بيلىكتىڭ جاۋى – جاعىمپازدىق
kerey.kz
بيلىكتىڭ وزدەرى ويلاعانداي جاۋى وپپوزيتسيا ەمەس، اقوردانىڭ اينالاسى ما دەيمىن. ويتكەنى قازىرگىدەي داعدارىس كەزىندە حالىقتى اشىندىرۋ جاعىنان جاعىمپازدىق الدىنا جان سالار ەمەس. ەكونوميكالىق جاعداي جاقسى كەزدە (استانا كۇنى، ءبىرىنشى پرەزيدەنت كۇنى، «ۇلت كوشباسشىسى» ت.ب.) جاعىمپازدىق ونشا بىلىنبەي قالاتىن. ال قازىرگىدەي قيىنشىلىق تۇسىندا 10 مىڭ تەڭگەلىك بانكنوتقا مەملەكەت باسشىسىنىڭ سۋرەتىن سالىپ (1993 جىلى نازارباەۆ ءتول تەڭگەمىز شىعارىلاتىن تۇستا اقشاعا ءوز سۋرەتىن سالۋعا مۇلدە قارسى بولعان), اينالىمعا شىعارۋعا ۇمتىلۋ جاعىمپازدىقتىڭ تاعى ءبىر ەرەن ۇلگىسى بولعالى تۇر.
مۇنداي قادام تۇرمىستان قاجىعان، ەكونوميكالىق داعدارىستان شارشاعان جۇرتتى اشىندىرا تۇسەتىنى انىق. قازاقتار مۇندايدى «ارتىق ىستەيمىن دەپ تىرتىق ىستەدى» دەيدى. دەۆالۆاتسيا اناۋ – تابان تىرەيتىن ءتۇرى جوق. بۇگىننىڭ وزىندە ءبىر دوللار 345 تەڭگەگە جەتتى.
بانكنوت نومينالى قۇنسىزدانعان سايىن ەلباسى سۋرەتىنىڭ دە قۇنى تومەندەي بەرمەي مە؟! پرەزيدەنتتى ابىرويسىزداندىرۋدىڭ بۇدان وتكەن جولى جوق. ۇلتتىق بانكتىڭ جاعىمپازدىعى اينالىپ كەلگەندە – ساياسي قاتەلىك. جاعدايدى پايىمداماي – ءوز پرەزيدەنتىن ماسقارالاۋ. سوندىقتان مەملەكەت باسشىسى مۇنداي قادامعا دەرەۋ توقتاۋ سالادى دەگەن ۇمىتتەمىز.
پىكىر قالدىرۋ