دەباتتىڭ باسىندا ەكى كۇن بۇرىن ءوزىنىڭ 2005 جىلى تۇسكەن جاعىمسىز ۆيدەوسى تاراپ كەتكەنى تۋرالى ايتقان ترامپ ۆيدەوداعى ارەكەتتەرىن «وڭاشادا ايتىلعان اڭگىمە عانا» دەپ سيپاتتادى. ول «ۆيدەوعا اسا نازار اۋدارۋدىڭ قاجەتى شامالى» دەيدى.

مۇنان سوڭ ول قارسىلاسى حيللاري كلينتوننىڭ كۇيەۋى – كەزىندە سەكسۋالدىق ارەكەتتەرى ءۇشىن ايىپتالعان اقش-تىڭ بۇرىنعى پرەزيدەنتى بيلل كلينتوننىڭ وزىنەن «اسىپ تۇسكەنىن»، ونىڭ «الدەقايدا جامان ىستەر جاساعانىن» ايتتى.

ول ۆيدەوداعى ارەكەتتەرى ءۇشىن ماقتانبايتىنىن، بىراق اقش-تىڭ الدىندا ودان دا گورى ماڭىزدى، يم («يسلام مەملەكەتى» ەكسترەميستىك ۇيىمى) سودىرلارىنىڭ كۇشەيۋى، الەمدەگى قاقتىعىستار سياقتى ماسەلەلەردىڭ تۇرعانىن باياندادى. ترامپ ۆيدەودا ايتقان اڭگىمەلەرىن شىن مانىندە ىسكە اسىرماعانىن مالىمدەدى.

ال حيللاري كلينتون ديسكۋسسيا كەزىندە «ترامپتىڭ الگى ۆيدەوسى – ونىڭ پرەزيدەنت قىزمەتىنە لايىق ەمەس ەكەنىن دالەلدەيتىن تاعى ءبىر ايعاق. ترامپ ۆيدەو ونىڭ قانداي ادام ەكەنىن «سيپاتتاي المايدى» دەيدى. بىراق كورگەن كەز كەلگەن ادام ۆيدەونىڭ ترامپتىڭ قانداي ادام ەكەنىن ناقتى كورسەتەتىنىن بىلەدى» دەدى.

ترامپ دەباتتا كلينتوندى اقش پرەزيدەنتى باراك وبامانىڭ العاشقى پرەزيدەنتتىك مەرزىمىندە مەملەكەتتىك حاتشى قىزمەتىن اتقارعان كەزىندە جەكە مەنشىك پوچتا سەرۆەرىن پايدالاندى دەپ ايىپتادى. دونالد ترامپ سايلاۋدا جەڭگەن جاعدايدا بۇل ءىستى پروكۋرورلارعا ارنايى تەكسەرتەتىنىن مالىمدەدى.

كلينتون ترامپتىڭ بۇل سوزىنە «ەلىمىزدە دونالد ترامپتىڭ زاڭ شىعارمايتىنى قانداي جاقسى» دەپ جاۋاپ بەرسە، ترامپ «ال سەن تۇرمەگە وتىراسىڭ» دەپ سالدى.

دەبات كەزىندە كلينتون رەسەيدىڭ اقش-قا بۇرىن تاريحتا بولماعان دارەجەدە كيبەرشابۋىل جاساعانىن ايتا كەلىپ، «اقش ەشقاشان قارسىلاس مەملەكەتتىڭ شابۋىلىنا مۇنشالىقتى دارەجەدە ۇشىراماعان. شەتەلدىك دەرجاۆا (رەسەيدى ايتادى – رەد.) اقش-تاعى سايلاۋعا اسەر ەتكىسى كەلەدى. ولار مەن جەڭسىن دەپ وتىرعان جوق. رەسەي مۇنى سايلاۋدا دونالد ترامپ جەڭسىن دەپ ىستەپ وتىر» دەدى.

مۇنىڭ الدىندا باراك وباما اكىمشىلىگى رەسەيدى ۇكىمەت سەرۆەرىنە كيبەرشابۋىل جاسادى دەپ ايىپتاعان ەدى. كرەمل ونى تەرىسكە شىعارادى.

ۆيدەونىڭ تاريحى

اقش-تىڭ ميسسۋري شتاتىنداعى سەنت-لۋيس قالاسىندا، ۆاشينگتون ۋنيۆەرسيتەتىندە وتكەن دەباتقا ەكى كۇن قالعاندا، ياعني قازاننىڭ 8-ءى كۇنى ترامپتىڭ وعاش ارەكەتى تۇسىرىلگەن 2005 جىلعى ۆيدەو تاراپ كەتكەن ەدى. ەكى ساياساتكەر بەتپە-بەت پىكىرتالاسقا شىعار قارساڭدا دا بۇل ماسەلە تۋرالى داۋلاسقان بولاتىن.

ۆيدەودا ترامپ جىنىستىق ارەكەتتەرىنە ماقتانىپ، ايەلدەر تۋرالى انايى سوزدەر ايتقان. حيللاري كلينتون ترامپتىڭ ۆيدەوسىن «ادام شوشىرلىق» دەپ باعالاعان. مۇنان سوڭ دونالد ترامپتىڭ ءوز پارتيالاستارى، اراسىندا گۋبەرناتورلار مەن اقش كونگرەسىنىڭ وكىلدەرى دە بار، وعان داۋىس بەرمەيتىندەرىن مالىمدەپ، سايلاۋشىلاردى دا داۋىس بەرمەۋگە شاقىرعان.

اقش-تىڭ بۇرىنعى پرەزيدەنتى، حيللاري كلينتوننىڭ كۇيەۋى بيلل كلينتون دونالد ترامپتىڭ ايەلى مەلانيا ترامپپەن امانداسىپ جاتىر. اقش، سەنت-لۋيس، 9 قازان 2016 جىل.

ميللياردەر ماگنات دونالد ترامپ ۆيدەوداعى سوزدەرى ءۇشىن جۇرتتان كەشىرىم سۇراپ، ونىڭ «ءسوز عانا» ەكەنىن ەسكەرتىپ، قاراشانىڭ 8-ىنە دەيىن سوزىلاتىن سايلاۋ ناۋقانىن جالعاستىرا بەرەتىنىن مالىمدەگەن.

مۇنان سوڭ ول حيللاري كلينتوننىڭ كۇيەۋىن ايىپتاپ، «بيلل كلينتون ايەلدەردى شىنىمەن زورلاعان، ال ونىڭ ايەلى حيللاري كۇيەۋىنىڭ زورلىعىنا ۇشىراعان ايەلدەرگە قىسىم جاساپ كەلەدى» دەگەن بولاتىن.

ترامپ تۋرالى ۆيدەو شىعاردان ءبىر كۇن بۇرىن (قازاننىڭ 7-ءسى) Reuters-Ipsos جۇرگىزگەن ساۋالناماعا قاراعاندا، كلينتون سايلاۋشىلار قولداۋى بويىنشا ترامپتان 5 پايىز وزىپ كەلەدى.

ترامپتىڭ ايەلدەرمەن كەزدەسۋى

پرەزيدەتتىك دەباتتىڭ الدىندا ءبىر ساعات قانا بۇرىن دونالد ترامپ قارسىلاسى حيللاري كلينتوننىڭ كۇيەۋى بيلل كلينتوندى «جىنىستىق ارەكەت جاسادى» دەپ ايىپتاعان ءۇش ايەل – پولا دجونس، كەتلين ۋيللي جانە حۋانيتا بروۋدريكپەن كەزدەسكەن. كەيبىر ساراپشىلار ترامپ بۇل ارەكەتىن وزىنە كولەڭكە تۇسىرەتىن 2005 جىلعى ۆيدەودان ەلدىڭ نازارىن قارسىلاسىنىڭ كۇيەۋىنە اۋدارىپ جىبەرۋ ءۇشىن جاسادى دەپ باعالايدى.

سولدان وڭعا قاراي: پولا دجونس، كەتلين ۋيللي جانە حۋانيتا بروۋدريك كلينتون مەن ترامپتىڭ دەباتىندا وتىر. اقش، سەنت-لۋيس، 9 قازان 2016 جىل.

ءۇش ايەل دە اقش پرەزيدەنتى سايلاۋىنا ءتۇسىپ جاتقان حيللاري كلينتوننىڭ كۇيەۋى بيلل كلينتوندى وزدەرىنە قارسى جىنىستىق ارەكەت جاسادى دەپ ايىپتاعان ەدى. ماسەلەن بروۋدريك «بيلل كلينتون مەنى 1978 جىلى زورلادى» دەپ مالىمدەگەن. بىراق ونىڭ ارىزىن سوت قابىلداماي، كلينتونعا ەشقانداي ايىپ تاعىلماي قالعان. بيلل كلينتون ايىپتى جوققا شىعارادى. كەزدەسۋ كەزىندە ترامپ ايەلدەردىڭ ارىز بەرگەن ارەكەتىن ەرلىككە تەڭەگەنىمەن، ءوزىنىڭ جاعىمسىز ۆيدەوسى جايلى جۋرناليستەر سۇراقتارىنا جاۋاپ بەرمەي كەتكەن.

حيللاري كلينتون دونالد ترامپتىڭ ايەلدەرمەن كەزدەسكەنىن «تريۋك» دەپ اتاپ، ترامپتىڭ «قۇلدىراۋىنىڭ ءبىر بولىگى» رەتىندە باعالاعان.

ازاتتىق راديوسى