ت.جۇرگەنوۆ اتىنداعى قازاق ۇلتتىق ونەر اكادەمياسىنداعىلار مينيستر ارىستانبەك مۇحامەديۇلىن ايىپتاعان بۇرىنعى ستۋدەنت جايلى ايتىپ بەردى، – دەپ حابارلايدى Tengrinews.kz تىلشىسى. اكتەرلىك شەبەرلىك كۋرسىنىڭ مۇعالىمى گۇلنار امانجانوۆانىڭ ايتۋىنشا، ستۋدەنت ەڭلىك سىدىقوۆا شىن مانىندە وسى جوعارى وقۋ ورنىندا وقىپ، اكتەرلىك شەبەرلىك كۋرسىن 2015 جىلى ءتامامداپتى.

“ول جاقسى وقىدى دەپ ايتا المايمىن، سەبەبى ساباقتان كوپ قالاتىن. بىراق وعان جەڭىلدىكتەر جاسادىق، سەبەبى بويىندا ونەرى بولاتىن، وعان مۇمكىندىك بەردىك. ونىڭ مۇمكىندىگى بار، بىراق سول قاسيەتتەرىن اشپادى، سەبەبى وقىمايتىن. مۇنى ەستىگەن مەنىڭ ءوزىم تاڭعالىپ وتىرمىن. مۇنداي دۇنيەنى بىرجاقتى ايتۋ وڭاي بولىپ كورىنگەن سياقتى… ەگەر شىن مانىندە وسىنداي جاعداي بولسا، دالەلى بولۋى كەرەك. ال ونىڭ ىستەپ وتىرعانى بالالىق سياقتى. ەڭلىك شىعارماشىلىقتىڭ ادامى، شىعارماشىلىقپەن اينالىسقانى دۇرىسىراق”، – دەپ ەسەپتەيدى گۇلنار امانجانوۆا.

قىزدىڭ مۇحامەديۇلىن بوتەن ويعا تارتتى دەپ ايىپتاۋىن مۇعالىمى اقىلعا قونىمسىز ءارى دالەلسىز دەپ ەسەپتەيدى. “ول بولات اتاباەۆتىڭ كۋرسىندا وقىعان. بۇل كۋرستى بولات اتاباەۆتىڭ جەكە-جەكە تاڭداپ العانىن دا جاقسى بىلەمىن، سول تاڭداعاندارىنىڭ ىشىندە وسى قىز دا بولعان. ول وتە قاتاڭ، ۇستانىمى بەرىك ادام، ول الدەبىرەۋلەردىڭ، ءتىپتى رەكتوردىڭ ۇسىنىسى بولسا دا، وعان جول بەرمەيدى. اتاباەۆقا قىزدىڭ ءتۇر-كەسكىنى مەن دارىنى ۇناعان بولۋى كەرەك. قىزدىڭ دارىنى بار دەپ ايتا الامىن. بىزگە وقۋعا ءتۇسىپ، ءتامامداپ شىقتى”، – دەدى امانجانوۆا.

قىز “مۋزىكا تەاترىنىڭ اكتريساسى” ماماندىعى بويىنشا وقىعان. وقىتۋشىسىنىڭ ايتۋىنشا، قىز كوپ سولەمەيتىن، وقۋىن بىتىرگەن سوڭ تۋعان قالاسى قىزىلورداعا كەتىپ قالعان.

Facebook/ەڭلىك سىدىقوۆا

ەسكە سالايىق، وسىعان دەيىن ينتەرنەتتە ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەگى سول كەزدە وسى وقۋ ورنىنىڭ رەكتورى بولعان ارىستانبەك مۇحامەديۇلىن بوتەن ويعا تارتتى دەپ ايىپتاعانبولاتىن.

ال قر مادەنيەت جانە سپورت ءمينيسترى ارىستانبەك مۇحامەديۇلى قىسىم كورسەتتى دەگەن قىزدىڭ ايىپتاۋىنا جاۋاپ بەرگەن ەدى. مينيستر مۇنداي ارانداتۋشىلىق ۆيدەوۇندەۋدىڭ پايدا بولۋىن رەجيسسەر تالعات جانىبەكوۆتىڭ جوباسىمەن بايلانىستىردى.

tengrinews.kz