 2014 jıldan beri Qazaqstan ükimetin basqarğan Kärim Mäsimovtiñ wlttıq qauipsizdik komiteti törağalığına jiberilgeli bergi kezekti özgeris. Ötken jwmada Qazaqstan prem'er-ministri bolıp Baqıtjan Sağıntaev tağayındalğan.